Matius 14 - Alkitab Porjanjian Baa Ponah Bohasa Dayak Siang

Yohanes Pombaptis tongompatoi 14:1-12

¹ Nyan waktu cioh, Herodes iyohco gubernur derah Galilea. Are ngoneh kawan borita tintun Yesus.

² Jadi, are mantun ma kawan pojabat-eh, “Mositi otuh Yohanes Pombaptis co ocop bolum hopuli! Onon tuluieh Are oko kuasai ika nguan aang co mosotahir.”

^3-4 Soun ma onon Herodes horuh ma Herodias, oluco batuh Herodias non iyohco oruh Pilipus konduang Herodes. Jadi, Yohanes piji nopoh Herodes. Hieeh, “Iko aroko boraoi horuh ma Herodias!” Poko tului iyoh, Herodes nyuhu ika Yohanes tonawan, tomowot ma rantai paluh tomokuntam hia ponah seper.

⁵ Sobujur eh Herodes jere ngompatoi Yohanes, tapi are takut ma kawan dulun, awi iroh mongangap Yohanes nabi.

⁶ Tapi hiah ondo ulang tahun Herodes, anak bawe Herodias ngarang nyan muka kokon dulun co oko nyan pesta cioh. Karang eh yoh korinah ngonyorih atoi Herodes,

⁷ dapot Herodes bojanji hintang bosumpah ma bawe lehoi cioh, are angar mihi ome bewe co tonyawot eh.

⁸ Bawe lehoi cioh tongajuk pian tinaieh, Herodias. Jadi bawe lehoi cioh mantun, “Akuh nyawot ina kuhung Yohanes Pombaptis tomungkong, tomandak nyan ponah apar paluh tomehen hia intoi!”

⁹ Ngoneh iyoh, Herodes jarin jorung. Tapi are ocop bojanji hintang bosumpah nyan muka kokon tamueh. Awi iyoh, are morentah ina sawot bawe lehoi cioh tomolalus.

¹⁰ Are nyuhu ina kuhung Yohanes tomungkong nyan seper.

¹¹ Paluh kuhung eh tomehen nyan ponah apar holuh tomihi indan bawe lehoi cioh. Bawe lehoi cioh mehen eh hia tinaieh.

¹² Opah iyoh, kawan murid Yohanes Pombaptis monu ontun Yohanes ingkan seper paluh ngolowong eh. Opah iyoh, iroh tulak mahah Yesus paluh mara ome co ocop tojadi.

Yesus nguan aang co mosotahir mihi kanon indan limo ribu beti 14:13-21

¹³ Waktu Yesus ngoneh borita cioh, Are cakat jukung tarop hintang naat ika cioh, ika tulak mahah ico ika co ngolohiui. Tapi kotika kawan dulun ngoneh tintun aang cioh, iroh naat kawan kota doh hintang tulak ngonulu Yesus buah calan tana.

¹⁴ Waktu Yesus toka ingkan jukung, kitai orong lau dulun nyan intin. Jadi, Are nongkomo masi ma iroh paluh pomambuh kawan dulun co hotoro nyan halo iroh.

¹⁵ Kotika ondo molai ulailo, kawan murid Yesus mahah Are. Hien doh, “Ondo molai ulailo hintang ika cotuh ocu ma ika dulun. Jadi, nyuhu boh dulun orong tuh tulak ika iroh lian moli kanon nyan kawan lowu co dokin intoi.”

¹⁶ Tapi Yesus mantun ma iroh, “Dulun orong tuh aroko usah tulak. Ikan leh boh co mihi kanon doh!”

¹⁷ Useh doh, “Kaih baya oko limo kodilat rute hintang duo kontuluh ocin.”

¹⁸ “Mehen onon hia intoi,” hien Yesus.

¹⁹ Paluh Are nyuhu dulun orong yoh tuot nyan tungkui uru. Opaiyoh, Yesus monu limo rute hintang duo ocin yoh, nolangon hia langit, mucap torima kasih ma Mohotara. Paluh Are hosila rute taiyoh, mihieh hia kawan murid-Eh ina tomagi-magi hia dulun orong taiyoh.

²⁰ Iroh uras kuman dapot bosuh. Opah iyoh, kawan murid-Eh ngumpur lowieh ma koranjang. Oko duo balas koranjang co kuntop!

²¹ Co umba kuman oko kira-kira limo ribu beti bakah, arinai tohitung bawe hintang kawan daja.

Yesus nyalan nyan tungkui danum 14:22-33

²² Opah iyoh, Yesus nyuhu kawan murid-Eh cakat jukung hintang nosoun Are hia pohoi danau. Sopondehan iyoh, Are nyuhu dulun orong yoh buli.

²³ Opah dulun orong yoh tulak, Yesus nosarang ico lungkuh tarop ika bodoa. Waktu ocop mamalom, Yesus incah oko nyan intin tarop.

²⁴ Tapi jukung co tongumba kawan murid-Eh ocop ocu ingkan banut, oko bahi muhat co hokolawan arah ma jukung cioh dapot jukung cioh lumbeng-lukup.

²⁵ Kira-kira jam tolu homalom, dombutbat Yesus hia iroh, nyalan nyan tungkui danum.

²⁶ Kotika kawan murid-Eh kito Are nyalan nyan tungkui danum, iroh tokocit lau. “Aau noon ontuu!” Hien doh. Iroh noriak-riak awi takut.

²⁷ Tapi jion Yesus mantun ma iroh, “Tenang leh! Akuhboh otuh yoh. Aroh Takut!”

²⁸ Paluh Petrus mantun ma-Eh, “Tuhan, amun mula tuu-tuu Iko, nyuhu akuh hia-Iko, nyalan nyan tungkui danum.”

²⁹ Hien Yesus, “Haasboh!” Jadi Petrus toka ingkan jukung, nyalan nyan tungkui danum mahah Yesus.

³⁰ Tapi kotika Petrus nongkomo bahi muhat yoh, maka are jarin takut paluh molai dotong. Are noriak, “Tuhan, dohop akuh!”

³¹ Yesus lansung nyoro silui-Eh, nantot Petrus. Hien Yesus, “Iko kurang porocaya! Kura iko ragu-ragu?”

³² Paluh Yesus doruo Petrus cakat ponah jukung, bahi muhat yoh mahi ranai.

³³ Kawan murid Yesus co oko nyan jukung yoh nyembah nyuku Are. Hien doh, “Iko bujur-bujur Anak Mohotara!”

Yesus pomambuh kawan dulun hotoro nyan Genesaret 14:34-36

³⁴ Opah dapot nyan pohoi danau, iroh toka ingkan jukung nyan Genesaret.

³⁵ Kotika kawan dulun nyan ika cioh nyono bahawa Are yoh Yesus, iroh maraeh hia kokon derah cioh. Kokon dulun co hotoro tomehen doh hia-Eh.

³⁶ Iroh nyawot asi hia-Eh ina boraoi nyantuk jubah-Eh, olu baya pungkoeh leh. Uras co nyantuk-Eh jarin mambuh.