Matius 20 - Alkitab Porjanjian Baa Ponah Bohasa Dayak Siang

Tindung tintun kawan dulun co bogawi nyan kabun angur 20:1-16

¹ Yesus ngoholuh pomander, “Korojaan Sorga samah isan kesah cotuh. Oko ico dulun co empun ico kabun angur. Ngonyua-nyua lau, are tulak nganyap pira-pira beti ika bogawi nyan kabun angur eh yoh.

² Opah are sopakat nahur iroh ico kodilat duit perak indan gawi ico ondo, isan tombah co biasa, paluh are nyuhu iroh tulak bogawi nyan kabun eh yoh.

³ Sokitar jam suoi manyuap, are tulak kole hintang kitai nyan pasar oko kawan dulun bokon co dahat ngangur.

⁴ Maka hieeh ma iroh, ‘Ikan mahi tulak bat bogawi nyan kabun angur kuh. Akuh angar nahur ikan ma tombah co pantas.’ Jadi, iroh mahi tulak bogawi nyan kabun eh.

⁵ Sokitar jam duo balas maondo, tempun kabun cioh tulak kole ngohaba kawan dulun ika bogawi nyan kabun eh. Sokitar jam tolu macohit are umpi aang co samah.

⁶ Sokitar jam limo macohit, are tulak kole, sopopak kawan dulun co incah ngangur. Hieeh ma iroh, ‘Kura ikan ngangur?’

⁷ Hien doh maeh, ‘Awi aroko dulun co nombah kaih.’ Hieeh ma iroh, ‘Ikan tulak bat bogawi nyan kabun angur kuh.’

⁸ Kotika ondo ocop pindong, are mantun ma mandur eh. Hieeh, ‘Naahbat kokon dulun co bogawi indang kuh ngondai cotuh. Nahur tombah doh hopomasing, molai ingkan iroh co dombut pokongaan dapot ma iroh co dombut pokosulak eh’.

⁹ Jadi, dombutbat iroh co punan molai bogawi sokitar jam limo macohit. Iroh norima tombah hopomasing ico kodilat duit perak.

¹⁰ Opah iroh co portama dombut kito iyoh, iroh bopikir bahawa iroh angar norima tombah meleh orong awi iroh bogawi ingkan manyuap ondoeh. Tapi iroh mahi norima tombah hopomasing ico kodilat duit perak ka.

¹¹ Jadi, opah iroh norimaeh, iroh ngumer ma empun kabun cioh.

¹² Hien doh, ‘Iroh co dombut torahir tuh baya bogawi ico jam leh. Kaih ocop bogawi ngecat tungkas ngondai minda mai. Tapi iko nahur iroh ma tombah co samah ma kaih!’

¹³ Tapi empun kabun cioh museh ico ingkan iroh yoh. Hieeh, ndoh ‘Konduang, akuh aroko umpi aang co kurang sucing ma iko! Indoi, maka kite ocop sopakat bahawa iko angar norima ico kodilat duit perak indan gawi ico ondo?

¹⁴ Jadi, makitu bulibat mehen tombah mu non. Akuh nyau mihi tombah indan dulun co dombut torahir tatuh samah isan akuh mihi indammu.

¹⁵ Mainboh akuh aroko boraoi bebas hapo kokon co akuh empui monurut kojere atoi kuh? Mainboh bosingon atoimu awi akuh mohian songa ma dulun bokon?’ ”

¹⁶ Isanioh boh “Oko orong dulun co tomangap ‘tontiput’ makitu, tapi daai Mohotara angar umpi iroh ‘pokosulak’. Oko ka orong dulun co tomangap ‘pokosulak’ makitu, tapi daai Mohotara angar umpi iroh ‘tontiput.’ ”

Indan kohontolu kalieh, Yesus mara tintun pondoritaan co angar buah Are 20:17-19

¹⁷ Hiah waktu Yesus nuntuh kota Yerusalem, nyan oang calan Are naah duo balas murid-Eh ina hokumpur nyan ika co tontarop ma Are. Paluh Are mantun ma iroh,

¹⁸ “Ito dahat nuntuh kota Yerusalem. Nyan idi, Anak Kolunon, angar tonyarah hia kawan imam kopala hintang kawan guru Hukum Torat. Iroh angar umpi koputusan bahawa Are sobulih tomohukum matoi.

