Markus 11 - Alkitab Porjanjian Baa Ponah Bohasa Dayak Siang

Yesus tonyambut rami lau nyan kota Yerusalem 11:1-11

¹ Yesus hintang kawan murid-Eh jonyo dapot Yerusalem. Iroh dapot nyan ico ika dokin lowu Betpage hintang Betania, nyan beloi lungkuh Jaitun. Kotika iyoh, Yesus nyuhu duo murid-Eh tulak meleh houn.

² Hie-Eh, “Tulakbat hia lowu nyan muka di. Hiah waktu ikan ruo muntam hia lowu codi, ikan angar lansung kito ico koledai nampung ikuh tonambit. Koledai cioh arinai piji tonungang dulun. Mukoi koledai cioh paluh mehen hia intoi.

³ Amun oko dulun co ngisok, ‘Kura ikan mukoi koledai conon?’ Mantun ma dulun cioh, ‘Tuhan morulueh. Tapi Are angar jion nompulieh.’ ”

⁴ Koduo murid Yesus yoh mahi tulak, hintang ngohaba ico koledai dahat botambit nyan tungkang lopo nyan saran calan. Maka iroh mukoi tambit koledai cioh.

⁵ Bopira dulun co tonjok nyan intin mantun ma iroh, “Ome co piam me? Kura ikan mukoi koledai conon?”

⁶ Iroh museh nain co ocop tomantun Yesus niin. Maka, kawan dulun taiyoh moholu iroh mehen koledai cioh.

⁷ Paluh iroh nuntun koledai cioh hia Yesus hintang mandak kawan jubah doh nyan tungkui likut koledai cioh. Paluh Yesus tuot nyan tungkuieh.

⁸ Hiah waktu iroh nuntuh hia kota Yerusalem, oko orong lau dulun mampar kawan jubah doh nyan calan ika mohormat Are. Oko ka orong dulun co mampar kawan pating nyan calan, iyohonon tangkai kaju bolum co tomonu doh ingkan umo.

⁹ Orong dulun nyalan nyan muka hintang nyan uwoilikut Yesus. Iroh ngororoho jorih, “Hosana! Narabat Are co dombut ponah aran Tuhan Mohotara!

¹⁰ Ihin aang co pio hinut boh Korojaan angar dombut, nain co tomonjanji ma Daud, tatu hiang to. Koponara indan Are nyan ika co poko hunyung!”

¹¹ Opah iroh dapot nyan Yerusalem, Yesus muntam hia polontaran Lopo Mohotara. Are morisa kokon co tojadi nyan intin. Tapi awi ondo ocop jonyo pindong, Are hopuli hia Betania ma duo balas murid-Eh.

Yesus hotulut puun ara co aroko mua 11:12-14

¹² Nyuap ondoeh, Yesus hintang duo balas murid-Eh naat Betania hopuli hia Yerusalem. Ponah solanan, Are nongkomo dou.

¹³ Ingkan ocu, Are kito puun ara co ocop ngonoun. Jadi, Are ngoroni puun ara cioh ika noto pai oko buaeh. Tapi waktu Are dapot puun ara cioh, Are noto arelu oko bua ome-ome. Baya oko kawan douieh leh. Awi, nyan waktu iyoh mula arinai sorang bua ara.

¹⁴ Yesus mantun ma puun ara cioh, “Molai makitu aroko ico mahi dulun co angar kuman buamu bat!” Kawan murid-Eh ngoneh kawan antun-Eh yoh.

Yesus musir kawan podagang ingkan polontaran Lopo Mohotara 11:15-19

¹⁵ Opah Yesus hintang kawan murid-Eh dapot nyan Yerusalem, Yesus muntam kole hia polontaran Lopo Mohotara. Are musir kokon dulun co hoborakang-hobojuri nyan ika cioh. Are nobalik kawan meja co hapan pian kawan tukang nosuloi duit. Ngolungkang kawan bobangku co hapan pian kawan ponjuar porsembahan beleu merpati.

¹⁶ Are bosiit dulun mehen barang nyihin polontaran lopo Mohotara.

