Markus 7 - Alkitab Porjanjian Baa Ponah Bohasa Dayak Siang

Ome sobujur eh co umpi dulun pali nyan tohimo Mohotara 7:1-23

¹ Bopira pomimpin agama Yahudi dombut ingkan Yerusalem, iyohonon pira-pira pomimpin ingkan kolompok Parisi hintang pira-pira guru agama Yahudi ka. Iroh dombut hia Yesus.

² Iroh noto bahawa pira-pira murid-Eh aroko manyo silun doh sorinai kuman. Monurut iroh, iyoh aranaang co pali nyan tohimo Mohotara.

³ Tului, kawan dulun Parisi isan kokon dulun Yahudi co bokon horoholuh nontumun poraturan tatu hiang doh. Sorinai iroh kuman, iroh horoholuh manyo silu ma kawan cara totentu.

⁴ Amun buli ingkan pasar, iroh sobulih mondui ma cara husus sorinai iroh kuman. Iroh korinah nuhit orong poraturan co bokon ka ingkan tatu hiang doh; isan poraturan munjah cangkir, mangkuk, pinjan bokon co tonampa ingkan tombaga.

⁵ Tului iyoh, kawan dulun Parisi hintang kawan guru agama Yahudi taiyoh mantun ma Yesus, “Kura kawan murid-Mu aroko nuhit poraturan tatu hiang to? Iroh aroko manyo silun doh sorinai kuman.”

⁶ Useh Yesus ma iroh, “Ikan baya pura-pura leh pio. Hiah jaman sinan, nabi Yesaya ocop porapot antun Mohotara tintun ikan. Tangar lau antun Mohotara cotuh: ‘Bangsa cotuh baya nara Akuh ma baun doh. Tapi atoi doh aroko tuu-tuu nyau ngonyorih Akuh.

⁷ Porocuma leh iroh nyembah Akuh. Awi iroh baya majar mara poraturan kolunon leh.’

⁸ Ome co tomorentah Mohotara, ikan aroko nguan eh, tapi poraturan kolunon ciohboh co tongumba me.”

⁹ Yesus mantun ka, “Pintar lau ikan nongkuloi porentah Mohotara ina me boraoi nontumun poraturan me leh.

¹⁰ Cuntueh: Musa nulih porentah Mohotara cotuh: ‘Hormatboh ma tinan tamammu.’ Hintang ‘Dulun co mantun aang co jahat ma tinan, tamaieh sobulih tomohukum matoi.’

¹¹ Tapi ikan majar mara isan otuh: Dulun boraoi mantun ma tinan, tamaieh, ‘Akuh aroko boraoi mihi bantuan indan ine-umai bat. Awi akuh ocop mihi iyoh indan Mohotara.’

¹² Maka, ikan umpi poraturan ika dulun aroko sobulih dohop tinan-tamaieh kole.

¹³ Poraturan cioh co tonorima me ingkan tatu hiang umpi ina Antun Mohotara aroko tonuhit bat. Hintang orong aang bokon isan onon co tongompiam me.”

¹⁴ Paluh, Yesus naah dulun orong kole. Hie-Eh ma iroh, “Ngoneh ehlah hintang momaham otuh:

¹⁵ Kawan aang co muntam ponah bau aroko umpi kawan dulun jarin pali. Tapi kawan aang co pusit ingkan arop eh, ciohboh co umpi kawan dulun jarin pali.” [

¹⁶ Amun nyau paham, ngoneh ehboh antun-Kuh pio-pio!]

¹⁷ Kotika Yesus naat dulun orong yoh hintang muntam lopo, kawan murid-Eh ngisok ma-Eh tintun maksut tindung cioh.

¹⁸ Useh Yesus, “Mainboh ikan incah arinai paham? Ikan sobulih monau bahawa kokon aranaang co muntam ponah bau aroko umpi kawan dulun jarin pali.

¹⁹ Tului, kawan aang taiyoh aroko muntam hia ponah atoi dulun, tapi muntam ponah olom eh, paluh pusit nyan kakus leh.” (Ma antun cioh, Yesus monjelas bahawa arelu oko kanon co pali.)

²⁰ Hien Yesus kole, “Ome co pusit ingkan atoi dulun, iyohboh co umpi kawan dulun jarin pali.

²¹ Awi, orong aang co jahat pusit ingkan ponah dulun, iyohonon ingkan atoieh. Kokon pikiran jahat yoh umpi dulun umpi dosa hokoruh, nako, ngompatoi,

²² hokoruh ma co bokon oruh atawa banai, pongalam, umpi aang jahat, nipu, umpi alogawi co nyongkohaan, bosingon atoi, mohina, bolecak, moho tomajar.

²³ Kokon co jahat yoh pusit ingkan atoi kolunon. Ciohboh co umpi dulun jarin luse atawa pali.

Bawe co bokon Yahudi porocaya bahawa Yesus bokuasa 7:24-30

²⁴ Opaiyoh, Yesus naat ika cioh paluh tulak hia derah Tirus. Nyan intin, Are muntam hia ico lopo. Are aroko kolu koraon dulun bokon bahawa Are oko nyan intin. Tapi iyoh aroko bodai awi kawan dulun monau Are dombut.

²⁵ Oko bawe co ngoneh tintun Yesus. Bawe cioh empun anak bawe co tonguasa roh jahat. Bawe cioh dombut hia Yesus, bosujut nyan paai-Eh,

²⁶ nyawot asi ma Yesus ika musir roh jahat cioh ingkan anak baweeh. Tapi, bawe cioh bokon dulun Yahudi. Are ingkan Penisia nyan propinsi Siria.

²⁷ Yesus mantun maeh, Aroko pantas monu rute co tonyodia indan kawan daja paluh tonyakah hia asu! Oluboh kawan daja bosuh houn!”

²⁸ Hien bawe cioh, “Bujur Tuhan. Tapi kawan asu taiyoh mahi haba kuman kawan juwuk rute co tomotokah kawan daja!”

²⁹ Hien Yesus, “Tului useh mu non, bulibat. Roh jahat ocop pusit ingkan anakmu!”

³⁰ Bawe cioh buli hintang noto anak eh kaling nyan pongaling eh. Roh jahat cioh ocop pusit ingkan are.

Yesus ngompio dulun borengen 7:31-37

³¹ Opaiyoh, Yesus naat derah Tirus. Are buah Sidon, hintang mitah derah Dekapolis, paluh tulak hia Danau Galilea.

³² Nyan intin, oko dulun co borengen hintang aroko boraoi lantas hopander. Kawan dulun mehen are hia Yesus paluh nyawot asi ina Yesus mandak silui-Eh nyan dulun cioh ika ngompio Are.

³³ Yesus mehen are ngocu arop doruo ingkan dulun orong yoh. Yesus pokuntam bua silui-Eh nyan tolingan dulun cioh. Paluh, Are ngiwoh hintang ngoncamak cola dulun cioh.

³⁴ Yesus nongkara hia langit, nyohorui hintang mantun ponah bohasa Yahudi, “Epata!” Artieh, ‘Topukapbat!’

³⁵ Kotika cioh ka tolingan dulun cioh boraoi ngoneh, hintang colaeh tongompio sohingga are boraoi lantas hopaner.

³⁶ Yesus ngosiit iroh ngesah aang cioh hia ome bewe. Tapi sasar Yesus ngosiit, sasar ka iroh monyebar eh.

³⁷ Uras dulun korinah kagum. Hien doh, “Are nguan kokon aranaang pio, co borengen piai-Eh boraoi ngoneh, co uong piai-Eh boraoi hopander!”