Matius 12 - Alkitab Porjanjian Baa Ponah Bohasa Dayak Siang

Pongajaran Yesus tintun Ondo Sabat 12:1-14

¹ Nyan kotika Ondo Sabat, Yesus hintang kawan murid-Eh nyolana nyihin umo. Kawan murid-Eh dou, jadi iroh mutoi gandum paluh kuman eh.

² Pira-pira pomimpin agama Yahudi ingkan kolompok Parisi kito iyoh. Maka iroh ngisok ma Yesus, “Noto! Alogawin kawan murid-Mu non sala! Awi, oko porintah Mohotara ponah Hukum agama Yahudi co ngosiit dulun bogawi nyan Ondo Sabat.”

³ Yesus museh iroh, “mositi ikan piji mombaca Surat Borasih tintun kesah Laca Daud hintang kawan dulun co ngonulueh. Kotika iroh dou,

⁴ Daud muntam hia ponah Lopo Mohotara, monu rute co ocop tomposembah indan Mohotara. Monurut Hukum agama baya kawan imam co boraoi kuman rute cioh. Tapi nyan kotika iyoh, Daud kuman eh. Are mihi hia kawan dulun co ngonulu are ika kuman eh ka.

⁵ Mositi ka ikan piji mombaca ponah Hukum agama tintun kawan imam. Nyan ondo Sabat, iroh botugas nyan ponah Lopo Mohotara. Jadi, iroh molangar poraturan ondo Sabat awi iroh ‘bogawi’ nyan ondo cioh. Tapi mositi iroh aroh sala, jah?

⁶ Tapi porhatiboh! Makitu, nyan intoi oko co meleh bokuasa hangki Lopo Mohotara.

⁷ Ikan aroh paham maksut antun Mohotara cotuh: ‘Hangki momposembah kurban komolum indang-Kuh, Akuh nyau ina ikan porahan komasi ma dongam.’ Soandaieh ikan paham maksut antun Mohotara yoh, mositi ikan aroh mohukum kawan dulun co aroko kosolaai

⁸ awi Anak Kolunon iyohco Tuhan co bokuasa ma Ondo Sabat.”

⁹ Yesus naat ika cioh paluh muntam hia ponah lopo ika sombayang kawan dulun Parisi yoh.

¹⁰ Nyan intin oko dulun co matoi silan siluieh. Kawan dulun Parisi yoh nganyap kosolaan Yesus, ina boraoi nondah-Eh. Jadi, iroh ngisok ma Yesus, “Mainboh boraoi pai pomambuh dulun nyan ondo Sabat?”

¹¹ Tapi Yesus mantun ma iroh, “Misal eh, oko nyan halo ikan co empun ico kontuluh domba. Amun domba cioh tahak hia ponah luwang nyan Ondo Sabat, mositi ikan angar bogawi pokusit domba cioh ingkan ponah luwang cioh.

¹² Nah, mositi kolunon ocu meleh boleka hangki domba. Awi iyoh, ito boraoi nguan aang co pio nyan ondo Sabat.”

¹³ Paluh, hie-Eh ma dulun cioh co siluieh matoi silai, “Nyoro silum!” Kotika dulun cioh nyoro siluieh, mambuhbat are. Siluieh co matoi silai jarin sehat isan siluieh silai.

¹⁴ Tapi kawan dulun Parisi yoh pusit paluh umpi kewak ika ngompatoi Yesus.

Yesus iyohco Dulun Co Tomili Mohotara ika molayani Are 12:15-21

¹⁵ Tapi Yesus monau kewak kawan dulun Parisi yoh. Jadi, Are tulak ingkan idi. Orong dulun ngonulu Are, hintang Are pomambuh kokon doh.

¹⁶ Tapi Are ngosiit iroh mara tintun ome Are yoh.

¹⁷ Poristiwa cioh tojadi ina antun Mohotara jarin nyata. Hiah jaman sinan nabi Yesaya nulih antun Mohotara cioh co tuh naieh:

¹⁸ “Cotuhboh dulun co molayani Akuh. Are-boh co tomili-Kuh. Are co tongasihi-Kuh. Are ngonyorih atoi-kuh. Akuh angar mihi Roh-Kuh indai-Eh. Paluh Are angar momborita indan kokon bangsa bahawa Akuh umpi kawan aang co sucing.

