Matius 27 - Alkitab Porjanjian Baa Ponah Bohasa Dayak Siang

Yesus tomehen hia Gubernur Pilatus ina tomongadili 27:1-2

¹ Ngonyua-nyua lau, kokon imam kopala hintang kawan pomimpin bangsa Yahudi umpi koputusan ina Yesus tomohukum matoi.

² Iroh mowot Are, mehen-Eh, paluh nyarah-Eh hia Pilatus, gubernur propinsi cioh.

Yudas ngompatoi arop eh 27:3-10

³ Yudas, iyohonon dulun co mohianat Yesus, are noto bahawa ocop oko koputusan ika mohukum matoi Yesus. Nyan waktu iyoh, Yudas moneser. Are nompuli tolum pulu kodilat duit perak cioh hia kawan imam kopala hintang kawan pomimpin bangsa Yahudi taiyoh.

⁴ Hieeh, “Akuh ocop bodosa mohianat dulun co aroko kosolaai dapot Are tomohukum matoi.” Tapi iroh museh, “Ome urusan kaih ma iyoh? Iyoh urusanmu tarop!”

⁵ Paluh, Yudas nyakah duit cioh hia ponah Lopo Mohotara, paluh tulak hintang ngompatoi arop hapo cara ngonyeret arop eh.

⁶ Kawan imam kopala monu duit cioh paluh mantun, “Duit cotuh duit daha. Poko tului iyoh, Hukum Torat ngosiit ito pokuntam eh nyan ponah kotak porsembahan.”

⁷ Jadi, iroh umpi koputusan ika duit cioh ina moli ico kobidang tana co tonisi Tana dulun co tukang nguan buong. Iroh umpi tana cioh jarin ika kolowong kawan dulun tomuoi.

⁸ Poko tului iroh hapo duit co ika bojuar Yesus, maka dapot nyan ondo cotuh tana cioh tonisi ‘Tana Daha’.

⁹ Ma isanioh, antun Nabi Yeremia nyan jaman sinan jarin nyata. Hieeh, “Iroh norima tolum pulu kodilat duit perak, iyohonon leka co tonatap pian kawan dulun Israel ika nyarah Are.

¹⁰ Hintang duit cioh iroh hapo ika moli tana dulun co tukang nguan buong, nain co tomorentah Tuhan ma akuh.”

Yesus nyan tohimo Gubernur Pilatus 27:11-26

¹¹ Paluh Yesus tomehen hia tohimo gubernur Pilatus. Gubernur cioh ngisok ma-Eh, “Mainboh Iko laca dulun Yahudi?” Useh Yesus, “Sanioh hiemmu.”

¹² Kawan imam kopala hintang kawan pomimpin bangsa Yahudi nondah Are. Tapi, nyan waktu iyoh, Are aroko museh sama sindo.

¹³ Paluh hien Pilatus ma-Eh, “Iko ocop ngoneh kokon tondah doh tohimo Iko. Kura Iko aroko ngilang arop-Mu?”

¹⁴ Tapi Yesus tenden aroko museh sama sindo. Tului iyoh, Pilatus jarin korinah hurong.

¹⁵ Nah, nyan sika ondo moraya Paskah, gubernur biasaeh pokusit ico beti ingkan seper, sosuai ma pilin dulun orong.

¹⁶ Nyan waktu iyoh oko ico nyan seper co botisi. Araieh Yesus Barabas.

¹⁷ Jadi, hiah waktu dulun orong ocop hokumpur, Pilatus ngisok ma iroh, “Comohboh co tonyau me akuh molapas indam me? Yesus Barabas atawa Yesus co tonisi ‘Kristus?’ ”

¹⁸ (Pilatus mantun sanioh tului are monau alasan kawan pomimpin Yahudi nyarah Yesus hiaeh, iyohonon atoi doh bosingon ma Yesus.)

¹⁹ Kotika Pilatus dahat tuot nyan korusi pongadilan, oruh eh pokatu tungon indaieh: “Aroh iko toakuakan porokara dulun bujur conon, awi tului Are akuh korinah mondorita ponah nupi momi nin.”

²⁰ Tapi kawan imam kopala hintang kawan pomimpin bangsa Yahudi mohasut dulun orong yoh ika nyawot ina Barabas tomombebas hintang Yesus tomohukm matoi.

²¹ Gubernur cioh mantun kole ma iroh, “Ingkan dulun duo onon, comohboh co tonyau me akuh molapas eh?” Hien doh, “Barabas!”

²² Hien Pilatus ma iroh, “Amun sanioh, ome co tonyau me akuh umpi ma Yesus co tonisi ‘Kristus?’ ” Iroh uras mantun muhat, “Mohukum matoi Are ma cara tonyompolaki!”

