Matius 22 - Alkitab Porjanjian Baa Ponah Bohasa Dayak Siang

Yesus nyamah kawan pomimpin dulun Yahudi ma dulun co kuloi hia undangan pesta kawin 22:1-14

¹ Paluh Yesus porapot tindung kole ma iroh.

² Hie-Eh, “Korojaan Sorga sompama kesah cotuh: Oko ico laca co umpi pesta kawin indan anak eh.

³ Laca cioh nyuhu kawan polayan eh ina mara kawan dulun co ocop tomundang hia pesta cioh. Tapi, kawan dulun taiyoh aroko kolu dombut.

⁴ Jadi, are nyuhu kawan polayan eh co bokon. Hieeh ma iroh, ‘Marabat ma kawan dulun co tomundang yoh bahawa kanon ocop siap. Kawan sapi hintang komolum kuh co monyak ocop tonyarak. Kokoieh ocop tonyodia. Haasboh dombut hia pesta kawin anakkuh tuh!’

⁵ Tapi kawan dulun co tomundang yoh tenden aroko mohirau. Oko co tulak hia umoieh. Oko co tulak murus usahaeh.

⁶ Molahan oko co bokon dapot nawan kawan polayan laca cioh. Iroh monyiksa hintang ngompatoi kawan polayan taiyoh.

⁷ Korinah angit laca cioh. Are nyuhu tontaraeh ika ngompatoi kawan dulun co ngompatoi kawan polayan eh. Are mahi nyuhu tontaraeh ika nyaha kota doh.

⁸ Opah iyoh, are mantun ma kawan polayan eh, ‘Pesta kawin ocop siap. Tapi kawan dulun co tomundang niin aroko layak.

⁹ Jadi tulakbat hia kawan simpang calan. Mundangbat kokon dulun co ikan popak nyan intin ina iroh dombut hia pesta kawin cotuh.’

¹⁰ Kawan polayan taiyoh tulak hia kawan calan hintang mundang kokon dulun co tonyopopak doh, iyohonon kawan dulun jahat atawa kawan dulun pio. Maka, laoh ika pesta kawin cioh ponu ma kawan tamu.

¹¹ Opaiyoh, laca cioh muntam hia laoh cioh ika nyopopak kawan tamu taiyoh. Kotika iyoh, are kito oko ico dulun co aroko hapo lembon co pantas indan pesta.

¹² Jadi, laca mantun maeh, ‘Oo Konduang, iko aroko hapo lembon pesta kawin, kura iko boraoi muntam hia intoi?’ Dulun cioh tonih leh.

¹³ Paluh, laca cioh mantun ma kawan polayan eh, ‘Mowot paan silun dulun cotuh. Nyakah are hia luar nyan ika co poko pindong. Kokon dulun nyan intin angar nangih hintang ngoritet kosing doh.’ ”

¹⁴ Paluh Yesus ngumbot tindung cioh ma antun, “Orong dulun co tonaah ika jarin warga Korojaan-Eh, tapi baya isut co tomili.”

Kawan pomimpin dulun Yahudi aroko haba monjebak Yesus 22:15-46 Kopongisok tintun nahur pajak hia pomorintah Romawi 22:15-22

¹⁵ Opaiyoh, kawan pomimpin agama Yahudi ingkan kolompok Parisi yoh tulakbat ingkan intin. Iroh umpi roncana ika monjebak Yesus ma kopongisok.

¹⁶ Jadi, iroh nyuhu kawan murid doh hintang kawan dulun co mondukung Laca Herodes tulak hia Yesus. Kawan dulun taiyoh mantun ma Yesus, “Pa Guru, kaih monau Iko dulun jujur. Iko majar ma kojujur tintun cara bolum sosuai ma porentah Mohotara. Iko aroko momihak kawan dulun totentu. Awi iyoh, Iko aroko takut ma ome bewe.

¹⁷ Monurut Iko, mainboh poraturan Mohotara co tonulih Musa ponah Hukum Torat kuhan ito nahur pajak ma Laca Roma atawa aroh?”

¹⁸ Tapi Yesus monau maksut doh co jahat yoh. Maka Are mantun, “Ikan pura-pura pio. Kura ikan nyau monjebak Akuh?

¹⁹ Cuba pototoeh ma-Akuh ico kodilat duit perak co hapam me ika nahur pajak!” Jadi, iroh mihi ico kodilat duit perak hia-Eh.

²⁰ Yesus ngisok ma iroh, “Gamar hintang aran omeboh tocetak inyaieh?”

²¹ Iroh museh, “Gamar hintang aran Laca Romawi co tonisi Kaisar.” “Amun sanioh,” hien Yesus, “Mihi Kaisar bat co jarin indan tioh. Mihibat indan Mohotara co jarin tioh Mohotara!”

²² Iroh hurong lau ngoneh useh Yesus yoh. Paluh, iroh tulak naat Yesus.

