Markus 15 - Alkitab Porjanjian Baa Ponah Bohasa Dayak Siang

Yesus nyan tohimo Gubernur Pilatus 15:1-15

¹ Ngonyua-nyua lau, kokon Mahkamah agama Yahudi hokumpur, tomasuk kawan imam kopala, kawan pomimpin bangsa Yahudi hintang kawan guru agama Yahudi. Iroh umpi koputusan ina Yesus tomohukum matoi. Jadi, iroh mowot silun Yesus hapo rantai paluh mehen-Eh hia gubernur Pilatus. Hiah waktu iroh nyarah Yesus ma Pilatus,

² Pilatus ngisok ma Yesus, “Mainboh Iko laca dulun Yahudi?” Useh Yesus, “Sanioh hiemmu.”

³ Kawan imam kopala mongaju orong tondah ngolawan Are.

⁴ Pilatus ngisok kole ma-Eh, “Iko ngoneh orong tondah doh ma Iko. Kura Iko aroko museh ika ngilang arop-Mu?”

⁵ Tapi, Are aroko museh samah sindo, sohinga Pilatus hurong.

⁶ Hiah sika ondo raya Paskah, biasaeh gubernur Pilatus mombebas ico beti tohanan, sosuai ma sawot dulun orong.

⁷ Hiah waktu cioh oko dulun nyan seper co araieh Barabas. (Barabas tomokuntam ponah seper hontong bopira dulun tului momboruntak ngolawan pomorintah Romawi. Iroh mahi ngompatoi dulun ponah pomboruntakan cioh.)

⁸ Orong dulun hokumpur paluh nyawot hia Pilatus ina are mombebas ico beti tohanan isan co koliin eh.

⁹ Pilatus ngisok ma iroh, “Mainboh ikan nyau akuh mombebas Laca dulun Yahudi non?”

¹⁰ (Pilatus mantun sanioh awi are monau alasan kawan imam kopala nyarah Yesus hiaeh, iyohonon tului atoi doh bosingon ma Yesus.)

¹¹ Tapi kawan imam kopala mohasut dulun ngarun taiyoh ika nyawot ina Barabas co tomombebas indan doh.

¹² Maka, Pilatus mantun kole ma dulun ngarun yoh, “Amun sanioh, ome co ikan nyau akuh umpi tohimo dulun co tonisi me Laca dulun Yahudi non?”

¹³ Iroh noriak, “Nyompolaki Are!”

¹⁴ Hien Pilatus, “Tapi kojahatan ome co ocop tongompiai-Eh?” Tapi iroh sasar muhat noriak, “Nyompolaki Are!”

¹⁵ Awi Pilatus jere ngonjorih dulun ngarun yoh, maka are mombebas Barabas tului sawot doh. Tapi Yesus tomoncambuk. Paluh Pilatus nyarah Yesus hia kawan tontaraeh ika tonyompolaki.

Kawan tontara polea-lea Yesus 15:16-20

¹⁶ Opaiyoh kawan tontara Pilatus yoh mehen Yesus hia istana gubernur. Iroh naah kokon pasukan ika hokumpur nyan intin.

¹⁷ Paluh iroh molai polea-lea Are sobagai laca. Iroh pohapo jubah ungu ma-Eh. Iroh mahi nyalin somacam mahkota ingkan kawan pating hoduhi, holuh masang eh nyan tungkui kuhung-Eh.

¹⁸ Iroh pura-pura mihi hormat ma-Eh. Hien doh, “Hormat kaih yoh Laca Dulun Yahudi!”

¹⁹ Paluh, iroh ngiwoh-Eh hintang molantu kuhung-Eh hapo tuntu. Iroh mahi bolutut nyan toharep-Eh, pura-pura nyembah-Eh.

²⁰ Opah iroh polea-lea Are, iroh mukoi jubah cioh paluh pohapo hopuli lembon-Eh. Opaiyoh iroh mehen Are hia luar ika tonyompolaki.

Yesus tomaku nyan sompolaki 15:21-32

²¹ Hiah waktu iroh nyalan hia luar kota, iroh sopopak ma dulun ingkan kota Kirene. Araieh Simon. (Are iyohco taman Aleksander doruo Rupus.) Simon punai dombut ingkan luar kota. Kawan tontara maksa are ika nyanon sompolaki Yesus.

²² Iroh mehen Yesus hia ika co araieh Golgota, co artieh: ‘Ika Ongang’.

²³ Nyan intin, iroh mihi Yesus korih angur co bocampur ma mur. Tapi Are aroko kolu ngorih eh.

²⁴ Opaiyoh, iroh maku Are nyan sompolaki. Kawan tontara monu lembon Yesus paluh mundi ika hobagi-bagi lembon-Eh.

²⁵ Ondo kotika iroh nyompolaki Are jam suoi manyuap.