¹⁹ Are aroko angar hojawap. Are aroko angar noriak. Jadi kawan dulun aroko angar ngoneh suara-Eh nyan kawan calan.

²⁰ Are aroh molok towu bawui co botekop; hintang aroko micop lampu co roo-roo. Are angar horoholuh bojuang dapot koadilan manang.

²¹ Kawan dulun ingkan kokon bangsa angar boharap bahawa Are nyolamat iroh.”

Yesus tonondah hapo kuasan Lacan Setan 12:22-37

²² Opaiyoh oko dulun co tonyarung roh jahat tomehen hia Yesus. Dulun cioh bobuto hintang uong. Yesus pomambuh are dapot lian noto hintang hopander bat.

²³ Maka, orong dulun nyan intin jarin hurong. Hien doh, “Mungkin Yesus tuh iyohco Laca ingkan koturunan Daud!”

²⁴ Pira-pira pomimpin agama Yahudi ingkan kolompok Parisi ngoneh iyoh. Paluh iroh mantun, “Are musir kawan roh jahat hapo kuasan Lacan Setan!”

²⁵ Tapi Yesus monau pikiran doh. Jadi, Are mantun ma iroh, “Amun ico korojaan topisah-pisah ponah kawan golongan co hobomusuh, mositi korojaan cioh angar lumat. Amun kawan dulun ponah ico kota hobomusuh, mositi kota cioh aroh angar botahan. Amun kawan anggota koluarga hobomusuh, mositi koluarga cioh angar hancur.

²⁶ Sanioh ka nyan ponah Korojaan Setan. Amun Lacan Setan musir kawan roh jahat eh, borati korojaan eh tobagi-bagi. Are ngolawan arop eh tarop. Mositi korojaan eh aroh hegah botahan.

²⁷ Nohani, soandaieh Akuh musir roh jahat hapo kuasan Lacan Setan, borati kawan pongikut me musir roh jahat ma kuasan Lacan Setan ka. Kawan pongikut me leh co angar mantun onon sala!

²⁸ Tapi, co bujur iyohco Akuh musir roh jahat ma kuasan Mohotara. Maka, onon borati Korojaan Mohotara ocop dombut hia ikan.

²⁹ Potimbang gamaran cotuh: Amun ico dulun nyau muntam lopo dulun co kuat ina morampas harta bandaeh, mositi are sobulih mowot dulun co kuat yoh houn. Hanyar are lian morampuk lopo cioh.

³⁰ Dulun co aroko momihak Akuh, kuantuueh are naleh Akuh. Dulun co aroko bogawi halo Akuh, are morusak gawing-Kuh.

³¹ Jadi, porhatiyoh otuh: Sika dulun co bodosa atawa mohina dongai, boraoi tomampun. Tapi dulun co mohina Roh Mohotara, dulun cioh aroh angar tomampun.

³² Sika dulun co mantun monentang Anak kolunon, dulun cioh boraoi tomampun. Tapi sika dulun co monentang Roh Mohotara, dulun cioh aroh piji angar tomampun nyan dunia tuh atawa nyan dunia co angar dombut.

³³ Sika dulun tonyono ingkan alogawi somporengu sika batang kaju tonyono ingkan buah eh. Amun batang bua bolunyah, maka buah eh pio ka. Amun batang bua tongket, maka buah eh ceet ka.

³⁴ Ooi ikan dulun Parisi co jahat hintang licik isan nyipo mohari! Aroh bodai ikan polua antun kawan aang co pio awi ikan jahat. Awi, luang antun co bolua ingkan baun dulun, nyomput ingkan ponah atoi dulun cioh.

³⁵ Dulun co pio polua antun kawan aang co pio awi atoieh pio. Sobalik eh, dulun co jahat polua antun kawan aang co jahat awi atoieh jahat.

