Markus 12 - Alkitab Porjanjian Baa Ponah Bohasa Dayak Siang

Yesus nyamah kawan pomimpin dulun Yahudi ma kawan potani co jahat 12:1-12

¹ Opaiyoh, Yesus hopander ma iroh hapo tindung. Hie-Eh, “Oko dulun co umpi kabun angur. Are nguan pagar toliut eh, ngali luwang ika mohoh bua angur taiyoh, hintang mahi mangun monara ika dulun monjaga kabun cioh. Opaiyoh, are posewa kabun cioh ma bopira potani, paluh are tulak mahah negri bokon.

² Hiah waktu sorang mutoi angur ocop dapot, empun kabun cioh nyoruhan polayan eh hia kawan potani ponyewa cioh ika monu bagian hasir kabun co jarin hak eh.

³ Tapi iroh nawan polayan cioh, molantu are, paluh nyuhu are buli aroko mihi ome-ome.

⁴ Tempun kabun cioh nyoruhan polayan bokon hia iroh. Tapi, iroh molantu polayan cioh ka, dapot kuhung eh haring. Iroh ngelat ngemor are ka.

⁵ Tempun kabun cioh nyoruhan polayan co bokon kole hia iroh. Tapi, iroh ngompatoi polayan cioh. Saniohboh sotarus eh ma orong polayan kole. Oko co tomolantu doh. Oko ka co tongompatoi doh.

⁶ Tapi, makitu tempun kabun cioh baya oko tisa ico dulun oni co boraoi tonyoruhan eh, iyohonon anak eh leh co tongasih eh. Are mantun ponah atoieh, ‘Mositi kawan potani tanon angar mohormat anakkuh.’ Jadi, kojekaieh, are nyoruhan anak eh hia iroh.

⁷ Tapi, kawan potani ponyewa taiyoh mantun samah iroh, ‘Are non daai co angar mowaris kabun cotuh. Ayu, ito ngompatoi are ina kabun cotuh angar jarin ito empui!’

⁸ Maka anak eh yoh tonawan, paluh tongompatoi. Ontuieh tomende doh hia luar kabun cioh.”

⁹ Paluh Yesus ngisok ma iroh, “Makitu, ome co angar tongompian tempun kabun cioh? Mositi are angar dombut paluh ngolumat kawan potani ponyewa taiyoh. Opaiyoh are angar momporocaya kabun cioh ma kawan dulun bokon.

¹⁰ Tantu ikan piji mombaca nyan Surat Borasih tintun otuh: Batu co tonongkuloi pian kawan tukang bangunan ocop jarin batu co poko penting ika bangunan eh.

¹¹ Tuhan co nguan iyoh! Indan to, kuan gawi-Eh yoh andar lau.”

¹² Kawan pomimpin agama ocop paham maksut ingkan kesah Yesus yoh. Kesah cioh nyala iroh. Jadi iroh jere nawan Are. Tapi hiah iyoh iroh aroko boraoi awi iroh takut ma dulun orong. Jadi, iroh tulak naat Are.

Kawan pomimpin dulun Yahudi gagal monjebak Yesus 12:13-27 Kisok tintun nahur pajak indan pomorintahan Romawi 12:13-17

¹³ Opaiyoh, bopira pomimpin agama Yahudi ingkan kolompok Parisi hintang kawan dulun co mondukung Laca Herodes cuhun tulak hia Yesus. Tujuan doh ika monjebak Yesus ma ico kisok.

¹⁴ Jadi, kawan dulun taiyoh dombut hia Yesus hintang mantun, “Pak Guru, koraon kaih Iko dulun co jujur. Iko majar ma kojujur tintun cara bolum sosuai ma porentah Mohotara. Iko aroko mila ma kawan dulun totentu. Tului iyoh, Iko aroko takut ma ome bewe. Monurut Iko, mainboh poraturan Mohotara co oko nyan ponah Hukum Torat kuhan ito nahur pajak hia Laca Roma atawa aroh?”

