Markus 8 - Alkitab Porjanjian Baa Ponah Bohasa Dayak Siang

Yesus umpi aang co mosotahir makan opat ribu dulun 8:1-10

¹ Hiah waktu cioh, oko kole korinah kuhat dulun dombut hokumpur. Tului iroh aroko empun kanon, Yesus naah kawan murid-Eh.

² Hie-Eh ma iroh, “Akuh masi lau ma dulun orong tatuh. Ocop tolu ondo iroh halo Akuh. Makitu iroh arelu oko kanon.

³ Akuh aroko kolu nyuhu iroh buli dou, awi iroh angar pisan ponah solanan, awi oko co dombut ingkan ocu.”

⁴ Kawan murid-Eh museh, “Ika cotuh ocu ingkan lowu. Aroko bodai dulun boraoi haba rute indan dulun kongorong otuh!”

⁵ Yesus ngisok ma iroh, “Oko pira rute co oko nyan ikan?” Useh doh, “Oko pitu.”

⁶ Paluh, Yesus nyuhu dulun ngarun taiyoh tuot nyan tungkui tana. Yesus monu pitu rute taiyoh paluh mucap sukur ma Mohotara. Are hosila-sila rute taiyoh, mihieh ma kawan murid-Eh ina tomagi-magi ma dulun ngarun taiyoh. Kawan murid-Eh nguan eh.

⁷ Iroh mahi empun pira-pira ocin kolik. Yesus mucap sukur ma Mohotara ma ocin taiyoh, paluh nyuhu kawan murid-Eh hobagi-bagi iyoh ka.

⁸ Uras doh kuman dapot bosuh. Opah iyoh, kawan murid-Eh ngumpur lowieh hapo koranjang. Oko pitu koranjang co kuntop!

⁹ Co umba kuman oko kira-kira opat ribu beti. Umbot iyoh, Yesus nyuhu dulun orong taiyoh buli.

¹⁰ Are holuh cakat jukung homboh kawan murid-Eh, tulak hia derah Dalmanuta.

Kawan pomimpin agama Yahudi nyawot Yesus umpi aang co mosotahir 8:11-13

¹¹ Opaiyoh, pira-pira pomimpin agama Yahudi ingkan kolompok Parisi dombut hia Yesus. Iroh sual jawab ma Are, nyau nguji Are. Jadi, iroh nyawot ina Yesus umpi aang co mosotahir ika mombukti ma iroh bahawa kuasai-Eh ingkan Mohotara.

¹² Are korinah kocewa ponah atoi-Eh. Hie-Eh, “Kura kawan dulun jaman cotuh nyawot Akuh umpi aang co mosotahir? Ngoneh ehboh! Akuh aroko angar umpi aang co mosotahir somacam iyoh indam me!”

¹³ Yesus hintang kawan murid-Eh naat kawan dulun Parisi nyan intin. Iroh cakat kole hia tungkui jukung hintang tulak hia pohoi danau cioh.

Bojaga arop tohimo dulun Parisi hintang Herodes ina aroko umba alogawi jahat 8:14-21

¹⁴ Hiah waktu iroh mitah danau, kawan murid Yesus solingo mehen rute. Iroh baya oko ico rute leh.

¹⁵ Yesus mihi porentah cotuh ma iroh. Hie-Eh, “Bojaga arop me tohimo dagi ingkan kawan pomimpin agama Yahudi ingkan kolompok Parisi hintang tohimo dagi laca Herodes.”

¹⁶ Iroh bopikir Yesus mantun iyoh awi iroh aroko mehen rute. Jadi, iroh holobija tintun iyoh.

¹⁷ Tapi Yesus monau ome co tomander doh. Jadi Are mantun, “Kura ikan posual tintun arelu oko rute? Ikan incah arinai paham? Sobulih eh ikan ocop paham!

¹⁸ Ikan empun mata hintang tolinga. Tapi ikan aroko paham ome co tonoto hintang tongoneh me. Mainboh ikan ocop solingo tintun aang co mosotahir co tongompiang-Kuh?

¹⁹ Akuh mihi kanon limo ribu beti ma limo rute. Hiah waktu ikan ngumpur lowieh, pira koranjang co kuntop?” Useh doh, “Duo balas koranjang.”

²⁰ “Akuh mahi mihi kanon opat ribu beti ma pitu rute. Hiah waktu ikan ngumpur lowieh, pira koranjang co kuntop?” Useh doh, “Pitu koranjang.”

²¹ Paluh Yesus ngisok kole ma iroh, “Mainboh ikan incah arinai paham ka?”

