Matius 3 - Alkitab Porjanjian Baa Ponah Bohasa Dayak Siang

Polayanan Yohanes Pombaptis 3:1-12

¹ Nyan jaman cioh Yohanes Pombaptis momolai polayanan eh nyan padang gurun nyan derah Yudea. Are momborita,

² “Korojaan Sorga ocop doni! Jadi, umbotbat ikan umpi dosa hintang tuhitbat ngonyorih songan Mohotara.”

³ Mositi Yohanes cioh boh co tomaksut kotika nyan jaman sinan nabi Yesaya mantun: “Oko dulun co mantun muhat nyan padang pasir, ‘Nyodia calan indan Tuhan. Nongkorongbat calan indai-Eh.’ ”

⁴ Yohanes hapo jubah co tonguan ingkan bulun unta. Owot kahang eh tonguan ingkan upak ocin. Kanoieh kalap hintang oleng.

⁵ Orong dulun dombut hiaeh ingkan ngolauh derah Yudea, tomasuk kota Yerusalem hintang ngolauh derah sokitar sungoi Yordan.

⁶ Iroh mongaku kawan dosan doh, paluh Yohanes mombaptis iroh nyan Sungoi Yordan.

⁷ Tapi orong pomimpin agama Yahudi mahi dombut ika tomombaptis. Oko ingkan kolompok Parisi hintang kolompok Saduki. Waktu Yohanes kito iroh, are mantun, “Hei iko co jahat hintang licik isan nyipo mohari! Aroh bopikir ikan boraoi ngomuho arop me ingkan hukuman Mohotara daai.

⁸ Ikan sobulih nguan alogawi co bujur ika poleha bahawa ikan bujur-bujur naat dosa.

⁹ Aroh bopikir ponah songam: Kaih koturunan ingkan Abraham. Mositi Mohotara aroh angar mohukum kaih. Mingkat: Ingkan kawan batu tatuh Mohotara mahi boraoi umpi koturunan Abraham!

¹⁰ Mohotara ocop siap mohukum dulun isan dulun co ocop maut kapak ika nowong batang kaju dapot akat eh. Sika batang bua co aroh mohasir bua co pio, angar tonowong paluh tomende hia ponah apui.

¹¹ Oko Dulun co angar dombut opah akuh. Are meleh bokuasa hangki akuh. Malah jarin jungus-Eh ika mukoi tarumpah-Eh mahi akuh aroh patut. Akuh mombaptis dulun ma danum ika monunjuk bahawa iroh ocop naat dosan doh hintang tuhit ngonyorih songan Mohotara. Tapi Are angar mombaptis dulun ma Roh Mohotara hintang apui.

¹² Are ocop nantot alat tilih ina misah gandum ingkan ampoh. Gandum co pio angar tongumpur-Eh nyan ponah hukum. Tapi kokon ampoh co aroh boguna angar tomapang-Eh nyan ponah apui co aroh boraoi picop.”

Yesus tomombaptis 3:13-17

¹³ Opaiyoh, Yesus dombut ingkan propinsi Galilea hia sungoi Yordan ina Are lian tomombaptis pian Yohanes.

¹⁴ Tapi Yohanes bousaha kuloi mombaptis Yesus hintang mantun, “Mositi Iko aroh porulu dombut hia akuh ika tomombaptis! Sobujur eh, akuh co porulu tomombaptis piam-Mu!”

¹⁵ Tapi Yesus museh, “Olu otuh tojadi indan waktu cotuh. Awi ma santuhboh ito nguan kokon aranaang co tonyau Mohotara.” Jadi, Yohanes nontumun antun Yesus yoh. Are mombaptis Yesus.

¹⁶ Opah tomombaptis, Yesus jion pusit ingkan danum. Nyan waktu iyoh ka, langit topukap. Yesus kito Roh Mohotara nosuloh hia tungkui-Eh isan beleu merpati.

¹⁷ Paluh koneh suara Mohotara ingkan sorga mantun, “Tuhboh Anak-Kuh co tongasih-Kuh. Are ngonyorih songang-Kuh.”