¹⁵ Tapi Yesus monau iroh pura-pura pio. Maka Are mantun ma iroh, “Kura ikan nyuwah monjebak Akuh? Cuba pototo ma-Akuh ico kodilat duit perak co koliin ikan hapo ika nahur pajak!”

¹⁶ Jadi, iroh mihi ico kodilat duit perak hia-Eh. Yesus ngisok ma iroh, “Gamar hintang aran omeboh tocetak nyan intin?” Iroh museh, “Gamar hintang aran Kaisar Roma.”

¹⁷ “Amun sanioh,” hien Yesus, “Mihilehboh indan Kaisar co jarin tioh Kaisar. Mihilehboh indan Mohotara co jarin tioh Mohotara!” Iroh hurong lau ngoneh useh Yesus yoh.

Kisok tintun bolum hopuli ingkan pompatoi 12:18-27

¹⁸ Opaiyoh, bopira pomimpin agama Yahudi co bokon dombut hia Yesus. Iroh ingkan kolompok Saduki co aroko porocaya dulun angar bolum hopuli opah matoi. Jadi, iroh nyuwah monjebak Yesus ma kisok. Hien doh,

¹⁹ “Pak Guru, Musa majar poraturan isan otuh: Amun oko bakah matoi, aroko empun anak, maka konduang eh sobulih kawin ma sindah eh yoh ina mihi koturunan indan konduang eh co ocop matoi yoh.

²⁰ Puji oko pitu beti dulun hokonduang. Co pokongongko ngoruh, bopira kotahieh paluh matoi aroko kojuan oko anak eh.

²¹ Paluh, konduang eh co koduo kawin ma sindah eh yoh. Tapi, are mahi matoi aroko kojuan empun anak. Sanioh ka tojadi ma konduang eh co kotolu.

²² Sanioh ka sotarus eh sukun konduang eh co kopitu. Kojekaieh, opah uras konduang yoh matoi, bawe cioh mahi matoi.

²³ Jadi, oko pitu dulun hokonduang co kawin ma bawe cioh. Amun bujur dulun lian bolum hopuli ingkan pompatoi, bawe cioh angar jarin oruh are comoh?”

²⁴ Useh Yesus ma iroh, “Ikan koliru lau awi ikan aroko paham Surat Borasih atawa kuasan Mohotara!

²⁵ Hiah waktu kawan dulun bolum hopuli, aroko angar oko hanak horuh bat. Iroh angar bolum samah isan molekat nyan sorga.

²⁶ Aang tintun kawan dulun bolum hopuli ingkan pompatoi oko nyan ponah Surat Borasih co tonulih Musa. Hiah waktu Mohotara hopander ma Musa ingkan ponah humput duhi co ngori apui, Mohotara mantun, ‘Akuhboh Mohotara co tonyembah Abraham, Ishak, hintang Yakub.’

²⁷ Mositi iroh bolum hopuli awi Mohotara aroko tonyembah dulun matoi. Mohotara tonyembah dulun co bolum! Ikan koliru lau!”

Kisok tintun porentah Mohotara co poko penting 12:28-34

²⁸ Oko guru agama Yahudi co ngoneh Yesus huseh-huseh ma kawan dulun Saduki taiyoh. Are monau bahawa Yesus mihi useh co tangar indan doh. Jadi, are dombut hia Yesus hintang ngisok, “Porentah Mohotara comoh co poko penting?”

²⁹ Useh Yesus, “Porentah co poko penting iyohco cotuh: ‘Ooi kokon dulun Israel, ngoneh ehyoh! Tuhan Mohotaran to iyohco kotikas-tikas eh Tuhan.

³⁰ Mongasihi ehboh tuu-tuu Tuhan Mohotarammu ma kotuun atoimu, ma kotuun tambung songammu, ma kotuun pikiranmu, ma kotuun kangkahmu.’

³¹ Porentah kodua iyohco cotuh: ‘Mongasihi boh sosamahmu isan iko mongasihi aropmu leh.’ Arelu oko porentah bokon co meleh penting hangki duo porentah cotuh.”

