Lukas 20 - Alkitab Porjanjian Baa Ponah Bohasa Dayak Siang

Kawan pomimpin dulun Yahudi ngisok, kuasa ome boh co hapan Yesus 20:1-8

¹ Ico ondo co bokon kole, nyan polontaran Lopo Mohotara, Yesus majar hintang momborita Tarung Pio tintun Korojaan Mohotara. Kotika Are majar, dombut kawan imam kopala, kawan guru Yahudi hintang kawan pomimpin dulun Yahudi co bokon.

² Hien doh sangit ma Are, “Ome hak-Mu nompi uras aang tanon? Ome co mihi kuasa conon indam-Mu?”

³ Yesus mantun, “Akuh jere ngisok ikan soun.

⁴ Ome co mihi kuasa ika Yohanes boraoi mombaptis? Mohotara atawa kolunon?”

⁵ Jadi, iroh morunding kisok cioh ma samah arop doh. Hien doh, “Amun ito nisi, ‘Mohotara co mihi kuasa cioh indaieh’ Yesus angar nagur ito tului ito aroko porocaya ma antun Yohanes tintun Are.

⁶ Tapi amun ito nisi, ‘Baya kolunon co mihi kuasa cioh ma are’ kokon dulun nyan intoi angar medak ito ma batu dapot to matoi, tului iroh porocaya Yohanes yoh nabi co tomihi kuasa ingkan Mohotara.”

⁷ Maka iroh museh “Kaih aroko monau ome co mihi kuasa cioh indan Yohanes ika boraoi mombaptis.”

⁸ Hien Yesus, “Amun isanioh, Akuh mahi aroko angar maraeh ma ikan ome co mihi kuasa indang-Kuh ika nompi kokon aang tatuh.”

Yesus nyamah kawan pomimpin dulun Yahudi ma kawan potani ponyewa co jahat 20:9-19

⁹ Paluh Yesus majar kawan dulun nyan polontaran Lopo Mohotara hapo kesah cotuh, “Oko ico beti dulun co mukap lahan baa ika bokabun angur. Are posewa kabun cioh ma kawan potani, paluh tulak hia negri co bokon botoun-toun kotahi.

¹⁰ Kotika dapot bat waktu mutoi bua angur cioh, co tempun kabun yoh jere monu aang co jarin hak tioh ingkan hasir kabun cioh. Jadi are nyoruhan ico beti polayan eh hia kawan potani co nyewa yoh ika mihi tonga hasir kabun yoh indaieh. Tapi hayak polayan cioh dombut, iroh molantu are, paluh nyuhu are buli hintang aroko mihi are ome-ome.

¹¹ Jadi, co tempun kabun yoh nyoruhan ico beti polayan kole nyalan hia iroh. Tapi tomolantu doh ka are. Tomohina doh hintang nyuhueh buli paluh aroko mihi are ome-ome indai.

¹² Tapi, co tempun kabun yoh tenden nyoruhan ico beti polayan co kotolueh hia iroh. Tomolantu doh ka dulun cioh dapot karas dingan eh, paluh nyakah are hia luar kabun cioh.

¹³ Maka co tempun kabun angur yoh mantun ponah songai, ‘Akuh sobulih bopikir nganyap cara co bokon. Akuh angar nyoruhan anak kuh tarop, anak kuh co tungkan co tongosejengkuh. Mositi iroh angar mohormat are.’

¹⁴ Tapi, kotika kawan potani ponyewa taiyoh noto anak dulun co tempun kabun dombut, iroh borunding samah arop doh, ‘Are tuh ahli waris co tempun kabun cotuh. Haas, ito ngompatoieh ina warisan kabun cotuh jarin ito tempui!’

¹⁵ Jadi, iroh nawan mehen eh pusit ingkan kabun angur cioh paluh ngompatoieh!” Paluh Yesus ngisok dulun orong co dahat ngoneh kesah-Eh, “Koraom me pai aang co angar tongompian dulun co tempun kabun angur yoh ma iroh?