Yesus pomambuh dulun bobuto nyan kota Betsaida 8:22-26

²² Opah iyoh, Yesus hintang kawan murid-Eh dapot nyan kota Betsaida. Nyan intin, oko dulun co bobuto. Kawan dulun mehen are hia Yesus hintang nyawot asi ina Yesus ngoncamak eh ika pomambuh are.

²³ Yesus nantot silun dulun bobuto cioh, nuntun are hia luar kota. Yesus ngiwoh matan dulun cioh, paluh mandak silui-Eh nyan matan dulun cioh. Yesus ngisok maeh, “Mainboh makitu iko lian kito aranaang?”

²⁴ Dulun cioh noto hia muka, paluh mantun, “Iyoh. Akuh kito dulun nyalan-nyolana, tapi iroh tokitan isan kawan kaju.”

²⁵ Yesus mandak kole silui-Eh nyan matan dulun cioh. Paluh, dulun cioh bousaha noto. Sindo otuh, are ocop pio. Are hegah kito kokon aranaang tonta lau.

²⁶ Yesus mantun maeh, “Bulibat! Tapi aroh muntam hia ponah kota non.”

Rasul Petrus mantun Yesus iyohco Laca Co Tomonjanji Mohotara 8:27-30

²⁷ Opah iyoh Yesus tulak ma kawan murid-Eh hia derah dokin kota Kaisarea Pilipi. Nyan owang calan Yesus ngisok ma iroh, “Monurut antun dulun, omeboh Akuh tuh?”

²⁸ Useh doh, “Oko co mantun Iko iyohco Yohanes Pombaptis. Oko ka co mantun Iko iyohco nabi Elia. Oko dulun bokon co mantun Iko iyohco nabi bokon ingkan jaman sinan.”

²⁹ Paluh, Yesus ngisok ma iroh, “Tapi, monurut ikan leh, omeboh Akuh tuh?” Simon Petrus museh, “Iko iyohco Laca Co Tomonjanji Mohotara, co tonisi ‘Kristus’.”

³⁰ Paluh Yesus mompokingat iroh, ika aroh mara ma ome bewe tintun arop-Eh.

Yesus mara tintun pondoritaan co angar tonongkomo-Eh 8:31-33

³¹ Opaiyoh, Yesus majar ma iroh bahawa Anak Kolunon sobulih orong mondorita. Are sobulih tonongkuloi kawan pomimpin bangsa, kawan imam kopala, kawan guru agama Yahudi. Are angar tongompatoi. Tapi nyan ondo co kotolu, Are angar bolum hopuli.

³² Yesus mara kawan murid-Eh tintun iyoh ma kosak rak. Tapi Petrus ngocet Yesus hia bolikat paluh nopoh Are.

³³ Yesus bopaling, noto lansung hia kawan murid-Eh, paluh bohimat nopoh Petrus. Hie-Eh, “Aroh iko jarin isan Lacan Setan mohalang-halang Akuh molalus roncana Mohotara. Iko ngumba pikiran kolunon, bokon pikiran Mohotara!”

Kokon murid Yesus sobulih bosodia mondorita tapi angar ngohaba bolum nyan sorga 8:34–9:1

³⁴ Holuh, Yesus naah dulun orong co oko nyan intin homboh kawan murid-Eh, Hie-Eh ma iroh, amun dulun jere tuu jarin murid-Kuh, are sobulih naat kojere arop eh tarop. Are sobulih nyanon sompolakieh. “Kawan murid-Kuh sobulih isan iyoh holuh umba Akuh.

³⁵ Awi ome co nyau bousaha mompotahan tambung songaieh, angar niho tambung songaieh. Tapi ome co niho tambung songaieh tului are ngumba Akuh hintang tului are momborita Tarung Pio, mositi are angar nyolamat eh.

³⁶ Arelu oko kobohujung eh indan dulun co boraoi ngohaba kokon aranaang nyan dunia tuh, tapi tambung songaieh niho.

³⁷ Are aroko boraoi nosuloi ome bewe ika ngohaba tambung songaieh.

³⁸ Oluco ikan bolum nyan tohun kawan dulun co bodosa hintang aroko tenden porocaya nyan jaman cotuh, aroh ikan mohaan ngumba Akuh hintang antun-Kuh. Sika dulun co mohaan ngumba Akuh, daai Anak Kolunon angar nongkuloi are ka hiah Are dombut hopuli ingkan sorga. Nyan waktu iyoh, Are angar dombut ma soanteru kuasan Tamai-Eh homboh kawan molekat Mohotara.”