Markus 13 - Alkitab Porjanjian Baa Ponah Bohasa Dayak Siang

Lopo Mohotara angar tomohancur 13:1-2

¹ Kotika Yesus pusit ingkan polontaran Lopo Mohotara, ico murid-Eh mantun ma-Eh, “Pak Guru, notoboh! Lopo Mohotara yoh tomangun ma kawan batu co korinah koborohon eh. Kokon kawan bangunan nyan intin korinah kobungah eh!”

² Hien Yesus, “Iyoh, porhatieh boh kokon bangunan co bohimat lau tatuh. Nyan ico kotika daai, kokoieh angar tongohancur. Kokon bangunan tanon angar tomohancur dapot rata.”

Kawan murid Yesus angar tonyiksa 13:3-13

³ Opaiyoh, Yesus tulak hia lungkuh Jaitun. Are tuot nyan idi nohimo Lopo Mohotara. Nyan waktu cioh, Petrus, Yokobus, Yohanes, hintang Andreas dombut hia-Eh ika hopander tontarop ma Are. Hien doh,

⁴ “Dohop maraeh ma kaih, ngantoarai iyoh angar tojadi. Kawan ciri ome co porahan bahawa ocop waktueh?”

⁵ Yesus museh iroh, “Botawatboh! Aroh dapot ikan umba kawan aang co aroko bujur.

⁶ Awi orong dulun angar dombut co mongaku soolah-olah arop eh iyohco Akuh. Iroh angar mantun, ‘Akuboh Laca Co Tomonjanji Mohotara!’ Iroh angar nipu orong dulun.

⁷ Ikan angar ngoneh lotup ojat hintang tarung tintun ojat. Tapi aroh takut. Uras eh yoh sobulih tojadi. Tapi iyoh aroko borati dunia angar borahir ponah waktu co dokin.

⁸ Bangsa angar hokohojat ngolawan bangsa bokon. Nogara ngolawan nogara bokon. Nyan omoh-omoh angar oko dou onuh hintang gempa bumi. Tapi kokon aang taiyoh baya kotuhin ingkan kokon boncana co angar tojadi. Samah isan bawe co botohi nongkomo poroh hiah nyau nganak.

⁹ Ikan sobulih ati-ati awi ikan angar tonawan paluh tomehen hia sidang pomimpin agama ika tomongadili. Ikan angar tomolantu nyan kawan lopo ika sombayang. Tului ikan iyohco murid-Kuh, maka ikan angar tomehen hia kawan ponguasa hintang kawan laca ika tomongadili ka. Tapi, ciohboh waktueh ika ikan bosaksi tintun Akuh.

¹⁰ Tapi, Tarung Pio ingkan Mohotara yoh sobulih tonyebar houn hia kokon bangsa.

¹¹ Hiah waktu ikan tonawan paluh tomehen hia pongadilan, aroh koatir tintun luang antun co angar me pokusit ika ngilang arop me. Awi, nyan kotika iyoh, Roh Mohotara angar mihi ikan luang antun. Jadi, waktu iyoh, bokon ikan co hopander, tapi Roh Mohotara nyan ponah ikan co hopander.

¹² Daai angar tojadi bahawa dulun angar nyarah konduang doh ika tongompatoi. Sanioh ka, tama angar nyarah anak eh ika tongompatoi. Kawan anak angar ngolawan tinan-tamai eh, hintang nyarah iroh ika tongompatoi.

¹³ Kokon dulun angar ngodolee ikan awi ikan iyohco murid-Kuh. Tapi kokon dulun co tenden botahan, horoholuh porocaya ma-Akuh, sukun ahir eh, iroh angar tonyolamat.”

Kotika dulun korinah mondorita 13:14-23

¹⁴ Yesus mantun, “Oko tonulih nyan Surat Borasih tintun ‘ico dulun jahat co ngolumat’. Dulun cioh angar tonjok nyan ika co aroko pantas indaieh.” (Cotatan indan dulun co dahat mombaca otuh: Porhati ehboh ina iko momahami artieh.) Yesus ngoholuh pander, “Amun ikan kito aang cioh jarin nyata, maka kawan dulun nyan derah Yudea sobulih ngomuho arop doh hia kawan puruk.

¹⁵ Dulun co dahat eh nyan sapo lopo, aroh nosuloh ina monu barang-banda co oko nyan ponah lopoeh.

¹⁶ Isaniyoh ka dulun co dahat nyan umo, aroh hopuli ika monu buat dimpu eh.