³² Guru agama Yahudi cioh mantun ma Yesus, “Tangar lau, Pak Guru! Useh-Mu bujur! Tuhan Mohotaran to iyohco kotikas-tikas eh Tuhan. Arelu oko Tuhan co bokon hangki Are.

³³ Mula kolunon sobulih mongasihi Are ma kotuun atoieh, ma kotuun pikiran eh, ma kotuun kangkah eh. Kolunon mahi sobulih mongasihi sosamah eh isan are mongasihi arop eh leh. Duo porentah cioh meleh penting hangki porsembahan komolum co tomapang hintang kokon porsembahan co bokon.”

³⁴ Yesus noto bahawa guru agama cioh ocop museh pio lau. Hintang Yesus mantun maeh, “Iko aroko ocu ingkan Korojaan Mohotara.” Opah iyoh aroko ico mahi dulun co bohanyi kole ngisok ma Yesus.

Yesus, Laca Co Tomonjanji Mohotara, aroko baya ingkan koturunan Laca Daud, tapi meleh bokuasa hangki iyoh 12:35-37

³⁵ Hiah waktu Yesus majar nyan polontaran Lopo Mohotara, Are mantun, “Mikir ehboh tintun Laca Co Tomonjanji Mohotara co tonisi ‘Kristus’. Kawan guru agama Yahudi mantun bahawa Kristus iyohco koturunan ingkan Laca Daud.

³⁶ Mula bujur iyoh. Tapi Roh Mohotara umpi Daud nulih antun cotuh: ‘Tuhan Mohotara mantun ma Tuhankuh: ‘Tuotboh nyan ika co tohormat nyan topit kontoung-Kuh, dapot Akuh pokalah kawan musuh-Mu, umpi iroh jarin isan tohucak paam Mu.’

³⁷ Ponah tulisan cioh, Daud naah Kristus sobagai ‘Tuhan’. Awi iyoh, Are aroh baya sokedar koturunan Daud bewe. Tapi Are meleh bokuasa hangki iyoh.” Dulun orong co oko nyan intin herak ngoneh Yesus majar.

Yesus mompokingat kawan murid-Eh aroh botingkah laku isan kawan guru agama Yahudi 12:38-40

³⁸ Hiah waktu Yesus majar, Are mahi mantun, “Botawatboh tohimo kawan guru agama Yahudi. Iroh herak poleser ma jubah co ombu sohinga iroh tokitan penting. Iroh herak tomohormat nyan pasar.

³⁹ Amun iroh dombut hia ika dulun sombayang atawa ika dulun pesta, iroh herak tuot nyan ika co tohormat atawa co pokopio.

⁴⁰ Iroh nipu kawan balu ika ngohaba harta balu taiyoh. Dapot lopo kawan balu mahi tomorampas doh. Iroh mucap doa co ombu-ombu, tapi iyoh baya pura-pura leh. Tului uras alogawin doh co jahat yoh, Mohotara Mositi angar mohukum iroh meleh bahat hangki dulun bokon.”

Porsembahan ico balu co mala 12:41-44

⁴¹ Nyan ico kotika, Yesus tuot nohimo kotak porsembahan hintang noto kawan dulun miing duit porsembahan hia ponah eh. Orong dulun tatou mihi duit co bahai nilaieh.

⁴² Paluh, oko balu co mala dombut. Are mihi duo kodilat duit logam co pokongolik nilaieh.

⁴³ Yesus naah kawan murid-Eh hintang mantun ma iroh, “Ngoneh ehyoh! Sobujur eh balu co mala cotuh mihi meleh orong hangki kokon dulun bokon co miing duit ponah kotak porsembahan conon.

⁴⁴ Awi, kokon doh mihi ingkan kolowin duit co iroh empui. Tapi balu co mala cotuh mihi ingkan kongurang duit tioh. Are mihi kokon duit co oko nyan are co ika moli kanoieh.”