Lukas 4 - Alkitab Porjanjian Baa Ponah Bohasa Dayak Siang

Yesus manang kotika Are tonyuwah Lacan Setan ina-Eh nompi dosa 4:1-13

¹ Yesus naat Sungoi Yordan ika-Eh tomombaptis. Roh Mohotara horulut Are hia padang gurun co ngolohiui.

² Dahat Yesus oko nyan intin, kotahin opat pulu ondo Lacan Setan nyuwah Yesus ika nompi dosa. Kotahin iyoh Yesus aroko kuman ome-ome. Kosodahai karas bat kodou-Eh.

³ Hien Lacan Setan ma Yesus, “Amun Iko bujur-bujur Anak Mohotara, nyuhu boh batu cotuh jarin rute, ina oko aang co boraoi kanom-Mu.”

⁴ Tapi hien Yesus ma Lacan Setan cioh, “Antun Mohotara co tonulih ponah Surat Borasih, ‘Dulun aroko baya porulu ma kanon bewe ika bolum.’ ”

⁵ Opah iyoh Lacan Setan mehen Yesus tulak hia ika co poko hunyung. Ponah sokorobilop mata Setan ninjueh ma Are kokon korojaan nyan dunia.

⁶ Hien Lacan Setan ma Yesus, “Kokon kokuasaan hintang koponatou conon angar tonyarah kuh Indam, awi kokoi tuh ihin indang-kuh, jadi akuh boraoi mihi kokoi ma ome bewe co tomili-kuh.

⁷ Amun Iko nyembah akuh, maka akuh angar mihi kokon aang tanon indam-Mu.”

⁸ Tapi hien Yesus ma Lacan Setan, “Antun Mohotara co tonulih nyan ponah Surat Borasih, ‘Nyembah Tuhan, Mohotaram mu. Baya molayan Are leh.’ ”

⁹ Opah iyoh Lacan Setan mehen Yesus hia kota Yerusalem paluh nyuhu Are tonjok nyan ika co poko hunyung nyan tungkui Lopo Mohotara. Hieeh, “Amun Iko tuu-tuu Anak Mohotara, nomposut leh!

¹⁰ Iko aroko angar poroh, awi oko antun Mohotara co tonulih nyan Surat Borasih, ‘Mohotara angar nyuhu kawan molekat-Eh ngawat Iko.

¹¹ Hapo silun doh, iroh angar nyambut Iko, maka paam-Mu mahi aroko angar dingan tului buah batu!’ ”

¹² Tapi hien Yesus ma Lacan Setan, “Antun Mohotara co tonulih nyan Surat Borasih, ‘Aroh nyuwah Tuhan, Mohotaram-Mu!’ ”

¹³ Opah Lacan Setan umbot nyuwah ina Yesus bodosa ma orong macam cara, are naat Yesus paluh nganto waktu co pio ika are nyuwah-Eh kole.

Yesus molai gawi-Eh nyan derah Galilea 4:14-15

¹⁴ Opah iyoh, Yesus buli hia derah Galilea, tonguasa pian kuasan Roh Mohotara. Tarung tintun Are tosebar nyan derah cioh.

¹⁵ Are majar nyan kawan lopo ika sombayang nyan intin. Paluh kokon dulun potara Are.

Kawan dulun nyan lowun Yesus kuloi Are 4:16-30

¹⁶ Nyan derah Galilea yoh, Yesus dombut hia kota Nasaret, lowu ika-Eh tongomahai. Nyan ondo Sabat, isan koliin Are dombut hia lopo ika sombayang. Paluh, Are tonjok, maju hia muka ika mombaca Surat Borasih.

¹⁷ Buku Nabi Yesaya tonyarah doh ma Are. Are mukap eh, popak kawan antun co jere tomombaca-Eh. Tuh boh kawan antun co tomombaca-Eh,

¹⁸ “Roh Tuhan oko nyan Akuh, awi Are ocop mili Akuh ika ngorapot Tarung Pio indan kawan dulun mala; Are nyoruhan Akuh ika potarung otuh:

¹⁹ kawan dulun tohanan, angar tongomebas; kawan dulun co bobuto angar boraoi noto; Are nyoruhan Akuh ika ngomebas kawan dulun co tonindas. Are nyoruhan Akuh ika potarung eh makitu iyohonon kotikaeh Tuhan poleha asi-Eh.”

²⁰ Yesus mongkulung buku cioh paluh mihi hopuli hia potugas nyan lopo ika sombayang. Paluh Are tuot ika majar. Kokon dulun co oko nyan ponah lopo ika sombayang yoh noto hintang nyoroli Are.

²¹ Paluh, Are molai majar iroh. Hie-Eh, “Nyan ngondaii cotuh, kotika me ngoneh eh, nain antun ingkan Buku nabi Yesaya tuh ocop tomolalus.”

²² Kokon dulun nyan intin nisi Are yoh dulun co pio hintang iroh hurong ma kawan antun-Eh co pio lau. Hien doh, “Podahar Are tuh baya anak Yusup, mikeh eh?”

