Matius 11 - Alkitab Porjanjian Baa Ponah Bohasa Dayak Siang

¹ Jadi, Yesus mihi kawan potunjuk taiyoh indan duo balas murid-Eh. Opah iyoh, Are tulak ingkan idi ika majar hintang momborita Tarung Pio nyan kawan kota doh.

Yesus hintang Yohanes Pombaptis 11:2-19

² Yohanes Pombaptis dahat tomonjara. Are ngoneh tintun alogawin Yesus Kristus.

³ Maka Yohanes nyuhu kawan murid-eh hia Yesus ika ngisok, “Mainboh Iko Laca Co Tomonjanji Mohotara? Atawa Iko dulun bokon? Main kaih incah sobulih nganto korombut-Eh?”

⁴ Yesus Museh iroh, “Hopuli hia Yohanes. Mara ma are tintun kokon co tongoneh hintang co kitam me.

⁵ Dulun bobuto lian noto. Dulun lumpuh lian nyalan. Dulun co buah boro bohinai congkit jarin mambuh. Dulun borengen lian ngoneh. Dulun matoi tongomolum hopuli. Tarung Pio tomomborita hia dulun mala.

⁶ Sanang boh dulun co aroko naleh Akuh.”

⁷ Opah duo murid Yohanes yoh tulak, Yesus molai monjelas ma dulun orong tintun ome Yohanes sobujur eh. Hien Yesus, “Hiah Yohanes nukui nyan padang gurun, ikan tulak hia idi ika noto ome? Mositi aroh baya sokedar noto ico kolente uru co hokuwut tonapi bahi.

⁸ Jadi, ikan tulak hia idi ika noto ome? Mositi aroh ika noto dulun co holembon darang. Dulun co holembon darang nukui ponah istana aroh nyan padang gurun.

⁹ Jadi, ikan tulak hia idi ika noto ome? Mositi ika noto ico beti nabi, kan? Tapi, porhati otuh. Are meleh penting hangki ico nabi.

¹⁰ Awi Yohanes ciohboh co tomaksut ponah ayat Surat Borasih cotuh, ‘cotuh boh coruhan-Kuh, hien Mohotara, Akuh nyoruhan are labih houn hangki-Iko ina are nampa calan indam-Mu.’

¹¹ Jadi porhatieh boh, Yohanes Pombaptis meleh penting hangki dongai nyan dunia tuh dapot makitu. Tapi kokon anggota koluarga Korojaan Sorga, uras doh meleh penting hangki Yohanes yoh.

¹² Molai ingkan Yohanes Pombaptis momborita Tarung Pio dapot makitu, oko kawan dulun co monentang Korojaan Sorga. Ma kokorasan, iroh bousaha ngohancur Korojaan Sorga.

¹³ Dapot korombut Yohanes, kokon nabi hintang Hukum Agama Yahudi mantun ocu sorinaieh tintun kokon aang co sobulih tojadi.

¹⁴ Nyan ponah eh tonulih ka tintun nabi Elia co angar dombut. Amun ikan nyau porocaya, Yohanes Pombaptis iyoh boh nabi Elia co tonulih yoh.

¹⁵ Amun empun tolinga, ngoneh antun-Kuh pio-pio.

¹⁶ Kawan dulun jaman cotuh samah isan kawan daja co bocuri nyan pasar. Kawan daja taiyoh tuot hotaah kawan jolahai-eh,

¹⁷ ‘Ma kojorih jerah kaih minyup sulim. Tapi ikan aroko ngarang. Kaih monyanyi lagu dahat buah kosusah pompatoi. Tapi ikan aroko nangih.’

¹⁸ Awi Yohanes Pombaptis dombut, aroh kuman rute, aroh ngorih angur, tapi iroh mantun are tonyarung setan.

¹⁹ Paluh Anak Kolunon dombut. Are kuman ngorih, tapi iroh mantun Are dulun co bobolai, pongorih, jolahan tukang nakih pajak hintang dulun co bodosa. Tapi iroh sala awi alogawin dulun mombukti amun dulun cioh bujur-bujur oko akar pikir ingkan Mohotara atawa aroh.”

Yesus nyala kawan dulun nyan pira-pira kota co aroh porocaya ma-Are 11:20-24

²⁰ Nyan daerah Galilea tuh boh Yesus nguan poko orong aang co mosotahir nyan antara pira-pira kota co tomahah-Eh. Tapi kawan dulun nyan kawan kota taiyoh tenden aroh naat dosan doh paluh ngonyorih atoi Mohotara. Jadi Yesus karas lau nyala iroh. Hie-Eh,

²¹ “Mohotara angar mohukum ikan nyan kota Korasim hintang Betsaida. Akuh ocop nguan orong aang co mosotahir nyan tohun-tohun ikan. Soandaieh, Akuh nguan kawan aang co mosotahir yoh nyan kota Tirus hintang Sidon, mositi kawan dulun nyan idi ocop tahi moneser hintang naat dosan doh.

²² Porhatiboh! Nyan Ondo Mohotara momutus kokon dulun co buah atawa co sala daai, hukuman indam me nyan Korasim hintang Betsaida angar meleh bahat hangki hukuman indan kawan dulun jahat nyan Tirus hintang Sidon yoh.

²³ Ikan mahi co nyan desa Kapernaum. Aroh bopikir ikan angar tomohormati dapot muntam sorga! Ikan angar tomende hia noraka! Awi Akuh ocop nguan orong aang co mosotahir nyan tohun-tohun ikan ka. Soandaieh, Akuh nguan kawan aang co mosotahir yoh nyan kota Sodom, mositi kawan dulun nyan idi naat dosan doh hintang kota cioh tantu incah reje-reje dapot makitu.

²⁴ Porhatileh! Nyan Ondo Mohotara momutus kokon dulun co bujur atawa co sala daai, hukuman indam me nyan Kapernaum angar meleh bahat hangki hukuman indan kawan dulun nyan Sodom yoh.”

Yesus makat dulun co daras beban ika jarin murid-Eh 11:25-30

²⁵ Hiah waktu cioh Yesus bodoa, “Tamang-Kuh, Iko monguasa kokon dunia tuh. Akuh bosukur awi iko aroh moholu dulun co pintar hintang bopondidikan paham tintun korojaan-Mu, tapi Iko porahan kokoieh yoh indan dulun co randah atoi isan daja kolik.

²⁶ Ooh, Tamang-Kuh, cara cioh ngonyorih atoi-Mu!”

²⁷ Paluh Yesus mantun ma kawan dulun, “Tamang-Kuh ocop mihi kokon aranaang indang-Kuh. Arelu ico beti mahi bujur-bujur nyono Anak, bokon ma Tamang-Kuh. Arelu oko ka co bujur-bujur nyono Tamang-Kuh bokon ma Anak hintang kawan dulun co tomposono Anak ma Tamai-Eh.

²⁸ Dombut boh hia-Akuh, kokom me co lokoh bololoi hintang bobeban bahat. Akuh angar mihi kosoloah indam me.

²⁹ Umba leh porentah-Kuh. Boguru ma-Akuh, awi Akuh aroh pongasar hintang Akuh randah atoi. Amun ikan nguan onon, maka jiwa me angar nongkomo soloah.

³⁰ Awi, ajaran-Kuh aroh moho tonguan hintang porintah-Kuh sutir tonuhit.”