¹⁹ Paluh iroh angar nyarah Are hia kawan dulun co bokon ma Yahudi ina Are topolea-lea, tomoncambuk paluh tongompatoi nyan sompolaki. Tapi nyan ondo kotolu, Mohotara angar umpi Are bolum hopuli.”

Kawan murid Yesus sobulih morandah arop 20:20-28

²⁰ Opah iyoh, oruh Jebedeus homboh ma kawan anak eh Yokobus doruo Yohanes dombut hia Yesus. Nyan tohimo Yesus, are nukup bolutut ika nyawot aranaang.

²¹ Hien Yesus, “Ome co tonyau mu ne?” Tinan doruo museh, “Akuh nyau ina Iko mihi kodudukan tinggi indan duo anakkuh tuh ponah Korojaan-Mu, iyohonon ico tuot nyan topit kontoum-Mu, hintang ico kole nyan topit komuloi-Mu.”

²² Tapi Yesus museh iroh. Hie-Eh, “Ikan aroko monau ome co tonyawot me. Mainboh ikan sangup mondorita samah isan Akuh?” Hien doh ma-Eh, “Iyoh, karo sangup.”

²³ Hien Yesus ma iroh, “Mula bujur. Ikan ruo angar mondorita samah isan Akuh. Tapi Akuh aroh bohak nantu ome co angar tuot momorintah nyan topit kontoung-Kuh atawa nyan topit komuloi-Kuh. Kodudukan tinggi cioh tonyodia indan kawan dulun co ocop tonantu pian Tamang-Kuh.”

²⁴ Kosopuluh murid co bokon ngoneh sawot Yokobus doruo Yohanes yoh. Jadi, iroh jarin sangit ma konduang duo iyoh.

²⁵ Tapi Yesus naah kokon doh. Hie-Eh, “Oko kawan pomimpin bangsa co aroko nyono Mohotara nyan dunia tuh. Ikan monau bahawa iroh herak dangas ma rayat. Kawan dulun co bokuasa momaksa rayat ina tunduk ma kuasan doh.

²⁶ Tapi, ikan aroko boraoi isanioh! Malah, dulun co nyau jarin poko penting nyan halo ikan, are sobulih jarin polayan me.

²⁷ Dulun co nyau jarin pomimpin nyan halo ikan, are sobulih jarin jungus me.

²⁸ Samah isan Anak Kolunon cioh ka; Are dombut aroh ika tomolayani, tapi ika molayani, kawun nyarah arop-Eh dapot matoi ika polampas hintang nangung dosan kokon dulun.”

Yesus pomambuh duo dulun bobuto 20:29-34

²⁹ Kotika iroh naat kota Yeriko, orong dulun ngonulu Yesus.

³⁰ Oko duo dulun bobuto co tuot nyan saran calan. Iroh ngoneh bahawa Yesus dahat nyihin. Jadi, iroh mantun muhat, “Tuhan, Laca ingkan koturunan Daud! Dohop kaih!”

³¹ Dulun orong taiyoh nopoh iroh ruo ina doh tonih. Tapi iroh noriak meleh muhat kole, “Tuhan, Laca ingkan koturunan Daud! Dohop kaih!”

³² Yesus tondo paluh naah iroh. Hie-Eh, “Ome co tonyau me Akuh umpi indam me?”

³³ Useh doh, “Tuhan, kaih jere boraoi noto.”

³⁴ Yesus nongkomo masi ma iroh paluh ngoncamak matan doh. Hanyih iyoh ka iroh lian noto. Paluh iroh ngonulu Yesus.