Matius 26 - Alkitab Porjanjian Baa Ponah Bohasa Dayak Siang

Kawan pomimpin dulun Yahudi ngewak ika ngompatoi Yesus 26:1-5

¹ Opah Yesus umbot mantun kawan pongajaran taiyoh, Are mantun ma kawan murid-Eh.

² Hie-Eh, “Ikan monau bahawa duo ondo oni angar oko ondo moraya Paskah. Nyan waktu cioh, kawan dulun angar nawan Anak Kolunon. Iroh angar nyarah Are hia kawan dulun ina Are tomohukum matoi nyan sompolaki.”

³ Nyan waktu cioh ka, kawan imam kopala hintang kawan pomimpin dulun Yahudi hokumpur nyan istana Imam Kopala co poko bokuasa, co araieh Kayapas.

⁴ Iroh morunding kewak ina lian nawan Yesus ma cara tonih-tonih paluh ngompatoi Are.

⁵ Tapi iroh mantun, “Aroh ito nyuwah nawan Are nyan waktu kawan dulun moraya ondo Paskah, awi daai angar oko korusuh nyan halo rayat.”

Bawe co nitik minyak harum nyan tungkui kuhung Yesus ika mohormati Are 26:6-13

⁶ Kotika nyan kota Betania, Yesus oko nyan lopo Simon co batuh upak eh hoboro.

⁷ Hiah waktu iyoh, oko ico bawe dombut hia Yesus. Bawe cioh mehen ico polonyakan ingkan batu pualam co sangan minyak harum co darang. Hiah waktu Yesus dahat tuot kuman, bawe cioh nitik minyak cioh nyan tungkui kuhung Yesus ika mohormati Are.

⁸ Kotika kawan murid-Eh kito iyoh, iroh jarin bosopo. Hien doh, “Kura minyak harum conon tongosejeng kintu aih?

⁹ Minyak harum conon lian tobojuar ma leka co darang paluh duit eh tomihi indan kawan dulun mala!”

¹⁰ Tapi Yesus monau pikiran doh yoh. Hie-Eh ma iroh, “Aroh orong naim me ma bawe cotuh! Are umpi aranaang co pio indang-Kuh.

¹¹ Ikan horoholuh oko kosempatan ika umpi aang co pio indan kawan dulun mala awi iroh horoholuh oko nyan halo ikan. Tapi Akuh aroko angar horoholuh halo ikan.

¹² Ma nitik minyak harum conon nyan tungkui Kuh, sobujur eh bawe cotuh ocop nyiap beting-Kuh ika tongolowong.

¹³ Ngoneh ehyoh! Nyan ngolauh dunia, nyan omoh bewe Tarung Pio tomomborita, alogawin bawe cotuh angar tongesah ka dapot are aroko piji tonyolingo.”

Rasul Yudas umpi kewak ika nyarah Yesus hia kawan dulun co ngolawan-Eh 26:14-16

¹⁴ Opaiyoh, Yudas Iskariot, iyohonon ico ingkan duo balas rasul Yesus, are tulak hia kawan imam kopala.

¹⁵ Are mantun ma iroh, “Omeboh co angar ihim me indang kuh amun akuh nyarah Yesus ma ikan?” Maka iroh ngitung tolum pulu kodilat duit perak, paluh mihi duit cioh indaieh.

¹⁶ Ingkan hiah iyoh, Yudas molai nganyap kosempatan co pio ika nyarah Yesus ma iroh.

Yesus moraya ondo Paskah ma kawan murid-Eh 26:17-25

¹⁷ Ocop dapot waktueh ika molai porami Ondo Rute Aroko Bodagi. Jadi, nyan ondo kosulak poramian cioh, kawan murid Yesus dombut hia-Eh. Hien doh, “Nyan omohboh co tongonyere Mu kaih monyiap indam-Mu ika kuman moraya Paskah?”

¹⁸ Useh Yesus, “Muntam hia kota Yerusalem hia dulun cioh co tonyono to. Mantun maeh, ‘Bapa Guru oko tungon. Waktu indan Are jonyo dapot. Are nyau moraya Paskah nyan ponah lopomu homboh ma kawan murid-Eh.’ ”

¹⁹ Paluh, kawan murid Yesus nguan ome co tonyuhu-Eh ma iroh. Iroh tulak monyiap kanon taiyoh ika moraya Paskah.

²⁰ Hayak ondo ocop homalom, Yesus tuot kuman homboh-homboh ma duo balas murid-Eh.

