Matius 10 - Alkitab Porjanjian Baa Ponah Bohasa Dayak Siang

Yesus mihi kuasa indan duo balas rasul-Eh 10:1-4

¹ Yesus naah duo balas murid-Eh ina hokumpur. Paluh, Are mihi indan doh kuasa ika ngomuho kawan roh jahat hintang pomambuh kokon macam toro.

² Cotuh daptar aran duo balas rasul taiyoh: Portama, Simon (co pian Yesus arai ka Petrus), Andreas (konduang Simon yoh), Yokobus (anak Jebedeus) hintang konduang eh Yohanes.

³ Paluh Pilipus, Bartolomeus, Tomas, Matius (tukang nakih pajak yoh), Yokobus (anak Alpeus), Tadeus,

⁴ kawun Simon (dulun Selot), Yudas Iskariot (co nyarah Yesus hia musuh-Eh).

Yesus nyoruhan duo balas rasul 10:5-15

⁵ Paluh, Yesus nyoruhan duo balas rasul ma kawan potunjuk tatuh. Hie-Eh, “Aroh tulak hia derah kawan dulun co bokon ma Yahudi. Hia kawan kota dulun Samaria mahi aroh.

⁶ Tapi tulakleh hia kawan dulun Israel husus eh hia iroh co dajat.

⁷ Momboritaeh hia iroh Korojaan Sorga ocop doni.

⁸ Pomambuhbat dulun hotoro. Umpi dulun matoi ina bolum hopuli. Pomambuhbat dulun co buah boro co bohinai congkit. Ngomuho kawan roh jahat. Ikan ocop norima aang cioh otoi cuma-cuma. Maka ikan sobulih mihi indan dongam me otoi cuma-cuma ka.

⁹ Aroh mehen duit bulou, duit perak atawa duit tombaga ponah owot kahang mu.

¹⁰ Aroh mehen kambut bohati, lembon sali, bohatin sanar, atawa tuntu. Aroh mehen kokon onon awi sika dulun co bogawi patut norima tombah.

¹¹ Nyan waktu ikan muntam sika kota atawa lowu, nganyapleh dulun co kolu norima ikan. Nukuileh umba are dapot ikan tulak kole.

¹² Amun iko muntam lopo dulun, mihi tontoke indan doh.

¹³ Amun iroh kolu norima tontoke cioh, Mohotara bujur-bujur angar umpi koluarga cioh landah. Tapi, amun iroh aroh kolu norimaeh, kolandah cioh angar hopuli hia ikan.

¹⁴ Amun oko dulun co aroh norima ikan atawa aroh kolu ngoneh antun me tintun Tarung Pio, pusitleh ingkan lopo atawa kota cioh. Naatleh iroh. Nontokoh dabu ingkan paam me sobagai poringatan hukuman indan iroh

¹⁵ Ngoneh otuh! Hukuman indan doh angar meleh bahat hangki hukuman indan kawan dulun nyan kota Sodom hintang Gomora hiah jaman sinan.”

Kawan murid Yesus angar tonganiaya 10:16-33

¹⁶ “Ngonehleh! Akuh nyoruhan ikan samah isan kawan anak domba hia tohun-tohun kawan ocin dangas. Poko tului iyoh, ikan sobulih cerdik isan nyipo. Tapi ikan mahi sobulih tulus atoi isan beleu merpati.

¹⁷ Botawatyoh! Awi oko kawan dulun co angar nawan ikan paluh mehen ikan hia tohimo kawan majelis agama ika tomongadili. Iroh angar moncambuk ikan nyan kawan lopo ika sombayang.

¹⁸ Poko tului ikan umba Akuh, maka ikan mahi angar tomehen hia kawan ponguasa hintang kawan laca ika tomongadili. Ononboh waktueh ikan angar bosaksi tintun Akuh ma iroh dulun Yahudi hintang ma kawan dulun bokon ma Yahudi.

¹⁹ Hiah waktu ikan tonawan, aroh koatir tintun kawan antun co angar me polua ika mombela aropme. Aroh ka koatir tintun maindeoi ikan sobulih porapot luang antun taiyoh. Awi nyan waktu iyoh, Mohotara leh angar mihi indam me luang antun.

²⁰ Jadi, sobujur eh iyoh bokon ikan co mantun. Tapi Roh Mohotara Tama nyan ponah ikan angar umpi ikan polua antun dolang taiyoh.

