Matius 17 - Alkitab Porjanjian Baa Ponah Bohasa Dayak Siang

Pira-pira murid kito tampa Yesus bocohaya 17:1-13

¹ Onom ondo opah iyoh, Yesus nukat ico puruk co hunyung. Are baya mehen Petrus, Yokobus hintang Yohanes konduang Yokobus ina iroh narop arop doh nyan idi.

² Paluh nyan tohimo iroh tampa Yesus berubah. Tampa-Eh mancar isan matanondo. Lembon-Eh jarin bura molet-montin.

³ Nongkocok tolu murid-Eh yoh kito nabi Musa hintang nabi Elia oko nyan intin, dahat hopander ma Yesus.

⁴ Hien Petrus ma Yesus, “Tuhan, pio lau ito nyan intoi. Amun Iko kolu, olu akuh umpi tolu kemah nyan intoi, ico indam-Mu, ico indan nabi Musa, ico indan nabi Elia.”

⁵ Sopondehan are mantun iyoh, nongkocok oko hawun co pandau toka nutup iroh hintang Mohotara mantun ingkan ponah hawun cioh, “Cotuhboh Anak-Kuh co tongasih-Kuh. Are ngonyorih atoi-Kuh. Ngoneh ehleh Are!”

⁶ Ngoneh suara cioh, kawan murid-Eh jarin takut lau dapot nukup bolutut ma tampa dapot tana.

⁷ Tapi Yesus dombut paluh nongkowet iroh. Hie-Eh, “Tonjokbat! Aroh takut!”

⁸ Kotika iroh nangak kuhung, iroh arelu kito ome-ome bat. Baya Yesus tarop.

⁹ Waktu iroh nosuloh ingkan puruk cioh, Yesus poringat iroh. Hie-Eh “Aroh mara ma ome bewe ome co kitam me nin sorinai Anak Kolunon bolum hopuli ingkan pompatoi.”

¹⁰ Opaiyoh kawan murid-Eh ngisok ma-Eh, “Kura kawan guru agama Yahudi mantun bahawa nabi Elia sobulih meleh houn dombut?”

¹¹ Useh Yesus, “Mula aang cioh ocop tonulih ponah Surat Borasih. Nabi Elia angar dombut houn momposiap kokon aranaang.

¹² Tapi ngoneh otuh: nabi Elia ocop dombut. Tapi kawan dulun aroko sadar bahawa are iyohco nabi cioh, hintang iroh umpi aang co jahat ma are sokohandak atoi doh leh. Sanioh ka iroh angar umpi Anak Kolunon mondorita.”

¹³ Nyan waktu onon paham bat kawan murid Yesus bahawa Are bopander tintun Yohanes Pombaptis.

Yesus ngomuho roh jahat ingkan ico daja 17:14-21

¹⁴ Opaiyoh, Yesus hintang kawan murid-Eh hopuli mahah dulun orong yoh. Kotika cioh, dombut ico bakah, nukup bolutut nyan muka Yesus.

¹⁵ Hieeh, “Tuhan, masieh boh anak kuh. Are korinah mondorita awi hotoro molingko bulo. Are derek nahak nyan apui hintang derek nahak nyan danum.

¹⁶ Akuh ocop mehen are hia kawan murid-Mu, tapi iroh aroko lian pomambuh are.”

¹⁷ Paluh, Yesus mantun, “Mula polangar ikan nyan jaman cotuh aroko porocaya hintang sasat! Dapot makitu ikan arinai porocaya!” Paluh Yesus mantun ma taman daja cioh, “Mehen anakmu non hia intoi.”

¹⁸ Yesus momorintah roh jahat co umpi daja cioh hotoro ina pusit ingkan are. Jadi, pusitbat roh jahat cioh. Hanyih iyoh ka, daja cioh mambuh.

¹⁹ Opaiyoh, waktu kawan murid Yesus tarop halo Are, iroh dombut paluh ngisok, “Kura kaih aroko hegah ngomuho roh jahat cioh?”

²⁰ Yesus mantun ma iroh, “ikan aroko hegah ngomuho roh jahat cioh awi ikan kurang porocaya. Ngoneh ehlah otuh: Amun koporocayaan me kahan luang sawi, sompamaeh ikan nyuhu puruk cotuh, ‘Pindahbat hia idi!’ Maka puruk cotuh angar pindah. Amun ikan porocaya isan iyoh, aroko angar oko aranaang co aroko hegah me umpi. [

²¹ Tapi roh jahat co macam iyoh niin baya lian tongomuho ma bodoa hintang puasa.]”

Indan kohonduo kali, Yesus mara tintun pondoritaan co angar buah Are 17:22-23

²² Hiah waktu Yesus hintang kawan murid-Eh hokumpur nyan propinsi Galilea, Yesus mantun ma iroh, “Aroko tahi oni Anak Kolunon angar tonyarah hia kuasan kolunon

²³ Iroh angar ngompatoi Are, tapi Mohotara angar umpi Are bolum hopuli nyan ondo kotolu.” Maka, atoi kawan murid-Eh jarin jorung lau.

Yesus nahur pajak indan Lopo Mohotara 17:24-27

²⁴ Kotika Yesus hintang kawan murid-Eh dapot nyan kota Kapernaum. Nyan idi, oko kawan takih pajak co ngumpur duo kodilat duit perak indan Lopo Mohotara. Iroh dombut hia Petrus paluh mantun, “Mainboh gurumu umba poraturan ika nahur pajak Lopo Mohotara?”

²⁵ Useh Petrus, “Iyoh, Are mula nahur pajak cioh.” Kotika Petrus buli hintang muntam ponah lopo, sorinai are kojuan mander tintun onon ma Yesus, Yesus ngisok ma are houn. Hie-Eh, “Simon Petrus, monurut iko, kawan laca dunia tuh nakih pajak ingkan dulun ome? Ingkan rayat eh leh atawa ingkan dulun warga nogara bokon?”

²⁶ Useh Petrus, “Mositi ingkan dulun warga negara bokon!” Jadi Yesus mantun maeh, “Onon borati rayat aroko wajib nahur pajak taiyoh.

²⁷ Tapi arohboh ito monyingung kawan takih pajak tanon. Jadi, Tulakbat hia danau ika mosi. Waktu iko haba ocin co portama, moak baun ocin cioh. Iko angar popak ico kodilat duit perak co cukup indan duo dulun nahur pajak cioh. Mihibat duit cioh hia iroh ika nahur pajak kite.”