²¹ Kotika iroh dahat kuman, Are mantun, “Porhatieh boh Akuh! Songkolang ico ingkan halo ikan angar nyarah Akuh hia kawan dulun co ngolawan Akuh.”

²² Aang cioh umpi atoi doh jorung lau. Iroh hopomasing mantun ma-Eh, “Mositi bokon akuh, yoh Tuhan?”

²³ Useh Yesus, “Dulun co nucom ruteeh nyan ponah mangkuk homboh Akuh, areboh co angar nyarah Akuh.

²⁴ Ocop tonulih ponah Surat Borasih bahawa Anak Kolunon angar tonyarah hia kawan dulun co ngolawan Are. Tapi Mohotara angar mohukum dulun co nguan iyoh. Meleh pio indan dulun cioh amun are aroko piji tonganak sama sindo!”

²⁵ Paluh, Yudas, iyohonon dulun co angar nyarah Yesus, are mantun, “Mositi bokon akuh, yoh Pa Guru?” Useh Yesus, “Saniohboh hiem mu.”

Acara kuman ika mingkat Yesus 26:26-29

²⁶ Kotika iroh dahat kuman, Yesus monu rute holuh mucap doa sukur. Are nyila rute cioh ma silui-Eh holuh mihieh hia kawan murid-Eh. Hie-Eh, “Monueh, kuman eh, otuhboh beting-Kuh.”

²⁷ Opah iyoh, Yesus monu cangkir angur. Are mucap doa sukur kole holuh mihi cangkir cioh hia iroh. Hie-Eh, “Kokom me, ngorih eh ingkan cangkir cotuh.

²⁸ Awi, otuhboh daha-Kuh co angar tonumbak indan orong dulun kotika Akuh diuh. Onon angar tojadi ina kawan dulun hegah tomongampun ingkan kawan dosan doh. Ononboh pojanjian Mohotara co tomonsah ma daha-Kuh.

²⁹ Tapi porhatiehboh otuh: Akuh aroko angar ngorih angur cotuh bat dapot Akuh ngorih angur co baa homboh-homboh ma ikan ponah Korojaan Tamang-Kuh.”

Yesus mantun bahawa Rasul Petrus angar nisi arop eh aroko nyono Are 26:30-35

³⁰ Paluh, Yesus hintang kawan murid-Eh monyanyi lagu koponara indan Mohotara. Opah iyoh, iroh tulak hia lungkuh Jaitun.

³¹ Nyan intin, Yesus mantun ma iroh, “Nyan momi cotuh ka, kokon ikan angar naat Akuh. Awi sobulih tojadi sosuai ma Antun Mohotara cotuh co tonulih ponah Surat Borasih: ‘Akuh angar ngompatoi gombala cioh, holuh pumpun dombaeh angar hobomisah.’

³² Tapi opah Mohotara umpi Akuh bolum hopuli, Akuh angar tulak nosoun ikan hia propinsi Galilea.”

³³ Petrus museh Yesus, “Mungkin kokon jolaha co bokon angar naat Iko, tapi akuh mositi aroh!”

³⁴ Tapi Yesus mantun maeh, “Ngoneh ehboh! Nyan momi cotuh ka iko angar mantun bahawa iko aroko mongaku nyono Akuh dapot hontolu kali sorinai piak nondu.”

³⁵ Hien Petrus ma-Eh, “Oluco akuh sobulih matoi homboh Iko, akuh aroko angar mantun isan iyoh.” Kokon murid co bokon mantun isanioh ka.

Yesus bodoa nyan kabun Getsemani 26:36-46

³⁶ Opaiyoh, Yesus hintang kawan murid-Eh dapot nyan ico ika co araieh Getsemani. Nyan intin, Are mantun ma iroh, “Ikan tuot nyan intoi, sopondehan Akuh tulak hia idi ika bodoa.”

³⁷ Are mehen Petrus hintang duo anak Jebedeus umba-Eh. Waktu iyoh, Yesus molai nongkomo jorung lau hintang golisah.

³⁸ Are mantun ma iroh, “Atoi-Kuh jorung lau, nyamaieh isan jere matoi. Ikan bolenteng nyan intoi hintang bojaga-jaga ma Akuh.”

³⁹ Opaiyoh, Yesus tulak meleh ocu isut. Are bolutut paluh bodoa. Hie-Eh, “Yoh Tamang-Kuh, amun boraoi, mombebas Akuh ingkan pondoritaan co sobulih tonongkomo-Kuh tuh. Tapi aroh monurut kojere-Kuh, molengkan monurut kojere Tamang-Kuh leh.”