²¹ Angar tojadi bahawa kawan dulun angar nyarah kawan konduang doh ika tongompatoi. Angar oko kawan tama co nyarah kawan anak doh ka. Angar oko kawan anak co ngolawan, nyarah tinan-taman doh ika tongompatoi.

²² Ikan angar tongodolee pian kokon dulun awi ikan umba Akuh. Tapi dulun co tenden porocaya ma-Akuh dapot omoh soropaieh angar tonyolamat.

²³ Amun ikan tonganiaya nyan ico kota, buholeh hia kota co bokon. Ngonehyoh! Sorinai ikan hapuh mahah kokon kota nyan derah Israel yoh, Anak Kolunon ocop dombut.

²⁴ Mingatlah! Murid aroh meleh penting hangki gurueh. Cipon aroh meleh penting hangki tuan eh.

²⁵ Ocop cukup amun murid jarin samah ma gurueh, hintang cipon jarin samah ma tuan eh. Isan iyoh ka amun iroh naah Akuh Lacan Setan mositi iroh angar umpi ikan ma kodaras ceet kole.

²⁶ Jadi, arohboh ikan takut tohimo iroh. Kokon co tocuhuk makitu, daai angar kitan. Kokon co tomulim angar tomonau.

²⁷ Kawan aang co tomantun socara tonih-tonih ponah pindong, daai angar tojewa-jewa waktu ondo pandau. Kawan aang co tonosinok nyan tolinga, daai angar tomomborita ingkan tungkui sapo lopo. Isan iyoh ka, uras co tomantun Kuh ma ikan leh, daai ikan sobulih momborita ma kokon dulun.

²⁸ Aroh takut ma iroh co baya lian ngompatoi ikan. Iroh aroh bokuasa ngompatoi jiwa me. Tapi ikan sobulih takut ma Mohotara. Awi, Are bokuasa ngolumat jiwa hintang betim me nyan ponah noraka!

²⁹ Duo kontuluh ompet toborakang mias komurah. Tapi arelu ico mahi matoi kocuali iyoh sosuai ma kojere Mohotara co Tamam me.

^30-31 Mohotara meleh mohargai ikan hangki orong ompet taiyoh. Are mahi monau pira kuhat lente balou nyan kuhungmu. Maka aroh ikan takut.

³² Sika dulun co mongakui Akuh nyan muka kawan dulun bokon, Akuh mahi angar mongakuieh nyan muka Tamang-Kuh co nyan sorga.

³³ Tapi sika dulun co aroh mongakui Akuh nyan muka kawan dulun bokon, Akuh mahi angar aroh mongakui are nyan muka Tamang-Kuh co nyan sorga.”

Dulun co porocaya ma Yesus sobulih mongutama Are 10:34–11:1

³⁴ “Aroh bopikir Akuh dombut polandah kawan dulun nyan dunia tuh. Malah sobalik eh! Akuh dombut nomorih dulun co umba Akuh hintang dulun co aroh umba Akuh.

³⁵ Akuh dombut nomorih dulun ingkan tamaieh, anak bawe ingkan tinaieh, monantu bawe ingkan umpueh co bawe.

³⁶ Jadi, dulun ponah ico lopo hobomusuh.

³⁷ Sika dulun co mongasihi tamai atawa tinaieh nomeleh hangki ma Akuh, are aroh layak jarin murid-Kuh. Sanioh ka, sika dulun co mongasihi anak eh bakah atawa bawe nomeleh hangki ma Akuh, are aroh layak jarin murid-Kuh.

³⁸ Sika dulun co aroko bosodia nyanon sompolakieh hintang umba Akuh, are aroko layak jarin murid-Kuh.

³⁹ Sika dulun co mongutama kobolum eh, sobujur eh aroh angar haba kobolum co kotuueh. Tapi sika dulun co nyarah kobolum eh leh ika ngumba Akuh, mositi angar tongohabaeh.”

^40-41 Ome bewe co norima ico nabi, sobagai nabi, maka are angar norima tombah ingkan Mohotara samah isan co tomihi indan ico beti nabi. Sika dulun co norima awi dulun cioh dulun bujur maka dulun cioh angar norima tombah dulun bujur. Sanioh ka ma ikan. Sika dulun co norima ikan, borati are norima Akuh ka. Hintang sika dulun co norima Akuh, borati are mahi norima Mohotara co nyoruhan Akuh.

⁴² Ome bewe co dohop dulun co randah oluco baya ico cangkir danum sorongin tului are iyohco murid-Kuh, maka dulun co mihieh yoh angar norima tombah.