Lukas 5 - Alkitab Porjanjian Baa Ponah Bohasa Dayak Siang

Yesus mili pira-pira beti dulun co tukang monyala ocin ika jarin murid-Eh 5:1-11

¹ Nyan ondo co bokon eh kole Yesus majar nyan banut Danau Genesaret. Kotika Yesus dahat majar, orong dulun hotoreset ngorumbung Are ika ngoneh Antun Mohotara. Aang conon ngoneroh Are co dahat porapot ajaran-Eh.

² Yesus noto oko duo jukung nyan banut cioh. Kawan dulun co tukang nganyap ocin yoh ocop toka ika ngorasih jala doh.

³ Yesus cakat hia ponah jukung ico beti dulun co tukang ngocin yoh arai Simon Petrus, paluh nyuhu are nosurung jukung cioh ocu isut ingkan banut, ika bohinai majar dulun orong taiyoh niin. Jadi, Yesus tuot majar ingkan tungkui jukung.

⁴ Opah majar, Are mantun ma Simon, “Pokocu jukung cotuh ingkan banut hia topit co jalom. Paluh nimbai jalamu ika haba ngahat ocin.”

⁵ Simon museh, “Guru, momi-momi tuh kaih monyala, aroko haba ome-ome. Tapi, awi Iko co nyuhu, maka akuh nyuwah nimbai jala cotuh kole,”

⁶ Hayak are nimbai jala cioh, maka jala cioh norek buah ocin hintang mias kuhat haba doh ocin dapot jala cioh molai tirat.

⁷ Maka iroh ngipai hapo silun doh ika mihi tanda ma kawan jolahan doh co nyan jukung co bokon ika dohop iroh. Iroh dombut, paluh dohop nyangan duo jukung yoh ma ocin. Karas kongorong ocin haba doh dapot jukung cioh asit dotong.

^8-10 Kokon dulun co tukang ngocin yoh potohurong-hurong tului kongorong ocin co haba doh yoh. Kawan jolahan Simon mahi, araieh Yokobus hintang Yohanes, kawan anak Jebedeus. Noto kuasan Yesus co ingkan Mohotara yoh, Simon nongkomo arop eh dulun co bodosa. Are paluh bolutut nukup nyan tohimo Yesus. Hieeh, “Pokocu arop mu ingkan akuh Tuhan! Awi akuh tuh bolum bodosa.” Tapi Yesus mantun ma are, “Aroh takut. Batuh iko tukang nganyap ocin, tapi ingkan makitu iko angar nganyap dulun ika jarin murid-Kuh.”

¹¹ Simon hintang kawan tongkanyoh eh ngocet duo jukung yoh hia saran banut. Paluh iroh molenteng kokoieh kawun jarin murid Yesus.

Yesus pomambuh ico beti dulun hoboro 5:12-16

¹² Nyan ico ondo, dahat Yesus nyan ico desa nyan derah Galelia yoh, oko ico bakah, kokon betieh buah boro. Kotika noto Yesus, are bolutut paluh nyawot dohop, “Tuan, dohop ngompio akuh. Amun Tuan kolu, Tuan boraoi ngompio akuh.”

¹³ Yesus nyoro silui-Eh, ika ngoncamak dulun cioh. Hie-Eh, “Akuh kolu, pio bat!” Paluh toro cioh niho ingkan betieh.

¹⁴ Yesus paluh bosiit dulun cioh mara aang co piai-Eh yoh ma ome bewe. Hie-Eh, “Tulak hia imam houn. Nyawot are nukas eh iko co ocop pio. Paluh tulak hia Lopo Mohotara nyan kota Yerusalem, mihieh bat porsembahan sosuai ma hukum agama indan dulun co punai niho boroeh. Cotuh jarin bukti ma dulun, bahawa iko bujur-bujur ocop pio.”

¹⁵ Oluco tongosiit Yesus dulun cioh maraeh, tarung cioh tenden tosebar hantin-hanoh, dapot orong dulun dombut ika ngoneh Yesus. Iroh yoh mahi nyawot ika topomambuh ingkan toro doh.

¹⁶ Maka Yesus derek pokocu arop-Eh hia ika co ngolohiui ina boraoi bodoa.

Pomambuh dulun lumpuh, Yesus mihi bukti bahawa Are bokuasa mongampun dosa 5:17-26

¹⁷ Nyan ondo co bokon Yesus majar nyan ico lopo. Nyan intin oko pira-pira beti guru hukum agama Yahudi hintang pira-pira pomimpin agama ingkan kolompok Parisi. Iroh tuot ngoneh Yesus majar. Iroh dombut ingkan kokon desa nyan derah Galilea hintang derah Yudea, hintang ingkan Yerusalem. Mohotara mihi kuasa indan Yesus ika pomambuh dulun hotoro.

¹⁸ Kotika cioh pira-pira beti dulun dombut mehen dulun co lumpuh co kaling nyan tungkui ihap. Iroh bousaha mehen dulun cioh hia ponah lopo ika lian mandak eh nyan muka Yesus ika tongompio.

