Matius 13 - Alkitab Porjanjian Baa Ponah Bohasa Dayak Siang

Tindung Yesus tintun pira-pira cara dulun norima antun Mohotara 13:1-23

¹ Hiah kotika ondo cioh ka Yesus naat lopo paluh tulak hia saran danau. Waktu Are tuot nyan intin,

² orong dulun dombut. Iroh hotoreset ngorumbung Are. Awi iyoh, Are cakat hia jukung paluh tuot nyan intin. Sadangkan dulun orong yoh tonjok nyan saran banut.

³ Paluh Yesus majar orong aang ma iroh hapo tindung. Hie-Eh, “Oko ico potani tulak morawuh jangoi.

⁴ Kotika are morawuh jangoi cioh, oko jangoi co nokah nyan calan. Kawan beleu dombut paluh kuman eh dapot punah.

⁵ Tonga jangoi nokah nyan tana co hobatu, co aroko orong tana eh, paluh jangoi cioh mahi nyua nyuluh, awi tana eh mipih.

⁶ Tapi opah matanondo nyomput, molanyubat eh hintang jarin kojang awi aroko dohon hakat.

⁷ Oko tonga jangoi co nokah nyan komatung humput duhi. Humput duhi taiyoh nyuluh dapot ngaluk jangoi taiyoh dapot matoi.

⁸ Tapi oko jangoi co nokah nyan tana co subur. Imbun komulan ingkan jangoi taiyoh mohasir orong buaeh. Oko co hasir eh tolum pulu kali lipet. Oko tonga onom pulu kali lipet. Oko ka co hasir eh solatuh kali lipet.

⁹ Amun empun tolinga, ngoneh antun-Kuh pio-pio!”

¹⁰ Opaiyoh kawan murid Yesus dombut paluh ngisok ma-Eh, “Kura Iko hapo tindung amun majar dulun orong non?”

¹¹ Useh Yesus, “Ikan ocop ihin pomahaman tintun Korojaan Sorga co arinai tomonau dongam. Tapi dulun orong tatuh arinai ihin pomahaman taiyoh.

¹² Awi, dulun co ocop oko, angar tomihi meleh orong kole, hintang are angar holowiholea. Tapi dulun co arelu empun ome-ome, maka isut co oko nyan are malah angar tomonu.

¹³ Ononboh tuluieh Akuh majar iroh hapo tindung. Awi oluco iroh kito kawan aang tintun korojaan sorga, tapi iroh aroko bujur-bujur momporhati maksut eh. Koneh doh tintun korojaan sorga, tapi iroh aroko bujur-bujur momporhati hintang aroko paham maksut eh.

¹⁴ Iroh arelu paham isan iyoh ina antun Mohotara jarin nyata. Hiah jaman sinan nabi Yesaya nulih antun Mohotara yoh co nain otuh: ‘Ikan horoholuh ngoneh borita ingkan Mohotara, tapi aroko piji paham. Ikan horoholuh nolangon alogawin Mohotara tapi aroko piji paham maksut eh.

¹⁵ Awi atoi bangsa cotuh ocop makeng. Tolingan doh ocop ngorengot. Matan doh ocop aroko kolu kito aang co buah. Ina aroh dapot iroh bujur-bujur noto ma matan doh, ina aroh dapot iroh bujur-bujur ngoneh ma tolingan doh, ina aroh dapot iroh bujur-bujur paham ma atoi doh, Jadi iroh aroko angar naat kawan dosan doh hintang aroh bolum ngonyorih atoi-Kuh. Maka, Akuh mahi aroko angar ngompio koadaan kobolum doh.’

¹⁶ Tapi Sanang ikan kawan murid-Kuh. Awi matam me bujur-bujur kitoalogawin Mohotara, paluh bujur-bujur momporhati maksud eh. Ikan ngoneh borita ingkan Mohotara, paluh bujur-bujur paham maksud eh.

¹⁷ Ngonehboh! Orong nabi hintang dulun bokon co bolum bujur nyan tohimo Mohotara, iroh ingkan jaman sinan jere noto kokon co kitam me. Iroh jere ngoneh kokon co tongoneh me. Tapi iroh aroko noto hintang ngoneh aang cioh.

¹⁸ Awi iyoh, ngonehlah arti ingkan tindung tintun potani co morawuh jangoi taiyoh.

¹⁹ Jangoi taiyoh ibarat Antun Mohotara tintun Korojaan Sorga. Tana calan cioh nin ibarat kawan dulun co norima Antun Mohotara baya otoi ngoneh leh tapi aroko kolu pahameh. Opaiyoh dombut Lacan Setan, umpi iroh solingo Antun Mohotara, dapot atoi doh aroko porocaya.