¹⁷ Sasi lau kawan bawe co dahat botohi atawa incah pokosu anak ua nyan waktu cioh.

¹⁸ Bodoaboh ina waktu ikan ngomuho arop me, iyoh aroko tojadi nyan waktu sorang sorongin.

¹⁹ Awi, nyan kawan ondo taiyoh angar tojadi siksaan co poko bahat. Siksaan isan iyoh arinai piji tojadi ingkan Mohotara moncipta dunia tuh dapot makitu hintang aroko piji angar tojadi kole.

²⁰ Sompamaeh, waktu cioh aroko tongompian meleh singkat, maka arelu oko ico dulun mahi co botahan bolum. Tapi demi kawan dulun co tomili Tuhan, waktu cioh tongompian meleh singkat.

²¹ Nyan waktu cioh, amun oko dulun co mantun ma ikan, ‘Noto, Laca Co Tomonjanji Mohotara oko nyan intoi.’ Atawa ‘Are oko nyan idi,’ iyoh aroko bujur. Maka aroh ikan porocaya.

²² Awi, angar oko kawan dulun dombut co mongaku soolah-olah arop eh iyohco Laca Co Tomonjanji Mohotara. Tapi iroh aroko bujur. Angar oko kawan nabi palsu ka. Kawan laca palsu hintang kawan nabi palsu taiyoh angar umpi kokon macam aang co mosotahir ika umpi dulun jarin sasat. Sompamaeh bodai iroh mahi nyau umpi kawan dulun co tomili Mohotara jarin tosasat ka.

²³ Ngoneh ehyoh! Akuh ocop maraeh ma ikan tintun kawan aang tatuh sorinai tojadi.”

Kawan ciri co porahan Yesus angar dombut hopuli hia dunia tuh 13:24-32

²⁴ “Opah kotika kawan siksaan taiyoh, matanondo angar jarin pindong, hintang bulan aroko nontang bat.

²⁵ Kawan potondu angar nokah ingkan langit. Kawan ponguasa nyan langit angar guncang.

²⁶ Hiah waktu iyoh, kawan dulun angar noto Anak Kolunon dombut nyan hawun. Are angar porahan kuasa hintang komuliaan-Eh.

²⁷ Are angar nyoruhan kawan molekat-Eh ika ngumpur kawan dulun co tomili-Eh ingkan kokon ika nyan dunia.

²⁸ Bolajarboh ingkan cuntu cotuh tintun puun ara. Amun kawan pating eh jarin bunang hintang molai ngolunjung, tomonau me bahawa sorang tojah ocop jonyo.

²⁹ Isanioh ka amun ikan kito aang cioh tojadi, ikan monau bahawa waktueh ocop jonyo lau.

³⁰ Tuu bujur co tomantun Kuh tuh: Aroko kokon dulun ingkan jaman cotuh angar matoi sorinai kokoieh tojadi.

³¹ Porocayaboh antun-Kuh, awi oluco langit hintang tana angar lanyap, antun-Kuh mositi sumong kototahieh.

³² Tapi arelu oko dulun co monau ondo hintang jam eh Akuh dombut hopuli. Kawan molekat nyan sorga aroko monau hintang Anak mahi aroko koraoi ka. Baya Mohotara Tama leh co koraoi.”

Kawan murid Yesus sobulih horoholuh siap ma korombut-Eh hopuli 13:33-37

³³ “Ikan sobulih bojaga-jaga! Awi, ikan aroko monau ngantoarai ipat eh.

³⁴ Koadaan eh samah isan kesah cotuh: Oko ico tuan co naat lopoeh paluh tulak hia derah co ocu. Are mihi tugas ma hopomasing polayan eh, paluh nyuhu iroh murus lopoeh. Are mihi porentah ma dulun co bojaga tungkang, ina bojaga pio-pio.

^35-36 Jadi, iroh sobulih bojaga-jaga awi aroko koraon doh ngantoarai tuan tempun lopo yoh angar hopuli, mungkin nyan cohit ondo, mungkin nyan bontung malom, mungkin hiah waktu ulak nyuap, atawa mungkin hiah waktu matanondo nyomput. Amun nongkocok are dombut, aroh dapot are sangkum iroh dahat tirui. Sanioh ka ma ikan.

³⁷ Ome co tomantun-Kuh tuh ma ikan, tomantun Kuh ka ma kokon dulun: Bojaga-jagaboh!”