Matius 28 - Alkitab Porjanjian Baa Ponah Bohasa Dayak Siang

Yesus bolum hopuli 28:1-10

¹ Opah ondo Sabat ocop ohut, hiah ondo Mengu, ngonyua-nyua lau, Maria Makdalena hintang Maria co bokon yoh tulak ika nyari kolowong cioh.

² Nongkocok oko gempa bumi co ngecat tului ico molekat Tuhan toka ingkan sorga paluh ngolinang batu tutup kolowong cioh. Molekat cioh tuot nyan tungkui batu cioh.

³ Are mancar isan jilap. Lembon eh bura lentah isan salju.

⁴ Kawan ponjaga kolowong cioh hororiki awi takut lau. Iroh jarin isan dulun matoi.

⁵ Tapi molekat mantun ma kawan bawe taiyoh, “Aroh takut! Tomonau-Kuh ikan nganyap Yesus co ocop tomohukum matoi nyan sompolaki

⁶ Are arelu oko nyan intoi. Are ocop bolum hopuli samah nain co ocop tomantun-Eh tumun aang. Haas, notoboh ika ontui-Eh tomandak yoh.

⁷ Makitu, jion tulak hia kawan murid-Eh. Mantun ma iroh bahawa Are ocop bolum hopuli ingkan pompatoi. Ngonehyoh! Are angar meleh houn hangki ikan hia propinsi Galilea. Ikan angar noto Are nyan idi. Porhatiboh borita cotuh co ocop tomorapot kuh ma ikan!”

⁸ Jion iroh tulak ingkan kolowong cioh. Ma nyaman akut tapi jorih jerah, iroh tongkoru ika mara borita cioh ma kawan murid Yesus.

⁹ Nongkocok Yesus nyopopak bawe duo iyoh. Hie-Eh, “Landah indamme!” Iroh ngoroni Are, nantot paai-Eh hintang nyembah Are.

¹⁰ Yesus mantun ma iroh, “Aroh takut. Tulak hintang maraeh ma kawan konduang-Kuh ina iroh tulak hia Galilea. Iroh angar noto Akuh nyan idi.”

Borita unih tintun kawan murid Yesus nako ontui-Eh 28:11-15

¹¹ Lambak bawe duo iyoh tulak, pira-pira dulun co monjaga kolowong yoh tulak hopuli hia kota Yerusalem. Iroh molapor ma kawan imam kopala kokon co ocop tojadi.

¹² Paluh, kawan imam kopala borunding ma kawan pomimpin bangsa Yahudi. Iroh monu koputusan ika mihi orong duit sogok hia kawan tontara taiyoh.

¹³ Iroh mantun ma kawan tontara taiyoh, “Ikan sobulih mantun bahawa kawan murid Yesus dombut nyan waktu homalom, paluh iroh nako ontui-Eh hiah waktu ikan rahat tirui.

¹⁴ Amun gubernur ngoneh tintun otuh, bahawa ontun Yesus tonako sopondehan ikan potontirui kaih angar hopander ma are ina arelu oko mosalah indam me.”

¹⁵ Iroh norima duit cioh paluh umpi nain co tonungon ma iroh. Dapot makitu, kesah unih cioh incah tosebar nyan halo dulun Yahudi.

Yesus nyoruhan kawan murid-Eh 28:16-20

¹⁶ Kosobalas murid Yesus tulak hia propinsi Galilea, hia ico lungkuh co ocop tomara Yesus ma iroh.

¹⁷ Hiah waktu iroh kito Yesus nyan idi, iroh sujut nyembah Are. Tapi oko nyan halo iroh co ragu-ragu.

¹⁸ Yesus ngoroni iroh hintang mantun, “Mohotara ocop mihi kuasa indang-Kuh ma kokon co nyan sorga hintang kokon co nyan dunia.

¹⁹ Poko tului iyoh, tulak bat hia kokon bangsa. Majarbat kawan dulun ina iroh jarin murid-Kuh. Mombaptis iroh ponah aran Mohotara Tama, Anak-Eh, hintang Roh Mohotara.

²⁰ Majarbat iroh ika nuhit kokon co ocop tomorentah-Kuh ma ikan. Porhatiyoh otuh: Akuh angar horoholuh somim me dapot ahir dunia tuh.”