Matius 21 - Alkitab Porjanjian Baa Ponah Bohasa Dayak Siang

Yesus tonyambut rami lau nyan kota Yerusalem 21:1-11

¹ Kotika Yesus hintang kawan murid-Eh jonyo dapot Yerusalem, iroh tocak desa Betpage nyan beloi Lungkuh Jaitun. Yesus nyuhu duo murid-Eh tulak labih houn. Hie-Eh,

² “Tulakleh hia desa nyan muka non. Ikan ruo angar kito ico kontuluh koledai bawe hintang anak eh tonambitnyan johi nyan idi. Mukoi duo koledai cioh paluh mehen hia intoi.

³ Amun oko dulun co ngisok, ‘Kura ikan mukoi koledai duo onon?’ Mantun ma dulun cioh, ‘Tuhan morulueh. Tapi Are angar jion nompulieh.’ ”

⁴ Poristiwa cioh tojadi ina antun Mohotara jarin nyata isan co Hiah jaman sinan toporapot pian nabi, santuh naiieh:

⁵ “Mantun ebat ma kawan ponduduk nyan kota Yerusalem, ‘Porhatibatboh, Lacamu dahat dombut indamme! Are aroko pongasar. Are nungang ico kontuluh koledai, Ico kontuluh anak koledai co daja.’ ”

⁶ Murid duo iyoh tulak paluh nguan nain co tomantun Yesus ma iroh.

⁷ Iroh mehen koledai bawe cioh ma anak eh hia Yesus. Iroh mandak jubah doh nyan tungkui koledai cioh paluh Yesus cakat nyan tungkuieh.

⁸ Oko orong lau dulun co mampar kawan jubah doh nyan calan ika ngohurmat Are. Oko ka orong dulun co notok kawan pating paluh norataieh nyan calan.

⁹ Orong dulun nyalan nyan muka hintang nyan uwoi likut Yesus. Iroh ngororoho ma kojorih, “Hosana! Narabat Laca ingkan koturunan Daud! Narabat Are co dombut ponah aran Tuhan Mohotara! Koponara indai-Eh nyan ika co poko hunyung!”

¹⁰ Hiah waktu Yesus muntam Yerusalem, ngolauh kota jarin rami lau. Kawan dulun nyan kota yoh ngisok, “Omeboh dulun conon?”

¹¹ Kawan dulun co ngonulu Yesus museh, “Tuhboh Yesus, ico nabi ingkan Nasaret nyan propinsi Galilea.”

Yesus ngomuho kawan podagang ingkan polontaran Lopo Mohotara 21:12-17

¹² Paluh Yesus muntam hia polontaran Lopo Mohotara. Are ngomuho kokon dulun co hoborakang-bojuri nyan ika cioh. Are monjungkirbalik kawan meja co tohapan tukang nosuloi duit. Are ngolungkang kawan bangku co hapan kawan ponjuar bele merpati co ika porsembahan.

¹³ Hie-Eh ma iroh, nyan ponah Surat Borasih “Antun Mohotara tuh ocop tonulih: ‘Lopo-Kuh iyohco lopo ika bodoa.’ Tapi ikan umpieh isan guha porampuk!”

¹⁴ Paluh, orong dulun bobuto hintang dulun co lumpuh ehen dombut hia Yesus nyan polontaran Lopo Mohotara yoh. Are pomambuh iroh.

¹⁵ Tapi kawan imam kopala hintang kawan guru Hukum Torat kito aang co mosotahir yoh paluh jarin sangit. Iroh sangit ka tului oko kawan daja nyan polontaran Lopo Mohotara yoh ngororoho jorih ma Yesus, “Hosana! Narabat Laca ingkan koturunan Daud!”

¹⁶ Kawan imam kopala hintang kawan guru Hukum Torat taiyoh mantun ma Yesus, “Koneh-Mu pai ome co tomantun kawan daja tatuh?” Hien Yesus ma iroh, “Iyoh, Koneh-Kuh. Tapi arinai piji pai ikan mombaca antun cotuh nyan Surat Borasih?: ‘Iko ocop umpi ina kawan daja hintang kawan anak ua mahi mantun kawan koponara.’ ”

¹⁷ Paluh Are naat iroh. Are tulak hia luar kota Yerusalem hia desa Betania paluh hiloi nyan intin.