¹⁷ Paluh, Are majar iroh. Hie-Eh, “Antun Mohotara tonulih ponah Surat Borasih: ‘Lopo-Kuh iyohco lopo ika bodoa indan kokon bangsa.’ Tapi ikan umpieh jarin isan salah kawan porampuk!”

¹⁸ Kawan imam kopala hintang kawan guru agama Yahudi ngoneh tintun poristiwa cioh. Iroh takut ma-Eh awi kokon dulun kagum ma ajaran-Eh. Jadi, iroh nganyap cara ika ngompatoi-Eh.

¹⁹ Kotika ondo ocop jonyo pindong, Yesus hintang kawan murid-Eh pusit bat ingkan kota cioh.

Polojaran ingkan puun ara niin 11:20-26

²⁰ Kawut-kawut manyuap ondoeh, Yesus hintang kawan murid-Eh nyihin puun ara cioh niin. Iroh noto puun ara cioh ocop ngoholai, malah kawan akat eh ocop matoi.

²¹ Petrus topingkat ome co tojadi ico ondo soun maeh. Maka, are mantun ma Yesus, “Pak Guru, notoeh! Puun ara co tohotulut-Mu non ocop matoi!”

²² Useh Yesus ma iroh, “Porocaya boh ma Mohotara!

²³ Ngoneh ehyoh! Ikan sobulih porocaya bahawa ome co tomantun me mositi angar tojadi. Sika dulun co porocaya, aroko ragu-ragu, sompamaeh are nyuhu puruk cotuh, ‘Topangkat paluh topendebat hia laut!’ Maka aang cioh angar tojadi indaieh.

²⁴ Awi iyoh, Akuh mantun otuh ma ikan: Ome bewe co tonyawot me ponah doa, porocayaleh bahawa Mohotara ocop mihieh indam me. Paluh, ikan angar norimaeh.

²⁵ Amun oko dulun co sala ma ikan, mampun ehboh are sorinai ikan tonjok ika bodoa. Ikan sobulih nguan iyoh ina Mohotara Tamam me nyan sorga mahi angar mampun kawan dosam me. [

²⁶ Amun ikan aroko mampun dulun, maka Mohotara Tamam me nyan sorga mahi aroko mampun kawan dosam me.]”

Kawan pomimpin dulun Yahudi ngisok ma angit tintun kuasan Yesus 11:27-33

²⁷ Yesus hintang kawan murid-Eh tulak kole hia Yerusalem. Hiah Yesus nyalan nyan polontaran Lopo Mohotara, kawan imam kopala, kawan guru agama Yahudi, hintang kawan pomimpin bangsa Yahudi dombut hia-Eh.

²⁸ Iroh ngisok, “Ome hak-Mu umpi kokon iyoh? Omeboh co mihi kuasa cioh indam-Mu?”

²⁹ Hien Yesus ma iroh, “Akuh mahi ngisok ma ikan. Amun ikan museh Akuh, maka Akuh angar museh ikan tintun omeboh co mihi kuasa indang-Kuh ika umpi kokoieh tuh.

³⁰ Tuh boh kisok Kuh; Ome boh co mihi kuasa indan Yohanes ina mombaptis? Mohotara atawa kolunon?”

³¹ Jadi, iroh morunding eh nganyap useh nyan halo iroh. Hien doh, “Amun ito mantun, ‘Mohotara co mihi kuasa cioh indan Yohanes’, Yesus angar mantun, amun isanioh kura ikan aroko porocaya ma Yohanes?

³² Tapi ito mahi aroko boraoi mantun, ‘Baya kolunon co mihi kuasa cioh indaieh.’ ” (Kawan pomimpin taiyoh takut ma dulun orong, awi dulun orong porocaya Yohanes iyohco nabi Mohotara.)

³³ Maka iroh mantun ma Yesus, “Kaih aroko monau ome co mihi kuasa cioh indan Yohanes.” Yesus mantun, “Amun sanioh, Akuh mahi aroko angar maraeh ma ikan omeboh co mihi kuasa indang-Kuh ika nguan kokoieh tuh.”