²⁰ Tana co hobatu yoh ibarat kawan dulun co ngoneh Antun Mohotara, norimaeh ma kojorih.

²¹ Tapi iroh baya porocaya sonyulu leh. Amun iroh nohimo pondoritaan atawa tonganiaya, awi iroh porocaya Antun Mohotara, maka iroh aroko kolu porocaya Antun Mohotara bat.

²² Tana co cuhut humput duhi ibarat kawan dulun co ngoneh Antun Mohotara, tapi nyan kotahi, iroh koatir tintun pomolum nyan dunia tuh. Iroh tonipu bahawa koponato meleh penting. Kokon aang taiyoh monggangu iroh dapot aroko bolum sosuai ma Antun Mohotara

²³ Tapi oko kawan dulun co norima Antun Mohotara samah isan tana co subur. Iroh ngoneh eh, paluh paham eh. Poko tului iyoh, oko hasir co pio. Oko co mohasir tolum pulu kali lipet. Co bokon eh kole onom pulu kali lipet. Oko ka co mohasir dapot solatuh kali lipet.”

Tindung Yesus tintun parang co nyuluh homboh gandum 13:24-30

²⁴ Yesus majar dulun orong ma ico tindung kole. Hie-Eh, “Korojaan Sorga ibarat eh samah isan tindung cotuh. Oko ico potani co morawuh bonyin gandum co pio nyan umoieh.

²⁵ Tapi hiah waktu kokon dulun tirui, dombut musuh potani cioh. Musuh eh morawuh bua parang nyan halo bonyin gandum taiyoh. Paluh are buho.

²⁶ Waktu gandum yoh nyuluh, molai musit, kitan ka parang taiyoh.

²⁷ Jadi, kawan dulun co tonombah potani cioh dombut hia eh. Hien doh, ‘Mositi Tuan nukan bonyi co pio nyan umommu. Jadi, parang taiyoh ingkan omoh?’

²⁸ Useh potani cioh, ‘Mositi musuh kuh co umpieh.’ Paluh kawan dulun co tonombah taiyoh mantun maeh, ‘Mainboh Tuan nyau pai ina kaih tulak nuruk parang taiyoh?’

²⁹ Tapi are mantun, ‘Aroh nuruk parang taiyoh makitu. Amun ikan umpieh, mositi oko gandum co umba toturuk.

³⁰ Olueh gandum hintang parang taiyoh sama-samah dapot tocak waktu maroi. Nyan waktu ciohbat, akuh angar mantun ma kokon dulun co maroi: Ngumpurbat kokon parang tanon houn. Paluh meteng parang tanon kawan hutung eh ika tomapang. Opaiyoh ngumpur bat kokon gandum tanon hia ponah uwungkuh.’ ”

Korojaan Sorga somporengu luang sosawi hintang bopongaruh isan dagi 13:31-35

³¹ Yesus majar dulun orong ma tindung co bokon kole. Hie-Eh, “Korojaan Sorga somporengu luang sosawi co tomorawuh nyan kabun.

³² Mula luang jangoi cioh co poko nyai hangki kokon macam jangoi. Tapi, hiah waktu luang jangoi cioh nyuluh, imbun komulan cioh hobatang meleh bahai hangki kokon imbun kawan sayur co bokon, dapot kawan beleu dombut nyalah nyan kawan daaieh.”

³³ Are majar iroh ma tindung kole ka. Hie-Eh, “Korojaan Sorga mahi somporengu dagi. Ico bawe ngucok eh kalut tepung. Ahir eh, dagi cioh umpi kokon kucok tepung cioh nyiwuh.”

³⁴ Uras eh yoh, Yesus majar ma dulun orong hapo tindung. Are aroko porapot ome-ome ma iroh amun aroko hapo tindung.

³⁵ Yesus nguan iyoh ina antun Mohotara jarin nyata. Nyan jaman sinan oko nabi co porapot antun Mohotara non nain otuh: “Akuh angar hapo tindung amun hopander. Akuh angar momborita kawan aang co arinai piji tomonau dulun ingkan hiah dunia tomoncipta.”

Yesus monjelas tindung tintun parang co nyuluh homboh gandum 13:36-43

³⁶ Opah iyoh Yesus naat dulun orong yoh, paluh muntam hia ponah lopo cioh. Kawan murid-Eh dombut paluh mantun ma-Eh, “Dohop monjelas eh ma kaih arti tindung cioh niin tintun parang nyan umo.”

³⁷ Yesus museh, “Dulun potani co morawuh bonyin gandum iyohco Anak Kolunon.

