Matius 19 - Alkitab Porjanjian Baa Ponah Bohasa Dayak Siang

Ajaran Yesus tintun hanak horuh 19:1-12

¹ Opah Yesus umbot mantun kokon taiyoh, Are naat propinsi Galilea paluh tulak hia derah Yudea nyan pohoi sungoi Yordan.

² Orong dulun ngunulu are. Are pomambuh kawan dulun hotoro nyan halo iroh nyan intin.

³ Paluh, oko pira-pira pomimpin agama Yahudi ingkan kolompok Parisi, iroh dombut hia Yesus ika monjebak Are. Hien doh, “Monurut porentah hintang poraturan Mohotara ponah Hukum Agama Yahudi, mainboh bakah kuhan misahdarai oruh eh ma alasan ome bewe?”

⁴ Useh Yesus, “Mositi ikan ocop mombaca nyan Surat Borasih. Ingkan kosulak, Mohotara nampa kolunon, iyohonon bakah hintang bawe.

⁵ Paluh Are mantun kole Antun Mohotara, ‘Iyoh tuluieh Akuh nampa iroh socara boposangan, Maka bakah angar naat tinan-tamaieh paluh hico ma oruh eh. Tului iyoh iroh ruo jarin ico.’

⁶ Jadi, iroh aroh bat duo beti, tapi Mohotara mongangap iroh ico. Awi tului iroh ocop tongonyarin ico pian Mohotara, maka iroh aroh kuhan tomisahdarai pian kolunon.”

⁷ Tapi kawan dulun Parisi taiyoh ngisok. Hien doh, “Amun ito aroko kuhan pisahdarai, kura hiah jaman sinan Musa mihi porentah cotuh: Sika bakah co misahdarai oruh eh sobulih mihi surat pisah indaieh?”

⁸ Hien Yesus ma iroh, “Musa kuhan bakah misahdarai oruh eh awi komakeng atoi doh samah isan ikan. Tapi onon bokon roncana Mohotara ingkan kosulak Mohotara nampa kolunon.

⁹ Jadi porhati ehlah otuh: Bakah baya kuhan misahdarai oruh eh amun oruh eh hokoruh ma bakah co bokon ma banaieh co sah. Amun bakah misahdarai oruh eh ma alasan bokon ma onon, paluh ngoruh bawe bokon, borati bakah cioh hokoruh ma bawe co bokon oruh eh co sah.”

¹⁰ Opah iyoh, kawan murid Yesus mantun ma-Eh, “Amun dulun hanak horuh aroko kuhan pisahdarai, borati meleh pio amun aroko kawin.”

¹¹ Tapi Yesus mantun ma iroh, “Aroko kokon dulun paham antun cotuh. Baya kawan dulun co ocop tomihi pomahaman pian Mohotara.

¹² Awi, oko dulun co tonganak aroko lian ngoruh. Oko ka dulun co aroko lian ngoruh awi tongompian isan iyoh tului dongai. Oko ka dulun co mili tarop ika aroko ngoruh ina boraoi molayani husus indan Korojaan Sorga. Kawan dulun co lian paham antun conon, kojerebat iroh paham.”

Yesus mantun aang co pio hinut indan kawan daja 19:13-15

¹³ Oko kawan dulun mehen kawan daja kolik dombut hia Yesus ina Are ngoncamak iroh, paluh mondoa iroh. Tapi, kawan murid-Eh nyangit kawan dulun co mehen kawan daja taiyoh.

¹⁴ Tapi Yesus mantun, “Oluehboh kawan daja dombut hia-Akuh! Aroh ngosiit iroh. Awi kawan dulun co isan anak daja tatuh boh iyohco anggota koluarga Korojaan Sorga.”

¹⁵ Paluh Yesus mandak silui-Eh nyan tungkui iroh hintang mantun aang co pio hinut indan doh. Opah iyoh, Are tulak ingkan intin.

Dulun tatou hintang kobolum co sokotahi-tahieh nyan sorga 19:16-30

¹⁶ Oko ico bakah lehoi dombut hia Yesus. Hieeh, “Pa Guru, alogawi pio ome co sobulih tongompiangkuh ina haba kobolum sumong kototahieh nyan sorga?”

¹⁷ Hien Yesus, “kura iko ngisok ma-Akuh tintun ome co pio? Awi, baya Mohotara co pio. Amun iko jere haba kobolum sokotahi-tahieh nyan sorga maka iko sobulih tuhit ma kawan porentah Mohotara.”

¹⁸ Dulun cioh ngisok, “Kawan porentah Mohotara co comoh?” Useh Yesus, “Aroh ngompatoi, aroh hokoruh ma bawe co bokon ma oruh co sah, aroh nako, aroh bosaksi potampa dulun,

¹⁹ ngohormatieh tinan tamammu, hintang mongasihi sosamah mu samah isan iko mongasihi aropmu leh.”

²⁰ Hien bakah lehoi cioh ma-Eh, “Akuh ocop tuhit ma kokon porentah tanon. Ome kole co incah kurang?”

²¹ Hien Yesus maeh, “Amun iko jere tuhit ma Mohotara ma kosomporaka, bulibat, borakang kokon aang co iko empui. Paluh mombagi-bagi duit eh hia kawan dulun mala. Ma isanioh, iko angar ngohaba koponatou nyan sorga. Opah iko nguan kokon onon, dombutbat hia intoi, paluh umba Akuh bat.”

²² Ngoneh porentah Yesus yoh, are jarin mias kocewa, awi are korinah tatou. Are aroko kolu borakang kokon hartaeh.

²³ Yesus mantun ma kawan murid-Eh, “Ngoneh ehlah otuh: Moho lau indan dulun tatou jarin anggota koluarga Korojaan Sorga.

²⁴ Sindo oni Akuh mantun ma ikan, meleh sutir kontuluh unta muntam buah luwang doih hangki dulun tatou muntam hia ponah Korojaan Mohotara.”

²⁵ Kotika kawan murid-Eh ngoneh iyoh, korinah kohurong doh. Hien doh, “Wah, amun sanioh, ome co lian tonyolamat?”

²⁶ Yesus nolangon iroh paluh mantun, “Mula aroko bodai kolunon nguan onon. Tapi, Mohotara lian nguan kokon aranaang.”

²⁷ Paluh Petrus mantun ma Yesus, “Kaih ocop naat kokon aang co kaih empui ina umba Iko hintang jarin kawan murid-Mu. Jadi ome co angar tongohababat?”

²⁸ Hien Yesus ma iroh, “Ngonehboh otuh: Hiah waktu Mohotara umpi kokon aranaang jarin baa, Anak Kolunon angar tuot nyan tungkui korusi co istimewa. Ikan kawan murid-Kuh mahi angar tuot nyan tungkui duo balas korusi ponguasa. Ikan angar mohakimi duo balas suku bangsa Israel.

²⁹ Hintang sika dulun co ocop naat lopoeh, konduang eh bakah bawe, tinan tamaieh, kawan anak eh, atawa umoieh. Uras dulun co ocop naat kokon onon tului porocaya ma-Akuh, iroh angar ngohaba hopuli ingkan Mohotara solatuh kali lipet. Iroh mahi angar ngohaba kobolum sokotahi-tahieh nyan sorga.

³⁰ Tapi orong dulun co tomangap ‘pokosulak’ makitu, tapi daai Mohotara angar umpi iroh ‘tontiput’. Orong dulun co tomangap ‘tontiput’ makitu, tapi daai Mohotara angar umpi iroh ‘pokosulak.’ ”