²⁶ Nyan topit hunyung sompolaki, iroh masang tulisan co monjelas alasan Are tomohukum. Santuh tulisan cioh, “Laca dulun Yahudi.”

²⁷ Homboh ma Yesus, iroh mahi nyompolaki duo beti ponjahat, co ico nyan topit kontoui-Eh hintang co icoeh kole nyan topit komuloi-Eh. [

²⁸ Ma sanioh, antun cotuh ponah Surat Borasih jarin nyata: “Are tomangap ico ingkan kawan dulun co jahat.”]

²⁹ Kawan dulun co nyihin nyan idi mohina Are samir ngiling kuhung. Hien doh, “Hei Iko co nyau nohop Lopo Mohotara holuh mangun eh hopuli ponah tolu ondo!

³⁰ Toka bat ingkan sompolaki conon! Nyolamat bat arop-Mu!”

³¹ Sanioh ka kawan imam kopala hintang kawan guru agama Yahudi. Iroh polea-lea Yesus. Hien doh ico ma co bokon, “Are ngawat dongai, tapi Are aroko hegah ngawat arop-Eh tarop!

³² Amun Are bujur-bujur Laca Dulun Israel, Laca Co Tomonjanji Mohotara, olueh Are toka ingkan sompolaki non! Amun kaih lian noto Are sangup nguan iyoh, kaih angar porocaya ma-Eh.” Duo beti ponjahat co tonyompolaki nyan hoponyila Yesus, iroh mahi mohina Are ka.

Yesus matoi 15:33-41

³³ Hiah jam duo balas maondo, ngolauh derah cioh jarin pindong lau dapot jam tolu macohit.

³⁴ Nyan jam tolu macohit, Yesus noriak ma suara muhat, “Eloi, Eloi, lama sabaktani?” Artieh, “Mohotarang-Kuh, Mohotarang-Kuh, kura Iko naat Akuh?”

³⁵ Bopira dulun co ngoneh iyoh aroko paham. Hien doh, “Noto! Are naah nabi Elia.”

³⁶ Ico beti ingkan iroh jion tulak monu aranaang co lian nosop cairan. Are monculup eh nyan ponah angur mosom holuh molilit eh nyan pungko doroh kaju. Are nyoroeh hia baun Yesus ina tongorih-Eh. Dulun cioh mantun, “Pioleh! Haas ito nundui hintang noto amun Elia dombut ika potoka Are ingkan sompolaki.”

³⁷ Paluh Yesus noriak, hintang diuh.

³⁸ Hiah kotika iyoh ka, horden nyan ponah Lopo Mohotara tirat tosah duo, ingkan hunyung dapot pinda.

³⁹ Oko kopala pasukan co tonjok nyan muka sompolaki Yesus. Are noto kokon co tojadi hiah kotika Yesus diuh. Jadi, are mantun, “Tuu, Dulun cotuh bujur-bujur Anak Mohotara!”

⁴⁰ Nyan intin oko ka bopira bawe co noto ingkan ocu. Nyan halo iroh iyohco Salome, Maria Makdalena, hintang Maria (tinan Yokobus co daja doruo Yoses.)

⁴¹ Iroh iyohco bawe co ngonulu Yesus hintang molayan Are hiah waktu Are nyan propinsi Galilea. Oko orong bawe co bokon ka co dombut hia Yerusalem homboh Yesus.

Yesus tongolowong ponah guha 15:42-47

⁴² Ondo cioh iyohco ondo Jomahat, ondo dulun Yahudi mondakan posiapan sorinai ondo Sabat molai. Ondoeh ocop jonyo mamalom, nyau molai ondo Sabat.

⁴³ Jadi, oko dulun co araieh Yusup, tulak hia gubernur Pilatus ika nyawot ijin amun are boraoi ngolowong ontun Yesus. (Yusup tuh borasar ingkan kota Arimatea. Are anggota Mahkamah agama Yahudi hintang are tomohormat dulun. Are mahi iyohco dulun co nganto Korojaan Mohotara dombut.) Ma hanyi, are nohimo Pilatus.

⁴⁴ Pilatus hurong ngoneh bahawa Yesus ocop matoi. Jadi, are naah kopala pasukan hintang ngisok main bujur Yesus ocop matoi.

⁴⁵ Opah ngoneh laporan ingkan kopala pasukan cioh, maka Pilatus mihi ijin ma Yusup ika monu ontun Yesus.

⁴⁶ Yusup moli benang kaci hintang borasih paluh tulak potoka ontun Yesus ingkan sompolaki. Are mungkuh ontun Yesus hapo benang cioh paluh pokaling-Eh nyan ponah guha kolowong co tonguan nyan ponah lungkuh batu. Are ngolinang loong batu nyan muka guha ika kolowong cioh ina nutup eh.

⁴⁷ (Maria Makdalena hintang Maria tinan Yoses noto nyan omoh Yesus tomokaling).