²³ Hien Pilatus, “Tapi kojahatan ome co ocop tongompiai-Eh?” Tapi iroh sasar muhat noriak, “Mohukum matoi Are ma cara tonyompolaki!”

²⁴ Kojekaieh Pilatus noto bahawa usahaeh ika mombebas Yesus aroko bohasir. Malah, dulun orong taiyoh ocop nyau umpi korusuhan. Jadi, are monu danum paluh munyah siluieh nyan tohimo dulun orong yoh. Hieeh, “Akuh aroko botanggung-jawab ma pompatoi Dulun cotuh! Onon urusan me!”

²⁵ Kokon dulun orong yoh museh, “Oluceh kaih hintang kawan anak kaih nangung hukuman tului pompatoi-Eh!”

²⁶ Paluh, Pilatus mombebas Barabas indan doh. Tapi nyuhu kawan projurit eh moncambuk Yesus hintang nyarah Are ina tomohukum matoi nyan sompolaki.

Kawan projurit polealea Yesus 27:27-31

²⁷ Opaiyoh kawan projurit Pilatus yoh mehen Yesus hia istana gubernur. Paluh kokon pasukan tontara hokumpur toliut Yesus.

²⁸ Paluh iroh molai polea-lea Are sobagai laca. Iroh nyoloko lembon-Eh paluh pohapo-Eh ma jubah warna ungu.

²⁹ Iroh maro somacam mahkota ingkan jakah hoduhi, paluh posungkop nyan kuhung-Eh. Iroh mandak doroh towu bawui nyan ponah silun kontoui-Eh, ina tokitan isan tuntu laca. Paluh, iroh bolutut nyan tohimo-Eh hintang pohulut-hulut Are. Hien doh, “Co tohormat Laca Dulun Yahudi!”

³⁰ Iroh ngiwoh-Eh hintang monu doroh towu bawui cioh paluh molantu kuhung-Eh.

³¹ Opah iroh pohulut-hulut Are, iroh mukoi jubah cioh paluh pohapoeh ma jubah-Eh leh. Opaiyoh iroh mehen Are hia luar ika tomohukum matoi nyan sompolaki

Yesus tonyompolaki 27:32-44

³² Hiah waktu iroh nyalan hia luar kota Yerusalem, iroh sopopak ma ico dulun ingkan kota Kirene. Co araieh Simon. Iroh momaksa are ika nyanon sompolaki Yesus.

³³ Opaiyoh iroh dapot nyan ico ika co araieh Golgota. Aran cioh co artieh ‘Ika Ongang’.

³⁴ Nyan intin, iroh mihi Yesus korih angur co bocampur ma poru. Tapi opah Are ngonyelek, Are aroko kolu ngorih eh.

³⁵ Iroh nyompolaki Are paluh moundi ika hobagi lembon-Eh.

³⁶ Opaiyoh iroh tuot nyan intin ika monjaga Are.

³⁷ Nyan hunyung kuhung-Eh tomatop tulisan. Tulisan cioh nisi alasan kura Are tomohukum, “Tuhboh Yesus, Laca Dulun Yahudi.”

³⁸ Iroh mahi nyompolaki duo dulun porampuk hontong ma Yesus, ico tonyompolaki topit kontoui-Eh hintang ico kole tonyompolaki nyan topit komuloi-Eh.

³⁹ Kawan dulun co nyihin nyan intin mohina Are hintang samir ngiling kuhung,

⁴⁰ hien doh, “Hei Iko co nyau morohop Lopo Mohotara paluh mangun eh hopuli ponah tolu ondo! Amun Iko bujur-bujur Anak Mohotara, nyolamatbat arop-Mu. Toka bat ingkan sompolaki conon!”

⁴¹ Sanioh ka kawan imam kopala, kawan guru Hukum Torat, hintang kawan pomimpin bangsa Yahudi. Iroh hopolea Yesus.

⁴² Hien doh, “Are nyolamat dongai, tapi Are aroko liai nyolamat arop-Eh tarop! Amun Are bujur-bujur Laca Dulun Israel, oluboh Are toka ingkan sompolaki conon! Amun Are lian nguan iyoh, punan kaih porocaya ma-Eh.

⁴³ Are porocaya ma Mohotara. Are piji mantun bahawa Are iyohco Anak Mohotara. Jadi, amun Mohotara bujur-bujur jorih ma Are, oluboh Mohotara dohop Are makitu!”

⁴⁴ Duo dulun porampuk co tonyompolaki nyan hoponyila Yesus, iroh mahi mohina Are nain iyoh ka.