⁴⁰ Opah iyoh, Are hopuli hia kawan murid-Eh yoh. Are noto iroh rahat potontirui. Hie-Eh ma Petrus, “Tonyata ico jam mahi aroko hegah ikan bojaga-jaga ma-Akuh!

⁴¹ Bojaga-jagaboh hintang bodoabat ina ikan aroh buah tingkoh. Mula atoi me nyau umpi aang co bujur tapi tobiat kolunon me hako.”

⁴² Opaiyoh, Yesus tulak bodoa indan kohonduoeh. Hie-Eh, “Yoh, Tamang-Kuh. Amun Akuh sobulih nongkomo pondoritaan cotuh, aroko boraoi tongule, maka nyolungboh sosuai ma kojere-Mu leh!”

⁴³ Opah iyoh, Yesus hopuli kole hia kawan murid-Eh. Are noto iroh rahat potontirui awi iroh korinah nundu.

⁴⁴ Yesus naat iroh paluh tulak bodoa indan co kohontolueh. Are bodoa kole ma doa co samah.

⁴⁵ Paluh, Are hopuli kole hia kawan murid-Eh. Hie-Eh, “Ikan incah tirui hintang sotorahat leh! Notobat, waktueh ocop dapot indan Anak Kolunon. Makitu Are angar tonyarah hia kawan dulun co bodosa.

⁴⁶ Monyunbat! Haas, dulun co nyarah Akuh ocop dombutbat.”

Yesus tonawan 26:47-56

⁴⁷ Lambak Yesus incah hopander, Yudas dombut. Are iyohco ico ingkan duo balas rasul. Homboh-homboh ma are, sorombongan dulun dombut ka mehen padang hintang polang. Iroh tonyuhu pian kawan imam kopala hintang kawan pomimpin bangsa Yahudi.

⁴⁸ (Nah, sorinaieh, Yudas yoh ocop umpi kewak ika nyarah Yesus hia rombongan co ngolawan Yesus yoh. Are mihi kode santuh ma iroh. Hieeh, “Dulun co tomarok kuh, ciohboh dulun eh. Nawan Are!”)

⁴⁹ Jadi, kotika rombongan eh dapot, Yudas lansung tulak hia Yesus. Hieeh, “Tabe, Pa Guru!” Paluh, Yudas marok Are.

⁵⁰ Hien Yesus, “Heh konduang, umpilehboh ome co jarin kewakmu” Jion rombongan cioh maju, nawan Yesus.

⁵¹ Ico beti co umba Yesus nyopet padang, lansung nyarang ico polayan Imam Kopala co poko bokuasa. Are moriwih tolingan polayan cioh dapot sompuleng.

⁵² Tapi Yesus mantun maeh, “Ngumpang padang conon hopuli hia ponah kumpang eh. Awi kokon dulun co hapo padang angar matoi pian padang ka.

⁵³ Kiramu Akuh aroko boraoi nyawot ma Tamang-Kuh, maka Are angar jion ngirim meleh hangki duo balas pasukan tontara molekat ika dohop Akuh?

⁵⁴ Tapi amun Akuh umpi iyoh, ome co tonulis nyan ponah Surat Borasih tintun Akuh aroko angar jarin nyata. Tulisan cioh mantun bahawa kokoieh sobulih tojadi isan co tojadi makitu tuh.”

⁵⁵ Hiah waktu iyoh, Yesus mantun ma dulun orong yoh, “Mambu Akuh tuh ponjahat, dapot ikan sobulih dombut mehen padang hintang polang ika nawan Akuh? Podahar, sika ondo Akuh tuot majar nyan polontaran Lopo Mohotara. Tapi waktu iyoh ikan aroko nawan Akuh.

⁵⁶ Tapi, kokoieh tuh tojadi ina antun tintun Akuh co tonulih kawan nabi jarin nyata.” Paluh kokon murid Yesus ngomuho arop hintang naat Are.

Yesus tomongadili Kolompok pomimpin agama Yahudi co poko bokuasa 26:57-68

⁵⁷ Nyan waktu iyoh, kawan guru Hukum Torat hintang kawan pomimpin bangsa Yahudi ocop hokumpur nyan lopo Kayapas, iyohonon Imam Kopala co poko bokuasa. Kawan dulun co nawan Yesus mehen-Eh hia lopo cioh.

