Matius 4 - Alkitab Porjanjian Baa Ponah Bohasa Dayak Siang

Lacan Setan ningkoh ina Yesus bodosa 4:1-11

¹ Opah iyoh, Roh Mohotara mombimbing Yesus hia padang gurun co ngolohiui ina toningkoh pian Lacan Setan.

² Nyan idi, Yesus puasa kotahin opat pulu ondo, opat pulu komomi. Kojekaieh Are nongkomo dou.

³ Maka Lacan Setan, tukang tingkoh yoh, dombut hia Yesus. Lacan Setan mantun ma Are, “Amun Iko bujur-bujur Anak Mohotara, nyuhu kawan batu tatuh jarin rute ika kanom-Mu”

⁴ Tapi Yesus museh, “Oko antun Mohotara co tonulih ponah Surat Borasih: ‘Dulun aroh baya porulu kanon leh ika bolum. Dulun haba pomolum ka amun bolum sosuai ma kokon antun Mohotara.’ ”

⁵ Opaiyoh Lacan Setan mehen Yesus hia kota Yerusalem. Are nyuhu Yesus tonjok nyan ika co poko hunyung nyan Lopo Mohotara.

⁶ Are mantun ma Yesus, “Amun Iko bujur-bujur Anak Mohotara, nompesutbat ingkan intoi hia pinda! Iko aroh angar colaka, awi oko antun Mohotara co tonulih ponah Surat Borasih, ‘Mohotara angar nyuhu kawan molekat-Eh nyolindung Iko. Iroh angar nyambut Iko ma silun doh dapot paam-Mu mahi aroh angar dingan buah batu!’ ”

⁷ Tapi Yesus mantun ma Lacan Setan, “Oko ka antun Mohotara co tonulih ponah Surat Borasih, ‘Aroh monguji Tuhan, Mohotarammu!’ ”

⁸ Opaiyoh Lacan Setan mehen Yesus tulak hia puruk co korinah kohunyung. Lacan Setan porahan ma-Eh uras korojaan nyan dunia ma kokon komegahaieh.

⁹ Hien Lacan Setan ma Yesus, “Akuh angar mihi kokon aang tanon amun Iko nyembah nyuku akuh.”

¹⁰ Tapi Yesus mantun maeh, “Buhobat Lacan Setan awi oko antun Mohotara co tonulih ponah Surat Borasih, nyembah leh Tuhan Mohotaram mu hintang baya molayan Are leh.”

¹¹ Paluh, Lacan Setan naat Are. Paluh, kawan molekat dombut molayani Are.

Yesus molai polayanan-Eh nyan propinsi Galilea 4:12-17

¹² Opah iyoh, Yesus ngoneh bahawa Yohanes tomokuntam hia ponah seper. Jadi, Yesus naat propinsi Yudea paluh hopuli hia propinsi Galilea.

¹³ Tapi, Are aroh nukui bat nyan kota Nasaret. Are pindah hia kota Kapernaum nyan saran danau Galilea nyan derah Jebulon hintang Naptali.

¹⁴ Poristiwa cioh tojadi ina antun Mohotara jarin nyata. Nyan jaman sinan nabi Yesaya nulih antun Mohotara yoh co nain otuh:

¹⁵ Derah Jebulon hintang derah Naptali, calan co nuntuh hia danau, derah pohoi sungoi Yordan, derah kawan bangsa bokon,

¹⁶ bangsa co nukui ponah kopindong ocop noto kopandau co bahai, kopandau ocop nyomput indan bangsa co nukui nyan negri co tonyolungkop pompatoi.

¹⁷ Ingkan waktu iyoh, Yesus molai momborita. Hie-Eh, “Korojaan Sorga ocop doni! Jadi, umbotbat umpi dosa hintang tuhitbat ngonyorih songan Mohotara.”

Yesus naah opat nolayan jarin kawan murid-Eh co portama 4:18-22

¹⁸ Kotika Yesus dahat nyalan nyan saran Danau Galilea, Are noto duo beti nolayan, iyohonon Simon (co mahi tonisi Petrus) hintang Andreas, konduang eh. Iroh dahat morenge nyan danau.

¹⁹ Hien Yesus ma iroh, “Haasboh jarin pongikut Kuh. Ikan nganyap ocin, tapi Akuh angar majar ikan nganyap dulun ika jarin murid-Kuh.”

²⁰ Hiah waktu iyoh ka, Simon doruo Andreas paluh naat renge doh holuh umba Yesus.

²¹ Yesus nyalan tarus paluh kitai duo dulun hokonduang co bokon, iyohonon Yokobus doruo Yohanes. Iroh dahat ngombuah renge doh nyan ponah jukung homboh taman doh, Jebedeus. Yesus naah Yokobus doruo Yohanes ika jarin pongikut-Eh.

²² “Paluh jion iroh naat jukung hintang taman doh nyan idi ika jarin murid Yesus”.

Yesus majar, hintang momborita Tarung Pio kawun pomambuh orong dulun 4:23-25

²³ Yesus koliling nyan ngolauh propinsi Galilea. Are majar nyan kawan lopo ika sombayang dulun Yahudi. Are momborita Tarung Pio tintun Korojaan Sorga. Are mahi pomambuh kokon dulun co hotoro hintang lokohbololoi.

²⁴ Borita tintun Are tosebar nyan omoh-omoh ingkan propinsi Galilea dapot hia ngolauh propinsi Siria. Jadi orong dulun dombut hia-Eh. Iroh mehen kawan dulun co noro kokon macam toro hintang kosasi. Oko co tonguasa kawan roh jahat. Oko co molingko bulo. Oko co lumpuh. Yesus pomambuh iroh.

²⁵ Maka, orong dulun ngonulu Are. Oko co borasar ingkan propinsi Galilea, ingkan derah sopuluh kota co tonisi Dekapolis, ingkan propinsi Yudea, tomasuk kota Yerusalem, malah ingkan derah pohoi sungoi Yordan.