³⁸ Umo cioh iyohco dunia tuh. Bonyin gandum co pio yoh iyohco kawan dulun anggota Korojaan Sorga. Tapi parang yoh iyohco kawan pongikut Lacan Setan.

³⁹ Musuh co morawuh bonyin parang iyohco Lacan Setan. Waktu maroi yoh iyohco ahir jaman. Hintang kawan dulun co maroi yoh iyohco kawan molekat.

⁴⁰ Kawan dulun maroi yoh angar ngumpur kokon parang taiyoh paluh mapang eh ponah apui. Isan iyoh ka angar tojadi nyan ahir jaman.

⁴¹ Anak Kolunon angar nyuhu kawan molekat-Eh. Iroh angar ngumpur kokon aranaang co posabap dulun umpi dosa hintang kokon dulun nguan kojahatan. Kawan molekat taiyoh angar pokusit kokon co jahat yoh ingkan Korojaan-Eh,

⁴² paluh napuk iroh hia ponah apui noraka. Nyan intin iroh angar nangih hintang angar ngoritet kosing awi korinah mondorita.

⁴³ Paluh kawan dulun co bolum bujur nyan tohimo Mohotara angar molet isan matanondo nyan ponah Korojaan Mohotara co Taman doh. Amun empun tolinga, ngonehboh antun-Kuh pio-pio.”

Korojaan Sorga korinah koboleka hintang ngonyorih 13:44-46

⁴⁴ “Korojaan Sorga somporengu harta co pokoboleka co bokawuk nyan umo. Oko dulun co popak harta cioh. Are korinah kojorih. Awi iyoh, tongawuk eh hopuli, paluh tulak borakang kokon harta bandaeh ina are lian moli umo cioh.

⁴⁵ Korojaan Sorga mahi somporengu tindung cotuh. Ico dulun podagang nganyap kawan mutiara co bungah.

⁴⁶ Opah are popak mutiara co korinah koboleka, are tulak hoborakang kokon co oko ina are lian moli mutiara cioh.”

Tindung tintun jala ocin 13:47-52

⁴⁷ “Korojaan Sorga mahi ibarat tindung cotuh. Kawan tukang nganyap ocin nimbai rengge bahai nyan danau. Rengge cioh leket kokon muder ocin.

⁴⁸ Hayak rengge cioh kuntop ma ocin, kawan tukang nganyap ocin narik rengge cioh hia banut. Iroh tuot ngumpur kokon ocin co pilihan hia ponah tajat. Tapi iroh mende kokon ocin co barangai.

⁴⁹ Isan ononboh co angar tojadi nyan ahir jaman. Kawan molekat angar dombut nomorih dulun co jahat ingkan dulun co bolum bujur nyan tohimo Mohotara.

⁵⁰ Kawan molekat angar napuk dulun jahat hia ponah apui noraka. Nyan intin iroh angar nangih hintang angar ngoritet kosing awi korinah mondorita.”

⁵¹ Paluh Yesus ngisok ma kawan murid-Eh, “Mainboh ikan paham kokoieh non?” Iroh museh, “Iyoh, kaih paham.”

⁵² Paluh Yesus mantun ma iroh, “Onon tuluieh sika guru agama co norima polajaran tintun Korojaan Sorga yoh somporengu ico tuan rumah ma tolungan hartaeh. Ingkan intin, are pokusit harta co baa hintang harta co tomuun.”

Kawan dulun nyan lowun tukui ika Yesus kuloi Are 13:53-58

⁵³ Opah Yesus umbot bokesah kawan tindung taiyoh, Are naat ika cioh.

⁵⁴ Are hopuli hia lowun tukui ika-Eh paluh majar kawan dulun nyan intin nyan lopo ika sombayang doh. Maka iroh hurong. Hien doh, “Ingkan omoh Dulun cotuh haba akar pikir isan onon. Ingkan omoh Are haba kuasa ika umpi aang co mosotahir?

⁵⁵ Podahar, Are iyohco baya anak ingkan ico dulun tukang kaju. Tinai-Eh araieh Maria. Konduang-Eh iyohco Yokobus, Yusup, Simon hintang Yudas.

⁵⁶ Kawan konduang-Eh co bawe, oko halo ito. Jadi, ingkan omoh bat Are haba kokon akar pikir hintang kuasa tanon?”

⁵⁷ Jadi, iroh nongkuloi Are. Paluh, Yesus mantun ma iroh, “Ico nabi tomohormati nyan omoh-omoh, tapi arelu nyan lowun tukui ika eh leh hintang nyan halo koluargaeh tarop.”

⁵⁸ Maka Yesus aroko umpi orong aang co mosotahir nyan idi awi iroh aroko porocaya ma-Eh.