Lukas 3 - Alkitab Porjanjian Baa Ponah Bohasa Dayak Siang

Polayanan Yohanes pombaptis 3:1-20

¹ Oko laca Romawi araieh Tiberius. Kotika are momorintah kotahin limo balas toun Pontius Pilatus jarin gubernur nyan derah Yudea; Herodes momorintah nyan derah Galilea, konduang Herodes iyohonon Pilipus momorintah nyan derah Iturea hintang derah Trokonitis; Lisanias momorintah nyan derah Abilene.

² Kotika cioh Imam dulun Yahudi co poko hunyung jabatan eh iyohonon Hanas paluh tonganti Kayapas. Kotika cioh Mohotara mantun ma Yohanes, anak Jakaria. Mohotara mantun ma are kotika are nyan padang gurun.

³ Maka Yohanes nyalan hia ngolauh derah sungoi Yordan hintang porapot tarung ingkan Mohotara. Yohanes mantun naah, “Naat dosa hintang hopompaluh ngonyorih songan Mohotara kawun ikan sobulih tomombaptis ina Mohotara mongampun dosam me.”

⁴ Korombut Yohanes ocop tahi oko tonulih nyan buku Nabi Yesaya. Nabi Yesaya nulih tintun dulun co angar nyuhu dulun mubah cara kobolum doh. Santuh nain antun eh nyan ponah buku cioh: “Oko dulun co mantun muhat nyan padang pasir, ‘Nyodiaeh bat calan indan Tuhan. Nongkorong eh bat calan indai-Eh.

⁵ Kokon duak sobulih tonimbuk. Kokon puruk hintang lungkuh sobulih tomorata. Nongkorong eh bat kawan calan co mengkong, porataeh ka kawan calan co lumbang-lembut.

⁶ Maka kokon dulun angar noto kosolamat co dombut ingkan Mohotara.’ ”

⁷ Orong dulun Yahudi dombut ika tomombaptis. Maka Yohanes mantun, “Haas lih ikan tuh dulun co jahat hintang licik isan lacan setan! Aroh bopikir ikan boraoi buho daai ingkan hukuman Mohotara.

⁸ Polehaeh ma gawim me, ikan co ocop hubah ingkan kawan dosam me! Aroh co nisi Abraham non tatu hiang me. Ingat: Ingkan kawan batu tatuh ka Mohotara boraoi nampa utuh utek Abraham.

⁹ Mohotara angar mohukum dulun co aroko naat dosa hintang aroko ngonyorih songai-Eh. Are samah ma dulun co ocop maut kapak ika nowong kaju dapot akat eh. Kokon kaju co aroko pio buaeh, angar tonowong paluh tomende hia ponah apui.”

¹⁰ Tapi kawan dulun taiyoh ngisok ma Yohanes, amun isanioh “Ome co sobulih pian kaih?”

¹¹ Yohanes museh, “Dulun co oko tempun duo barun sobulih mihi ico indan dulun co aroko hobarun. Dulun co oko kanoi, sobulih magieh ma dulun co arelu oko kanoieh.”

¹² Bopira kawan dulun tukang takih pajak dombut hia Yohanes, ika are mombaptis iroh. Iroh ngisok, “Guru ome co sobulih pian kaih?”

¹³ Yohanes museh, “Aroh nakih pajak orong hangki co ocop tonantu pian pomorintah.”

¹⁴ Oko ka kawan tontara co ngisok, “Maindeoi tintun kaih tuh? Ome co sobulih pian kaih?” Yohanes museh, “Aroh momaksa nyawot duit. Aroh nompi tondah co aroko bujur ika bohujung indan tarop. Cukup leh ikan ma gajih me.”

¹⁵ Kotika cioh kawan dulun nganto korombut Laca Co Tomonjaji Mohotara. Kokon doh molai ngisok ponah songan doh, mainboh Yohanes yoh laca cioh.