¹⁹ Tapi iroh aroko boraoi muntam tului dalo kuhat dulun. Jadi iroh mehen dulun cioh nukat hia sapo paluh nutuh sapo cioh hintang tomulur doh are hintang ihap eh, mandak are nyan tohun dulun orong yoh tangar nyan muka Yesus.

²⁰ Kotika Yesus noto iroh porocaya ma Are bokuasa ika pomambuh, hien Yesus ma dulun co lumpuh cioh, “Konduang, Akuh mongampun dosam mu.”

²¹ Kawan guru hukum Yahudi hintang pomimpin agama ingkan kolompok Parisi molai mantun samah arop doh, “Dulun cotuh arelu oko hak eh ika mantun nain onon! Are mantun samah ma Are co Mohotara! Baya Mohotara co boraoi mongampun dosa!”

²² Yesus monau aang co tomikir doh. Are nagur iroh, “Pikiran nyan ponah songam me sala lau!

²³ Comoh co meleh bohinai, mantun ‘Dosam mu ocop tomongampun’ atawa mantun ‘Tonjokbat hintang nyalanbat?’

²⁴ Jadi amun Akuh pomambuh dulun co lumpuh cotuh, ikan angar monau bahawa Anak Kolunon bokuasa mongampun dosa!” Yesus mantun ma dulun co lumpuh yoh, “Tonjok hintang ngatang ika pongaling mu non paluh buli bat!”

²⁵ Nyua dulun cioh kokat nyan muka kokon dulun orong yoh, ngatang ihap co ika pongaling eh, paluh buli samir nara Mohotara.

²⁶ Kokon dulun nyan intin kagum, paluh nara Mohotara. Oko ka co nongkomo takut dapot mantun, “Mosotahir lau poristiwa co ocop kitan to ngondaii cotuh!”

Yesus hojolahan ma kawan dulun co tomangap bodosa 5:27-32

²⁷ Opah iyoh, Yesus pusit ingkan desa cioh. Nyan intin oko ico beti dulun Yahudi co tukang takih pajak indan pomorintah Romawi. Araieh Lewi, dahat eh tuot nyan lopo co ika ngumpur pajak ingkan kawan dulun yoh. Yesus paluh noto Lewi. Hie-Eh, “Umba jarin murid-Kuh!”

²⁸ Lewi paluh tonjok, molenteng kokoieh, paluh jarin murid Yesus.

²⁹ Paluh nyan lopoeh, Lewi umpi pesta indan Yesus. Orong tukang takih pajak hintang dulun bokon umba kuman homboh-homboh ma iroh.

³⁰ Tapi kawan pomimpin agama ingkan kolompok Parisi hintang kawan guru hukum agama Yahudi ngolomumut. Iroh mantun ma kawan murid Yesus, “Kura ikan kuman ngorih homboh-homboh ma kawan tukang takih pajak hintang dulun bokon co bodosa? Conon sala!”

³¹ Yesus museh, “Kawan dulun co nongkomo arop eh sehat aroko porulu ma dokter, tapi kawan dulun co hotoro mositi porulu ma dokter.

³² Jadi Akuh dombut aroh ika naah iroh co bujur. Tapi Akuh dombut ika naah kawan dulun co bodosa ina naat kawan dosan doh.”

Yesus monarang alasan kura kawan murid-Eh aroko puasa 5:33-39

³³ Kawan dulun ngisok Yesus, “Kawan murid Yohanes Pombaptis derek puasa hintang bodoa. Murid dulun Parisi isan iyoh ka. Tapi kawan murid-Mu aroh. Kura iroh tenden kuman hintang ngorih?”

³⁴ Useh Yesus ma iroh, “Lian pai kawan tongkanyoh ponganten bakah tonyuhu puasa dahat ponganten bakah incah oko halo iroh? Mositi aroh!

³⁵ Tapi, angar oko leh kotikaeh, amun ponganten bakah onun ingkan iroh. Nyan kotika cioh bat, iroh angar puasa.”

³⁶ Paluh Yesus majar hapo kesah cotuh, “Arelu oko dulun co numpang barun co usang hapo kain co tonirat ingkan barun co baa. Awi barun co baa yoh angar tirat tuluieh. Mahi ma kain barun co baa yoh aroko cucuk ma kain barun co houn yoh.

³⁷ Ma cuntu co bokon, arelu oko dulun co mika angur co puga nyan kantung upak ocin co usang, awi kotika angur co baa yoh lanoh buah dagi paluh mangkar, maka kantung cioh bolontup. Tului kantung cioh bolontup maka angur eh tusoh.

³⁸ Angur co baa sobulih tomika nyan kantung co baa ka.

³⁹ Arelu oko dulun co kolu ngorih angur co baa opah ngorih angur co tahi lanoh awi hien doh angur co tahi lanoh yoh hinut.”