Lukas 2 - Alkitab Porjanjian Baa Ponah Bohasa Dayak Siang

Yesus tonganak 2:1-7

¹ Kotika cioh oko laca co momorintah nyan ngolauh negri Roma. Araieh Agustus. Are morentah ina kokon warga co oko nyan ponah pomorintah Korojaan Roma mondaptar arop doh ika tonyensus.

² Sensus co kotuhi tuh tonompi kotika Kirenius molayani laca Agustus sobagai Gubernur nyan derah Siria.

³ Kokon dulun tulak hia kota nyan omoh tatu hiang doh batuh nukui ina iroh tongitung dulun Roma.

⁴ Maka, Yusup mahi tulak ingkan kota Nasaret nyan propinsi Galilea, hia kota Betlehem nyan derah Yudea. Iyoh ika laca Daud tonganak. Yusup sobulih hia intin awi are koturunan Daud.

⁵ Yusup tulak mondaptar arop eh homboh-homboh ma Maria tunangaieh, co dahat botohi.

^6-7 Kotika iroh dapot nyan kota Betlehem, kokon lopo ika hiloi ocop ponu. Jadi iroh tirui nyan ponah lopo ika komolum. Nyan intin Maria nganak ico beti longa bakah, anak tutuh eh. Daja cioh tomungkuh eh ma kain, hintang topokaling eh nyan ponah tolungan kanon komolum.

Molekat porapot tarung Yesus tonganak, Laca Co Tomonjanji Mohotara, ma kawan dulun co tukang nyorunuh komolum 2:8-20

⁸ Momi cioh, oko kawan dulun co tukang nyorunuh komolum dahat jaga kawan domba nyan pulou uru nyan derah dokin kota Betleham yoh.

⁹ Songola molekat Mohotara poleha arop eh ma iroh, cohaya ingkan Tuhan pahau-pahau nyingah iroh, tului iyoh karas lau akut doh.

¹⁰ Tapi molekat cioh mantun, “Aroh takut! Awi akuh dombut mehen tarung pio indam me, tarung co dalo ngonyorih ngonyerah kokon dulun.

¹¹ Ngondaii tuh nyan kota Daud, iyohonon Betlehem, ocop tonganak ponyolamat indam me. Are yoh Laca Co Tomonjanji Mohotara. Are yoh Tuhan.

¹² Tuh iyoh cara me ika monau ome co tomantun kuh mula tuu: Ikan angar sopopak ico longa daja. Daja cioh tomungkuh ma kain, topokaling nyan tolungan kanon komolum.”

¹³ Molekat cioh songola tongohomboh kawan molekat co bokon, iroh uras nara Mohotara. Ma antun,

¹⁴ “Koponara indan Mohotara nyan sorga, ika co poko hunyung. Are angar mihi kongolandah kongolami nyan pindaondo indan dulun co ngonyorih songai-Eh.”

¹⁵ Opah iyoh, kawan molekat taiyoh hopuli hia sorga, kawan dulun co tukang nyorunuh komolum taiyoh mantun samah arop doh, “Keleh ito tulak hia Betlehem ika noto poristiwa co tojadi yoh, co punan Tuhan maraeh ma ito.”

¹⁶ Iroh nyua tulak hia Betlehem, nyopopak Maria hintang Yusup, hintang longa daja co dahat kaling nyan ponah tolungan kanon komolum.

¹⁷ Kotika kawan dulun co tukang nyorunuh komolum yoh noto longa daja cioh, iroh ngesah kawan aang co tomara molekat taiyoh, tintun longa daja cioh.

¹⁸ Hurong kokon dulun ngoneh kesah kawan dulun co tukang nyorunuh komolum yoh.

¹⁹ Tapi Maria mika kokoieh ponah songai, momikir kokon aang cioh.

²⁰ Kawan dulun co tukang nyorunuh komolum yoh hopuli hia pulou uru samir nara mantun kopion Mohotara, tului ome co ocop tongoneh hintang tonoto, samah ma isan co tomantun kawan molekat taiyoh niin.

Yesus tomalak hintang tonyarah ika bolum husus indan Mohotara 2:21-24

²¹ Opah umur jalu ondo, daja cioh tomalak. Yusup doruo Maria ngaran daja cioh Yesus, aran co tomihi molekat ma Are soun ma Are tongobotohi tinai-Eh.