⁵⁸ Petrus ngonulu Are ingkan ocu. Dapot hia lopo cioh, Petrus muntam hia polontaran paluh tuot halo ma kawan ponjaga, ina boraoi monau ome co angar tojadi ma Yesus.

⁵⁹ Kawan imam kopala hintang kokon Kolompok pomimpin agama Yahudi co poko bokuasa, iroh bousaha nganyap bukti ina Yesus lian tomohukum matoi. Jadi, iroh hokanyap kawan dulun co angar jarin saksi mantun unih ina ngolawan Yesus.

⁶⁰ Orong dulun maju, tapi kawan pomimpin taiyoh aroko bohasir haba bukti ome-ome. Tapi, ahir eh oko duo dulun co majuika bosaksi.

⁶¹ Hien doruo, “Dulun cotuh piji mantun bahawa Are lian nohop Lopo Mohotara paluh mangun eh hopuli ponah tolu ondo.”

⁶² Paluh Imam Kopala co poko bokuasa cioh tonjok. Hieeh ma Yesus, “Mainboh Iko aroko museh tondah conon co tonuju indam-Mu?”

⁶³ Tapi Yesus tonih leh. Paluh Imam Kopala cioh ngisok kole, “Demi Mohotara co bolum, mantun ehboh ma kaih. Mainboh Iko Laca Co Tomonjanji Mohotara co ito nisi ‘Mesias’? Main Iko Anak Mohotara?”

⁶⁴ Useh Yesus, “Sanioh hiem me. Tapi ngoneh ehlah otuh! Molai makitu, ikan angar noto Anak Kolunon, tuot nyan ika co tohormat topit kontoun Mohotara Co Poko Bokuasa. Ikan angar kito Are dombut ingkan sorga nyan tungkui kawan hawun nyan langit.”

⁶⁵ Ngoneh iyoh, Imam Kopala co poko bokuasa yoh nirat-nisah lembon eh. Hieeh ma kawan pomimpin co bokon nyan intin, “Are ocop mohina Mohotara! Aroko usah nganyap saksi ika mantun kosolaai-Eh! Ikan ocop ngoneh hie Are nyamah Arop eh ma Mohotara!

⁶⁶ Jadi, ome koputusan me?” Useh doh, “Are sobulih tomohukum matoi!”

⁶⁷ Paluh iroh ngiwoh tampa Yesus hintang nampar-Eh. Kawan dulun bokon paluh molantu Are.

⁶⁸ Hien doh, “Mombuktieh amun Iko bujur-bujur Laca Co Tomonjanji Mohotara co tonisi Mesias. Cuba nanguh, ome co molantu Iko?”

Rasul Petrus mantun are aroko mongaku nyono Yesus 26:69-75

⁶⁹ Ponehan iyoh, Petrus tuot nyan polontaran lopo cioh. Ico bawen polayan ngoroni are. Hien polayan cioh, “Iko mahi horoholuh homboh-homboh ma Yesus, dulun ingkan propinsi Galilea di!”

⁷⁰ Tapi Petrus aroko mongaku nyan tohimo kokon dulun. Hieeh, “Akuh aroko monau ome maksutmu!.”

⁷¹ Paluh, are tulak hia tungkang kuta polontaran cioh. Ico bawen polayan co bokon notoeh. Hien polayan cioh ma kawan dulun co oko nyan intin, “Dulun cotuh homboh-homboh ma Yesus, dulun ingkan desa Nazaret conon.”

⁷² Tapi Petrus aroko mongaku kole ma bosumpah. Hieeh, “Akuh tuu-tuu aroko nyono dulun conon!”

⁷³ Aroko tahi opaiyoh, kawan dulun co oko nyan intin ngoroni Petrus. Hien doh, “Mositi iko mahi iyohco ico ingkan iroh, kawan murid Yesus ingkan Galilea. Onon tonta ingkan logat mu.”

⁷⁴ Holuh Petrus bosumpah, olu Mohotara mohukum akuh amun ngoncunih. “Mositi akuh aroko nyono dulun cioh!” Hiah iyoh ka, manuk nondu.

⁷⁵ Paluh Petrus topingkat antun Yesus maeh, “Sorinai manuk nondu, iko angar nisi aroko mongaku nyono Akuh hontolu kali.” Opah iyoh, Petrus pusit ingkan polontaran lopo cioh, paluh nangih awi moneser lau.