¹⁶ Mositi are angar dombut ika ngompatoi iroh. Opah iyoh are angar morocaya kabun angur cioh ma dulun bokon.” Ngoneh aang cioh iroh mantun, “Aroh dapot aang conon tojadi!”

¹⁷ Tapi Yesus nolangon iroh, “paluh mantun, Mikir eh leh ome manaeh aang co tonulih nyan ponah Surat Borasih co santuh nai: ‘Batu co tomende pian kawan tukang bangunan ocop jarin batu co poko porulu indan bangunan cioh.’

¹⁸ Batu cioh angar mohancur sika dulun co tahak hia tungkuieh, hintang moremuk kokon dulun co tomanyek eh.”

¹⁹ Kotika cioh ka, kawan guru agama Yahudi hintang kawan imam kopala jere nawan Are awi iroh ocop paham ma maksut kesah ingkan kesah Yesus co nyala iroh. Tapi iroh aroko boraoi nawan Are kotika cioh awi takut ma dulun orong.

Kawan pomimpin dulun Yahudi aroko lian monjabak Yesus 20:20-40 Kisok tintun nahur pajak hia pomorintah Romawi 20:20-26

²⁰ Jadi, kawan guru agama Yahudi hintang kawan imam kopala nganyap alasan ika doh boraoi mehen Yesus hia gubernur Romawi ika tomohukum. Maka iroh karas nyoroli Yesus. Malah iroh nyuwah monjebak Are. Iroh nyoruhan pira-pira beti hia Yesus ika porapot pira-pira kisok soolah-olah tujuan doh yoh pio, tapi sobujur eh iroh jere ika Yesus mantun aang co sala.

²¹ Kawan dulun taiyoh mantun ma Yesus, “Pak Guru, kaih monau kokon antun hintang ajaran-Mu hopompaluh bujur. Iko aroko poduli tohimo dulun penting atawa aroh tapi iko hopompaluh bujur ma kokon dulun, majar iroh ma cara bolum sosuai ma porintah Mohotara.

²² Monurut Iko, mainboh Hukum agama kitan dulun Yahudi kuhan pai ito nahur pajak hia Laca Romawi?”

²³ Tapi Yesus ocop monau kojere doh co licik yoh. Maka Are mantun,

²⁴ “Nyuwah polehaeh indang-Kuh ico kodilat duit. Gambar hintang aran ome boh co tonyetak inyan intin?” Iroh museh, “Gambar hintang aran Laca Romawi.”

²⁵ Hien Yesus, “Amun isanioh, mihieh indan Laca Romawi co puna are tempui. Mihieh indan Mohotara aang co puna Are tempui!”

²⁶ Karas kohurong doh ngoneh useh Yesus yoh. Jadi iroh tonih leh. Iroh aroko lian nyuwah ika nompi Yesus yoh mantun aang co sala nyan tohimo dulun orong yoh.

Kisok tintun bolum hopuli ingkan pompatoi 20:27-40

²⁷ Nyan polontaran Lopo Mohotara yoh ka oko pira-pira pomimpin dulun Yahudi ingkan kolompok Saduki. Iroh aroko porocaya dulun bolum hopuli opah eh matoi. Iroh jere mombuktieh bahawa iroh bujur, maka iroh dombut hia Yesus, ngisok tintun aang cioh.

²⁸ Hien doh, “Pak Guru, Musa nulih poraturan indan to. Amun ico beti bakah matoi, aroko anak eh, maka konduang eh sobulih kawin ma sindah eh yoh ina mihi koturunan indan konduang eh co ocop matoi yoh.

²⁹ Nah, sompamaeh oko pitu beti dulun co konduang kuhung. Konduang kuhung co pokongongkoeh kawin ma ico bawe, tapi banaieh matoi sorinai kojuan haba anak.

³⁰ Jadi, konduang eh co koduoeh kole kawin ma sindah eh yoh. Are mahi matoi sorinai haba anak.