³⁶ Jadi, porhati yoh otuh: Nyan Ondo Mohotara momutus kokon dulun co bujur atawa co sala daai, sika dulun sobulih botanggung jawab ma antun co piji topolua eh hapaumai.

³⁷ Awi antun dolang tikoleh co angar tohapan ika momutus amun iko angar tomangap bujur nyan tohimo Mohotara atawa amun iko angar tomohukum Mohotara.”

Yesus nopoh dulun orong co nuntut Are ika nguan meleh orong aang co mosotahir kole 12:38-42

³⁸ Opaiyoh pira-pira guru agama Yahudi hintang kawan dulun Parisi mantun ma Yesus, “Pa Guru, kaih jere noto Iko umpi aang co mosotahir co mombukti Mohotara nyoruhan Iko.”

³⁹ Tapi Yesus museh iroh, “Kawan dulun nyan jaman cotuh jahat hintang aroh sotia ma Mohotara. Iroh nuntut ico ciri. Tapi baya ico ciri co angar tomihi indan doh, iyohonon aang co mosotahir isan co tojadi ma Nabi Yunus hiah jaman sinan.

⁴⁰ Yunus oko nyan ponah olom ocin bahai kotahin tolu ondo tolu komomi. Sanioh ka daai Anak Kolunon nyan ponah kolowong kotahin tolu ondo tolu komomi.

⁴¹ Nyan ondo Mohotara momutus kokon dulun co bujur atawa co sala, kawan dulun Niniwe angar bolum hopuli ingkan pompatoi homboh kawan dulun jaman cotuh hintang nocaknona iroh. Awi kawan dulun Niniwe yoh umbot umpi kawan dosan doh, kotika Yunus porapot tungon Mohotara indan doh. Tapi nyan intoi makitu oko co meleh bahai hangki Yunus!

⁴² Isanioh ka, nyan ondo Mohotara momutus kokon dulun co bujur atawa co sala ratu ingkan negri Syeba angar bolum hopuli homboh kawan dulun jaman cotuh hintang nocaknona iroh. Awi ika ngoneh pongajaran Salomo co boakar pikir, ratu cioh umpi solana co ocu lau ingkan solatan. Tapi nyan intoi makitu oko co meleh bahai hangki Salomo!”

Yesus momporingat ina botawat tohimo kuasan jahat 12:43-45

⁴³ Paluh Yesus majar ma kesah cotuh: “Amun roh jahat pusit ingkan dulun, roh cioh koliling hia padang gurun ina nganyap ika sotorahat. Tapi are aroko habaeh.

⁴⁴ Maka, are mantun, ‘Akuh angar hopuli hia dulun co tonaat kuh!’ Waktu are dapot dulun cioh, are popak dulun cioh samah isan lopo co borasih hintang borimpoh, tapi buhang.

⁴⁵ Paluh are tulak, nyopopak pitu roh bokon co meleh jahat hangki are. Iroh uras dombut, muntam hia ponah dulun cioh, paluh nukui nyan intin. Kojekaieh, koadaan dulun cioh jarin meleh koduhui hangki kosulak. Ononleh ka co angar tojadi ma kawan dulun jahat jaman cotuh.”

Koluarga Yesus co kokuantuueh 12:46-50

⁴⁶ Sopondehan Yesus incah hopander ma dulun orong yoh, dombutboh tinai hintang kawan konduang-Eh. Iroh tonjok nyan luar, nyau nyopopak Are tapi aroko boraoi.

⁴⁷ Jadi, oko dulun mara ma-Eh, “Tinam-Mu hintang kawan konduang-Mu oko nyan luar, nyau nyopopak-Iko.”

⁴⁸ Tapi Yesus mantun ma dulun cioh, “Omeboh tinang-Kuh? Omeboh kawan konduang-Kuh?”

⁴⁹ Yesus ninju hia kawan murid-Eh samir mantun, “Kawan dulun tatuhboh iyohco tinang-Kuh hintang kawan konduang-Kuh!

⁵⁰ Awi kokon dulun co nguan kojere Tamang-Kuh nyan sorga, Iroh iyohco tinang-Kuh hintang kawan konduang-Kuh bakah bawe.”