Yesus hotulut puun ara co aroko mua 21:18-22

¹⁸ Ngonyua-nyua nyuap ondoeh, Yesus hopuli hia kota Yerusalem. Ponah solanai, Are nongkomo dou.

¹⁹ Nyan saran calan, Are kito ico kobatang puun ara. Jadi, Are ngoroni puun ara cioh, tapi arelu oko buaeh. Baya oko kawan doui leh. Hie-Eh ma puun ara cioh, “Iko aroko angar piji mua bat.” Situ sini puun ara cioh jarin kojang.

²⁰ Hiah waktu kawan murid Yesus noto kojadian cioh, iroh potodangang. Hien doh, “Maindeoi bodai puun ara cioh lansung jarin kojang?”

²¹ Hien Yesus ma iroh, “Ngonehboh! Amun ikan porocaya hintang aroko ragu-ragu, maka ikan mahi boraoi umpi aang co mosotahir isan co tongompiang-Kuh ma puun ara conon, hintang aroko baya tikas onon leh. Sompamaeh ikan nyuhu puruk cotuh, ‘Topangkat paluh topende hia ponah laut!’ Maka aang cioh angar tojadi.

²² Kokon aranaang co tonyawot me ponah doa, asar ikan porocaya, ikan angar norimaeh.”

Kawan pomimpin dulun Yahudi ngisok ma angit tintun ome hak Yesus mantun sanioh 21:23-27

²³ Opaiyoh, Yesus muntam hia polontaran Lopo Mohotara paluh majar nyan intin. Hiah iyoh, kawan imam kopala hintang pomimpin bangsa Yahudi dombut hia-Eh. Hien doh, “Ome hak-Mu nguan kokon onon? Ome co mihi hak indam-Mu?”

²⁴ Hien Yesus ma iroh, “Akuh mahi angar ngisok ma ikan. Amun ikan mihi jawapan indang-Kuh, maka Akuh angar mantun ma ikan tintun ome co mihi hak indang-Kuh ika nguan kokon aang tatuh.

²⁵ Tuhboh kisok Kuh: Ome co mihi hak indan Yohanes ika mombaptis? Mohotara atawa kolunon?” Jadi, iroh morunding nganyap jawapan ma samah arop doh. Hien doh, “Amun ito mantun, ‘Mohotara co mihi hak cioh indan Yohanes’, Yesus angar ngisok ito, amun sanioh kura ikan aroko porocaya Yohanes?

²⁶ Tapi amun ito mantun: Ingkan kolunon, ito takut ma dulun orong, awi kokon dulun mongangap Yohanes yoh nabi.”

²⁷ Maka iroh mantun ma Yesus, “Kaih aroko monau ome co mihi hak cioh ma Yohanes.” Yesus mantun, “Amun sanioh, Akuh mahi aroko angar maraeh ma ikan ome co mihi hak indang-Kuh ika nguan kokoieh tuh.”

Yesus nyamah kawan pomimpin dulun Yahudi ma daja co aroko nguan kojere tamaieh 21:28-32

²⁸ Paluh Yesus mantun ma kawan imam kopala hintang kawan pomimpin bangsa Yahudi taiyoh, “Mikir eh tintun tindung cotuh: Oko ico tama co empun duo beti anak bakah. Tamaieh yoh tulak hia anak co portama paluh mantun, ‘Anakkuh, tulakbat bogawi nyan kabun angur ngonai tuh.’

²⁹ ‘Useh anak eh yoh, Aah mongkan akuh tuh.’ Tapi opaiyoh are loson paluh tulak bogawi nyan kabun angur cioh.

³⁰ Tamai yoh tulak hia anak co koduo paluh mantun aang co samah, nyuhu are tulak bogawi nyan kabun angur. Anak eh yoh museh, ‘Yoh, pa, akuh angar tulak.’ Tapi anak eh yoh aroko tulak.