²³ Maka hien Yesus ma iroh. “Mositi ikan angar nisi paribohasa cotuh ma Akuh, Haas, dokter, otoi pomambuh arop-Mu tarop leh. Umpi boh nyan intoi ka nyan ika asal-Mu tuh kokon co ocop piam-Mu nyan kota Kapernaum.”

²⁴ Paluh Yesus mantun kole, “Ngoneh eh bat, sobujur eh arelu oko nabi co tomoleka nyan ika asal eh.

²⁵ Cuntueh co nyata ingkan jaman Nabi Elia sinan. Oko buah kodou co karas nyan ngolauh negri awi kotahin tolu toun sotengah aroko ucan. Nyan kotika cioh oko orong balu nyan Israel.

²⁶ Tapi Mohotara nyoruhan Elia aroh ma iroh tapi hia balu co nyan luar Israel, nyan desa Sarpat, dokin kota Sidon.

²⁷ Cuntueh kole ingkan jaman Nabi Elisa sinan. Orong dulun buah boro, tapi aroko ico beti mahi co tongompio-Eh. Baya Naaman, dulun co ingkan negri Siria aroh dulun ingkan Israel. Are leh co tongompio.”

²⁸ Ngoneh antun Yesus yoh kokon dulun co ponah lopo ika sombayang yoh karas angit doh.

²⁹ Iroh tonjok, momaksa Are pusit ingkan desa cioh, mehen Are hia bilah puruk nyan desa doh. Kojere doh nahak Are hia bilah cioh.

³⁰ Tapi Yesus otoi nyalan nyihin nyan tohun pulo dulun orong yoh, paluh naat iroh.

Yesus musir roh jahat 4:31-37

³¹ Opah iyoh Yesus tulak hia kota Kapernaum nyan derah Galelia. Nyan intin Are majar kawan dulun nyan ondo Sabat.

³² Are mantun ma kuasa. Jadi, iroh kagum noto cara-Eh majar.

³³ Nyan intin, nyan lopo ika sombayang oko dulun co tonyarung roh jahat. Roh jahat cioh, nompi dulun cioh noriak hokonyangit,

³⁴ “Aah! Yesus, dulun Nasaret, Iko jere nompi ome ma kaih? Koraong kuh Iko co aroko bodosa ingkan Mohotara! Mainboh Iko dombut ika ngolompuh kaih makitu?”

³⁵ Yesus ngorangat roh jahat cioh, “Tonih! Pusitbat iko ingkan dulun cotuh!” Paluh roh jahat cioh nompi dulun cioh ikaeh tahak nyan tohimo dulun orong, paluh pusit ingkan dulun cioh hintang aroko ngomporoh eh

³⁶ Kokon dulun kagum lau. Jadi iroh mantun samah arop doh, “Indoh! Harat lau antun cotuh! Ma kuasai Are nyuhu kawan roh jahat taiyoh pusit, paluh iroh nontumun kawan antun-Eh!”

³⁷ Maka tarung tintun Yesus tosiar ngolauh derah cioh.

Yesus pomambuh umpu Simon hintang kawan dulun co bokon 4:38-41

³⁸ Opah iyoh, Yesus pusit ingkan lopo ika sombayang cioh, tulak hia lopo Simon. Tinan oruh Simon karas pondam eh. Jadi iroh nyawot Yesus pomambuh eh.

³⁹ Paluh Yesus ngoroni pongaling umpu Simon yoh, paluh nyuhu pondam cioh pusit. Are paluh mambuh. Kotika cioh ka, umpu Simon tonjok paluh molayani iroh.

⁴⁰ Hayak ondo cohit, kawan dulun mehen kokon dulun co hotoro hia Yesus. Iroh noro orong macam toro. Yesus mandak silui-Eh nyan hunyung iroh hopomasing, pomambuh iroh.

⁴¹ Yesus mahi nyuhu kawan roh jahat pusit ingkan orong dulun. Paluh kawan roh jahat taiyoh mahi pusit samir noriak-riak, “Iko tuh Anak Mohotara!” Awi puna koraon doh Are puna Laca Co Tomonjaji Mohotara. Tapi Yesus karas lau nagur iroh, bosiit iroh mantun, awi arinai dapot kotikaeh ika dulun monau aang cioh.

Yesus majar nyan kawan kota nyan derah Yudea 4:42-44

⁴² Manyuap ondoeh, Yesus naat kota Kapernaum yoh, tulak hia ico ika co ngolohiui. Tapi orong dulun nganyap Are. Kosodahai popak doh Are, paluh nyawot ina-Eh aroh naat iroh.

⁴³ Tapi Are mantun ma iroh, “Akuh sobulih momborita tintun tarung Korojaan Mohotara, nyan kawan kota co bokon ka. Conon leh alasan Akuh tonyoruhan Mohotara hia dunia tuh.”

⁴⁴ Jadi Are tulak momborita tarung cioh nyan ponah kawan lopo ika sombayang nyan ngolauh propinsi Yudea.