Markus 16 - Alkitab Porjanjian Baa Ponah Bohasa Dayak Siang

Yesus bolum hopuli 16:1-8

¹ Opah ondo Sabat ocop ohut, Salome, Maria Makdalena, hintang Maria tinan Yokobus moli kawan ramuan ika ngasai ontun Yesus ma ramuan cioh.

² Nyan ondo mengu, ngonyua-nyua lau, nyan waktu matanondo nyomput, iroh tulak hia kolowong.

³ Nyan benteng calan iroh mantun ico ma co bokon, “Omeboh co angar ngolinang batu tutup indan ito ina to lian muntam hia ponah guha kolowong cioh?”

⁴ Mula batu cioh korinah kahai. Tapi, kotika iroh dapot, iroh kito batu cioh ocop kolinang.

⁵ Paluh, iroh muntam hia ponah kolowong cioh. Hiah waktu iyoh, iroh kito ico bakah lehoi co hapo jubah bura tuot nyan topit kontou. Iroh jarin tokocit lau.

⁶ Tapi, bakah lehoi cioh mantun ma iroh, “Aroh takut! Koraong kuh ikan nganyap Yesus, dulun ingkan desa Nasaret, co ocop tonyompolaki yoh. Are arelu oko nyan intoi. Are ocop bolum hopuli! Haas, notoboh komatung ika mandak ontui-Eh yoh.

⁷ Makitu, tulak hia kawan murid-Eh, hintang Petrus. Mantun ma iroh bahawa Are angar tulak meleh houn hangki ikan hia propinsi Galilea. Ikan angar kito Are nyan idi nain co ocop Are mantun ma ikan batuh.”

⁸ Maka iroh pusit ingkan kolowong cioh paluh tongkoru awi tokocit hintang takut. Iroh aroko mantun ome-ome ma ome bewe, awi takut. Tapi kawan bawe taiyoh jion mara kokon tungon bakah lehoi cioh hia Petrus hintang kawan jolahaieh. Opah iyoh, Yesus leh nyoruhan kawan murid-Eh tulak momborita Tarung Pio hia ngolauh dunia. Iroh momborita Tarung ingkan Mohotara yoh co aroko piji angar niho, iyohonon tarung bahawa kolunon boraoi tonyolamat hintang norima pomolum co sokotahi-tahieh.

Antun tontiput co diwek Antun tontiput co ombu 16:9-20 Yesus poleha arop-Eh ma Maria Makdalena 16:9-11

⁹ Opah Yesus ocop bolum hopuli, ngonyua-nyua nyan ondo Mengu cioh, portama Are poleha arop-Eh ma Maria Makdalena, co piji Are musir pitu roh jahat ingkan arop eh.

¹⁰ Maka, Maria Makdalena tulak mara kojadian cioh hia kawan jolahan Yesus. Hiah waktu iyoh, iroh rahat jorung hintang nangih.

¹¹ Maria mara ma iroh kokon co tonotoeh, bahawa Yesus ocop bolum hopuli. Tapi, kotika iroh ngoneh iyoh, iroh aroko porocaya.

Yesus poleha arop-Eh ma duo murid-Eh 16:12-13

¹² Opah iyoh, duo murid Yesus nyolana nyan luar kota Yerusalem yoh. Hiah waktu iyoh, Yesus poleha arop-Eh ma iroh ma cara co bobeda ma ponoto tioh Maria.

¹³ Maka, murid duo iyoh hopuli mara kojadian cioh ma kawan murid co bokon. Tapi, iroh incah aroko porocaya.

Yesus poleha arop-Eh ma kawan murid-Eh hintang nyoruhan iroh ika momborita Tarung Pio 16:14-18

¹⁴ Kojekaieh, Yesus poleha arop ma sobalas murid-Eh hiah waktu iroh dahat kuman. Are nopoh iroh awi atoi doh makeng, iroh aroko porocaya ma kawan dulun co ocop kito Are opah Are bolum hopuli.

¹⁵ Paluh Are mantun ma iroh, “Tulakbat hia ngolauh dunia, momborita ehboh Tarung Pio hia kokon dulun.

¹⁶ Kawan dulun co aroko porocaya angar tomohukum. Tapi, kawan dulun co porocaya hintang tomombaptis angar tonyolamat.

¹⁷ Tuhboh kawan ciri kawan dulun co porocaya. Iroh angar sangup umpi aang co mosotahir isan otuh: Iroh angar musir roh jahat ponah arang-Kuh. Iroh angar hopander ponah kawan bohasa co aroko piji doh mompolajarieh.

¹⁸ Amun iroh nantot nyipo mohari atawa ngorih aranaang co boracun, nyipo hintang racun cioh aroko angar ngobohaya. Amun iroh mandak silun nyan dulun hotoro, maka dulun cioh angar mambuh.”

Yesus topangkat hia sorga 16:19-20

¹⁹ Opah Tuhan Yesus mantun iyoh ma iroh, Are tokatang hia sorga. Nyan idi Are tuot momorentah nyan ika co tohormat nyan topit kontoun Mohotara.

²⁰ Kawan murid-Eh tulak momborita Tarung Pio hia ngolauh dunia. Tuhan Yesus bogawi ponah arop doh ina doh lian umpi aang co mosotahir. Ma sanioh, Are mombukti bahawa co tomomborita doh bujur.