^31-32 Nah, ingkan songkolang anak eh iyoh, comohboh co nguan kojere tamaieh?” Useh doh, “Co portama tongohia tamaieh.” Hien Yesus ma iroh, “Ngonehyoh! Ikan samah isan anak co aroko nontumun kojere tamaieh. Awi Yohanes Pombaptis dombut ika porahan ma ikan cara bolum co buah nyan tohimo Mohotara. Tapi ikan aroko porocaya are. Tapi kawan dulun co tomangap ‘bodosa’ isan kawan takih pajak hintang kawan bawen polacur, iroh porocaya ma Yohanes. Oluco ikan kito are tapi ikan aroko moneser hintang aroko porocaya ma are. Poko tului iyoh, kawan takih pajak hintang kawan bawen polacur angar meleh houn jarin anggota koluarga Korojaan Mohotara hangki ikan.”

Yesus nyamah kawan pomimpin dulun Yahudi ma kawan pongolola kabun angur co jahat 21:33-46

³³ “Ngonehyoh tindung co bokon cotuh: Oko ico dulun empun tana co umpi kabun angur. Are umpi pagar toliut eh, ngali luwang ika mohoh bua angur taiyoh, hintang tomangun ka monara jaga nyan kabun cioh. Opaiyoh, are nyuhu ngolola kabun cioh ma pira-pira dulun, paluh tulak hia negri bokon.

³⁴ Hiah waktu sorang mutoi angur taiyoh jonyo dapot, empun kabun cioh nyoruhan pira-pira polayan eh hia kawan dulun pongolola taiyoh ika monu hasir kabun co jarin hak tioh.

³⁵ Tapi kawan pongolola taiyoh nawan kawan polayan taiyoh. Co ico tomolantu doh, are ico kole tongompatoi doh, hintang ico co bokon kole tomedak doh are ma batu.

³⁶ Opaiyoh, empun kabun cioh nyoruhan kole kawan polayan co bokon, meleh orong hangki co kosulak. Tapi kawan pongolola taiyoh umpi iroh ma cara co samah.

³⁷ Kojekaieh, empun kabun cioh mantun ponah atoieh, ‘Mositi kawan pongolola taiyoh angar ngohurmat anakkuh.’ Maka are nyoruhan anak eh hia iroh.

³⁸ Tapi, kotika kawan pongolola taiyoh kito anak eh dahat dombut, iroh borunding samah arop doh, ‘are non daai co jarin empun kabun cotuh amun tamaieh ocop matoi. Ayu, ito ngompatoi are ina kabun cotuh jarin ito empuieh!’

³⁹ Jadi, iroh nawan eh, hobuhut hobehet are hia luar kabun angur cioh, paluh ngompatoieh.”

⁴⁰ Paluh Yesus ngisok ma kawan imam kopala hintang kawan pomimpin bangsa Yahudi taiyoh, “Hiah waktu empun kabun angur yoh dombut, ome co angar tongompiai ma kawan pongolola taiyoh?”

⁴¹ Hien doh ma Yesus, “Mositi are angar ngolumat kawan dulun jahat taiyoh. Paluh are angar nyuhu kawan dulun bokon co kolu mihi bagian hasir kabun indaieh tangar waktueh.”

⁴² Hien Yesus ma iroh, “Mositi ikan piji mombaca nyan Surat borasih tintun otuh: ‘Batu co tonongkuloi kawan tukang bangunan ocop jarin batu poko penting ika bangunan eh. Tuhan co nguan iyoh! Ico alogawi co bungah lau indan to.’ ”

⁴³ Paluh Yesus mantun, “Jadi, ngonehbatlah otuh: hak me ika jarin anggota Korojaan Mohotara angar tomonu ingkan ikan. Hak cioh angar tomihi hia bangsa co angar nguan kojere Mohotara. [

⁴⁴ Batu cioh angar mohancur sika dulun co tahak nyan tungkuieh, hintang remuk sika dulun co tonyatueh.]”

⁴⁵ Kotika kawan imam kopala hintang kawan pomimpin dulun Parisi ngoneh kawan tindung Yesus, iroh paham bahawa irohboh co tomaksut-Eh.

⁴⁶ Jadi iroh nganyap cara ika nawan Are. Tapi aroko bohanyi, awi iroh takut ma dulun orong co mongangap Yesus yoh nabi.