Yesus matoi 27:45-56

⁴⁵ Nyan jam duo balas tohun ondo, ngolauh derah cioh jarin pindong dapot jam tolu macohit.

⁴⁶ Kira-kira jam tolu macohit, Yesus noriak ma suara muhat, “Eli, Eli, lama sabaktani?” Co artieh, “Mohotarang-Kuh, Mohotarang-Kuh, kura Iko naat Akuh?”

⁴⁷ Bopira dulun co tonjok nyan intin ngoneh iyoh aroko paham. Hien doh, “Are naah nabi Elia.”

⁴⁸ Ico ingkan iroh mancap tulak monu aranaang co hegah nosop danum. Are monculup eh ponah angur mosom paluh nongkuling eh nyan ujung doroh towu bawui. Paluh are nyoroeh hia baun Yesus ina tongorih-Eh.

⁴⁹ Tapi kawan dulun bokon mantun, “Aroh! Haas ito noto amun Elia dombut ika dohop Are.”

⁵⁰ Yesus mantun kole ma suara muhat, paluh nyarah tambung songai.

⁵¹ Hiah waktu cioh ka, horden nyan ponah Lopo Mohotara botosah jarin duo, ingkan hunyung dapot hia pinda. Oko gempa bumi hintang kawan loong batu bosila.

⁵² Kawan guha kolowong topukap paluh orong dulun ingkan umat Mohotara bolum hopuli ingkan pompatoi.

⁵³ (Opah Yesus bolum hopuli, iroh pusit ingkan kawan kolowong paluh muntam hia kota Yerusalem. Nyan intin orong dulun noto iroh.)

⁵⁴ Kopala pasukan hintang kawan projurit co monjaga Yesus noto gempa bumi hintang uras co tojadi yoh. Tului iyoh, iroh jarin takut lau. Hien doh, “Tuu, Dulun cotuh bujur-bujur Anak Mohotara!”

⁵⁵ Nyan intin oko ka pira-pira bawe co noto ingkan ocu. Iroh iyohco ngonulu Yesus ingkan propinsi Galilea ika molayan Are.

⁵⁶ Nyan halo iroh oko ka Maria Makdalena, Maria (tinan Yokobus doruo Yusup), hintang tinan rasul Yokobus doruo Yohanes, iyohonon duo anak Jebedeus.

Yesus tongolowong ponah guha 27:57-61

⁵⁷ Kotika jonyo mamalom, ico dulun tatou dombut. Araieh Yusup. Are ico murid Yesus co borasar ingkan kota Arimatea.

⁵⁸ Are tulak hia gubernur Pilatus paluh nyawot ijin amun are tokuhan are ngolowong ontun Yesus. Pilatus morentah ina ontun Yesus tomihi maeh.

⁵⁹ Jadi, Yusup monu ontun Yesus yoh, paluh mungkuh-Eh ma benang kaci.

⁶⁰ Are pokaling ontun Yesus nyan ponah kolowong co baa. Kolowong cioh tioh Yusup leh co tonguan eh nyan ponah lungkuh batu. Are ngolinang ico batu bahai nyan muka kolowong cioh ika nutup eh. Paluh, are tulak.

⁶¹ (Maria Makdalena hintang Maria co bokon yoh tuot nyan intin nohimo kolowong cioh.)

Kolowong Yesus tomonjaga 27:62-66

⁶² Manyuap ondoeh, iyohonon Ondo Sabat, kawan imam kopala hintang kawan pomimpin agama Yahudi ingkan kolompok Parisi, iroh tulak mohadap Pilatus.

⁶³ Hien doh, “Bapak, kaih mingkat waktu Yesus dulun co monyasat cioh incah bolum, Are piji mantun, bahawa Are angar bolum hopuli opah tolu ondo.

⁶⁴ Poko tului iyoh, nyuhuboh ina kolowong-Eh tomonjaga dapot ondo co kotolu. Amun aroh, mungkin kawan murid-Eh angar dombut ika nako ontui-Eh. Paluh, iroh angar monyasat rayat ma momborita, bahawa Are ocop bolum hopuli ingkan halo dulun matoi. Cara cioh iroh monyasat dulun angar meleh ceet hangki waktu kosulak Are monyasat dulun.”

⁶⁵ Hien Pilatus ma iroh, “Pioleh. Mehenleh kawan ponjaga tatuh. Jagabat kolowong cioh ma koketat.”

⁶⁶ Jadi iroh tulak hontong ma kawan ponjaga taiyoh ika monjaga kolowong Yesus. Iroh mahi nampek segel, ico ciri resmi nyan batu tutup eh ina tomonau amun oko dulun co ngisat tutup kolowong cioh.