³¹ Isan iyoh ka aang co tojadi ma konduang eh co numur tolu. Isan iyoh hopompaluh dapot konduang eh co numur pitu.

³² Kojekaieh, bawe cioh mahi matoi.

³³ Jadi, oko pitu dulun hokonduang kuhung kawin ma bawe co samah. Amun bujur dulun lian bolum hopuli opah pompatoieh, bawe cioh angar jarin oruh comoh?”

³⁴ Paluh Yesus mantun, “Dulun co incah bolum nyan dunia tuh kawin.

³⁵ Tapi dulun co ocop tomili ika bolum hopuli ingkan pompatoi angar bolum nyan sorga. Iroh aroko hanak horuh bat.

³⁶ Iroh angar samah ma molekat awi aroko angar matoi bat. Iroh iyohonon kawan anak Mohotara awi iroh tomili-Eh ika bolum hopuli opah matoi, bolum sokotahi-tahieh nyan sorga.

³⁷ Nah, ikan aroko porocaya bahawa dulun bolum hopuli opah eh matoi nyan dunia tuh. Podahar, Musa leh ocop jelas mara aang cioh. Are nulih tintun waktu Tuhan, Mohotara mantun ma are ingkan pulou duhi co bocaha. Are nyurat bahawa Tuhan, Mohotara nisi Arop-Eh sobagai Mohotara co tonyembah Abraham, Mohotara co tonyembah Ishak, Mohotara co tonyembah Yakup.

³⁸ Abraham, Ishak hintang Yakup, tatu hiang me yoh, ocop matoi nyan dunia tuh, tapi mositi iroh bolum hopuli awi Mohotara aroko tonyembah dulun co matoi. Mohotara baya tonyembah dulun co bolum! Indan Mohotara, kokon dulun bolum.”

³⁹ Ngoneh useh Yesus yoh, pira-pira guru agama Yahudi mantun, “Pak Guru, bujur lau co hiem-Mu non!”

⁴⁰ Opah iyoh, kokon kawan pomimpin dulun Yahudi aroko bohanyi monjebak Yesus ma kawan kisok bat.

Yesus meleh bokuasa hangki baya koturunan Laca Daud bewe 20:41-44

⁴¹ Paluh Yesus mantun ma iroh co ngoneh-Eh, “Momikir eh bat tintun Laca Co Tomonjanji Mohotara. Kawan dulun nisi Are iyohco koturunan Laca Daud.

⁴² Cioh mula tuu. Tapi porhati eh Daud leh nyurat nyan ponah buku Masmur: Mohotara mantun ma Tuhan kuh: ‘Tuot bat nyan ika co tohormat nyan topit kontoung-Kuh,

⁴³ Dapot Akuh ngalah kawan musuh-Mu, nompi iroh somporengu kempet paam-Mu, nompi iroh tunduk ma kuasam-Mu.’

⁴⁴ Ponah Masmur cioh, Daud naah Laca Co Tomonjanji Mohotara sobagai ‘Tuhan’. Maka, Are mositi meleh bokuasa hangki koturunan Daud co biasa.”

Aroh nompi deon tosan isan kawan guru agama Yahudi 20:45-47

⁴⁵ Kotika kokon dulun incah ngoneh, Yesus mantun ma kawan murid-Eh. Hie-Eh,

⁴⁶ “Borondong ina me aroh ngulit deon tosan kawan guru agama Yahudi. Iroh herak poleser hapo jubah co ombu sohinga iroh kitan penting. Iroh herak tomohormat nyan pasar. Iroh herak tuot nyan ika co tohormat nyan lopo ika sombayang, kuman nyan ika co tohormat amun hia pesta.

⁴⁷ Iroh nipu kawan balu ika lian haba kawan harta doh, dapot lopo kawan balu taiyoh mahi tomorampas. Amun iroh bodoa mahi herak ombu, tapi cioh baya pura-pura leh. Awi kokon deon tosan doh co jahat yoh, Mohotara mositi angar mohukum iroh meleh bahat hangki dulun bokon.”