Kopongisok tintun bolum hopuli ingkan pompatoi 22:23-33

²³ Hiah ondo cioh ka, pira-pira pomimpin agama Yahudi ingkan kolompok dulun Saduki dombut hia Yesus. Dulun Saduki aroko porocaya dulun angar bolum hopuli opah matoi. Jadi, iroh nyuwah monjebak Yesus ma kopongisok tintun iyoh. Hien doh,

²⁴ “Pa Guru, Musa majar poraturan indan to. Poraturan eh nain otuh: Amun ico bakah matoi, aroko empun anak, maka konduang eh sobulih kawin ma sindah eh yoh ina mihi koturunan indan konduang eh co ocop matoi yoh.

²⁵ Nah, piji oko pitu dulun hokonduang nyan halo kaih. Konduang co pokongongko ngoruh ico bawe, tapi banai matoi sorinai oko anak. Jadi, are naat oruh eh yoh indan konduang eh.

²⁶ Konduang eh co koduo ngoruh balu cioh. Tapi, are mahi matoi sorinai oko anak. Sanioh ka tojadi ma konduang eh co kotolueh. Sanioh borait dapot konduang eh co kopitu.

²⁷ Kojekaieh, opah kokon konduang eh yoh matoi, bawe cioh matoi ka.

²⁸ Jadi, oko pitu dulun hokonduang kuhung co horuh ma bawe co samah. Amun bujur dulun lian bolum hopuli ingkan pompatoi, bawe cioh angar jarin oruh are comoh?”

²⁹ Useh Yesus ma iroh, “Ikan koliru lau awi ikan aroko paham Surat Borasih atawa kuasan Mohotara!

³⁰ Nyan waktu kawan dulun bolum hopuli, iroh aroko angar hanak horuh bat. Iroh angar bolum samah isan molekat nyan sorga.

³¹ Aang tintun kawan dulun bolum hopuli ingkan pompatoi oko nyan ponah Surat Borasih. Tapi, mositi ikan arinai paham iyoh. Mohotara mantun,

³² ‘Akuhleh Mohotaran Abraham, Ishak, hintang Yakup.’ Mohotara cioh bokon Mohotaran dulun matoi. Are Mohotaran dulun co bolum!”

³³ Kotika dulun orong ngoneh ponjelasan Yesus yoh, kagum lau iroh ma ajaran-Eh.

Kopongisok tintun porentah Mohotara co poko penting 22:34-40

³⁴ Kawan dulun Parisi ngoneh bahawa Yesus umpi kawan dulun Saduki yoh aroko bokutik. Tului iyoh iroh hokumpur.

³⁵ Ico guru Hukum Torat ingkan kolompok doh nyuwah monjebak Yesus ma kopongisok bokon. Hieeh,

³⁶ “Pa Guru, ingkan kokon porentah Mohotara ponah Hukum Torat, co omoh co poko penting?”

³⁷ Hien Yesus maeh, “‘Mongasihileh tuu-tuu Tuhan Mohotarammu ma kokuan tuu atoimu, ma kokuan tuu jiwamu, hintang ma kokuan tuu pikiranmu.’

³⁸ Porentah ciohboh co poko utama hintang co poko penting.

³⁹ Samah isan porentah cioh, oko porentah bokon co korinah penting, iyohonon: ‘Mongasihileh sosamah kolunon isan iko mongasihi aropmu leh.’

⁴⁰ Uras hukum agama co tomihi pian Musa hintang ajaran kawan nabi asar eh ingkan duo porentah cioh.”

Yesus, Laca Co Tomonjanji Mohotara, meleh bokuasa hangki budas koturunan Laca Daud bewe 22:41-46

⁴¹ Sopondehan kawan dulun Parisi taiyoh incah hokumpur nyan intin, Yesus ngisok ma iroh,

⁴² “Mikirbat tintun Laca Co Tomonjanji Mohotara co tonisi ka ‘Kristus’. Koturunan omeboh Are?” Useh doh, “Kristus iyohco koturunan ingkan Laca Daud.”

⁴³ “Amun sanioh,” hien Yesus, “kura Roh Mohotara umpi Daud naah ‘Kristus’ sobagai ‘Tuhan’? Otuhboh antun Daud:

⁴⁴ ‘Tuhan mantun ma Tuhankuh: Tuotbat nyan ika co tohormat nyan topit kontoung-Kuh, dapot Akuh pokalah kawan musuh-Mu, umpi iroh ibarat eh tohucak paam-Mu, umpi iroh tunduk ma kuasam-Mu.’

⁴⁵ Jadi, Daud nisi ‘Kristus’ sobagai ‘Tuhan’. Poko tului iyoh, mositi Kristus meleh bokuasa hangki koturunan Daud co tonganak tongobua.”

⁴⁶ Arelu oko dulun co lian naleh Yesus. Ingkan ondo cioh, arelu oko co bohanyi nyuwah monjebak Are ma kopongisok kole.