¹⁶ Awi iyoh Yohanes mantun, “Akuh bokon ma Laca Co Tomonjanji Mohotara. Tapi aroko tahi onieh Are angar dombut. Are meleh bokuasa hangki akuh. Jarin polayan-Eh co poko randah, mahi akuh aroko patut. Akuh mombaptis dulun ma danum bewe. Tapi Are angar mombaptis dulun ma Roh Mohotara hintang ma apui.

¹⁷ Are angar misah dulun bujur ma dulun co jahat, isan dulun nyan ika ngoleet gandum mende ampoh eh hapo alat tilih. Gandum co pio angar tongumpur ponah uwung, tapi ampoh eh angar tomapang-Eh ponah apui co aroko boraoi picop.”

¹⁸ Isan iyoh Yohanes nosehat dulun hapo orong macam cara, kotika are momborita Tarung Pio.

¹⁹ Yohanes mahi nopoh Herodes, gubernur Romawi nyan derah Galilea, awi Herodes ngoruh Herodias, oruh konduang eh, kotika konduang eh incah bolum. Yohanes nopoh are tului kawan kojahat eh co bokon ka.

²⁰ Tapi Herodes malah nambah kojahat eh. Are pokuntam Yohanes hia ponah seper.

Yesus tomombaptis hintang Roh Mohotara toka hia tungkui-Eh 3:21-22

²¹ Tapi sorinai Yohanes topokuntam hia ponah seper, orong dulun dombut ika tomobaptis. Isanioh ka Yesus. Kotika Are dahat bodoa, langit pukap

²² hintang Roh Mohotara toka hia tungkui-Eh isan burung dara. Paluh koneh suara Mohotara mantun ingkan sorga co nisi, “Iko leh Anak-Kuh co tongasih-Kuh, Iko ngonjorih songang-Kuh.”

Jereh Yesus 3:23-38

²³ Kotika Yesus molai kawan gawi-Eh, umur-Eh kira-kira tolun pulu toun hintang tomangap dulun, Are anak Yusup; Yusup anak Eli;

²⁴ Eli anak Matat; Matat anak Lewi; Lewi anak Malki; Malki anak Yanai; Yanai anak Yusup;

²⁵ Yusup anak Matica; Matica anak Amos; Amos anak Nahum; Nahum anak Hesli; Hesli anak Nagai;

²⁶ Nagai anak Maat, anak Matica; Matica anak Simei; Simei anak Yosek; Yosek anak Yoda;

²⁷ Yoda anak Yohanan; Yohanan anak Resa; Resa anak Yerubabel; Yerubabel anak Seltiel; Seltiel anak Neri;

²⁸ Neri anak Malki; Malki anak Adi; Adi anak Kosam; Kosam anak Elmadam; Elmadam anak Er;

²⁹ Er anak Yesua; Yesua anak Elieser; Elieser anak Yorim; Yorim anak Matat; Matat anak Lewi;

³⁰ Lewi anak Simeon; Simeon anak Yehuda; Yehuda anak Yusup; Yusup anak Yonam; Yonam anak Elyakim;

³¹ Elyakim anak Melea; Melea anak Mina; Mina anak Matata; Matata anak Natan; Natan anak Daud;

³² Daud anak Isai; Isai anak Obet; Obet anak Boas; Boas anak Salmon; Salmon anak Nahason;

³³ Nahason anak Aminadap; Aminadap anak Admin; Admin anak Arni; Arni anak Hesron; Hesron anak Peres; Peres anak Yehuda;

³⁴ Yehuda anak Yakup; Yakup anak Ishak; Ishak anak Abraham; Abraham anak Terah; Terah anak Nahor;

³⁵ Nahor anak Seruk; Seruk anak Rehu; Rehu anak Pelek; Pelek anak Eber; Eber anak Salmon;

³⁶ Salmon anak Kenan; Kenan anak Arpaksat; Arpaksat anak Sem; Sem anak Nuh; Nuh anak Lamek;

³⁷ Lamek anak Metusalah; Metusalah anak Henok; Henok anak Yared; Yared anak Mahaleleel; Mahaleleel anak Kenan;

³⁸ Kenan anak Enos; Enos anak Set; Set anak Adam; Adam anak Mohotara.