^22-24 Dapot bat kotikaeh, Yusup doruo Maria tulak hia Lopo Mohotara nyan kota Yerusalem, ika molalus adat ngorasih arop monurut hukum Musa hintang ka mihi porsembahan indan Mohotara borupa ico kopasang beleu tokukur, boraoi ka duo kontuluh anak burung dara. Nyan kotika iyoh ehen doh ka Yesus ika nyarah Are hia Mohotara tului oko porentah kole ponah hukum Mohotara isan otuh, “Amun ico bawe nganak, anak tutuh eh bakah, maka tinai doruo tamaieh sobulih nyarah eh ma Mohotara ina are bolum husus indan Mohotara.”

Simeon sopopak ma Yesus, Laca Co Tomonjanji Mohotara 2:25-35

²⁵ Kotika cioh nyan Yerusalem oko dulun co araieh Simeon. Are yoh dulun co hopompaluh bolum bujur. Are mohormat hintang tuhit ma Mohotara. Are yoh nganto Laca Co Tomonjanji Mohotara ika mihi kongolandah indan dulun Israel. Roh Mohotara oko nyan are.

²⁶ Roh Mohotara ocop mara are sinan bahawa are aroko angar matoi amun are arinai noto Laca co tomonjanji Tuhan.

²⁷ Yusup doruo Maria mehen Yesus hia Lopo Mohotara nyan kota Yerusalem. Doruo dombut ika nompi aang co tomorentah ponah hukum Mohotara tintun anak tutuh. Pas kotika cioh, Roh Mohotara nompi Simeon tulak hia Lopo Mohotara ka.

²⁸ Kotika Simeon noto daja cioh, are paluh monu-Eh, ngentang-Eh paluh nara Mohotara,

²⁹ “Tuhan akuh tuh hamba Mu. Iko ocop molalus janji-Mu, makitu akuh siap matoi nyan ponah kosanang.

³⁰ Awi ma matang kuh tarop akuh ocop noto ponyolamat co ingkan-Iko.

³¹ Ponyolamat cioh ocop tonyiap-Mu indan kokon bangsa.

³² Ponyolamat cotuh isan kopandau co poleha kojere Tuhan ma dulun co bokon ma bangsa Yahudi. Are ka nompi umat Tiko Israel tomohormat.”

³³ Taman doruo tinan daja cioh hurong ngoneh antun Simeon tintun anak doh.

^34-35 Paluh Simeon mantun aang co pio hinut ma Maria doruo Yusup. Paluh are mantun ma Maria, tinan daja cioh, “Daja cotuh ocop tomili ika potinjun kojere Mohotara. Orong dulun Israel angar norima Are. Tapi orong ka dulun co angar kuloi Are. Ma isanioh, maka kitan bat kawan aang co ponah songan doh. Dulun co norima-Eh angar sasar dokin ma Mohotara. Tapi dulun co kuloi Are angar sasar ocu ingkan Mohotara. Iroh angar ngolawan-Eh. Kosoranta co angar tonongkomo-Eh angar nompi iko karas jorung, Maria. Koporoh songam mu daai nusuk songam samah ma padang co nyoot.”

Hana bosukur ma kodombut Yesus 2:36-38

^36-37 Nyan polontaran lopo Mohotara yoh oko ka ico beti nabi bawe co ocop dalo kongongko eh. Araieh Hana. Are anak Panuel ingkan suku Aser. Are piji kawin kotahin pitu toun, tapi opah iyoh banaieh matoi, are jarin balu. Kotika poristiwa cotuh tojadi, umur eh jalun pulu opat toun. Are aroko piji naat Lopo Mohotara. Hondo-homalom are bopuasa, hintang bodoa ika nyembah Mohotara.

³⁸ Kotika Yusup, Maria hintang daja cioh oko nyan intin. Hana mahah iroh, paluh bosukur ma Mohotara. Are mantun tintun Daja cioh, Laca Co Tomonjanji Mohotara. Are mantun nohiu daja cioh ma kokon dulun co nganto kotika Yerusalem hintang kokon dulun Israel tomolampas.

Yesus ehen buli hia Nasaret hintang tongomahai nyan intin 2:39-40

³⁹ Opah Yusup doruo Maria molekas kokon acara adat indan co tomorentah hukum Mohotara, buli bat iroh hia Nasaret, ika asal doh nyan derah Galilea.

⁴⁰ Daja cioh tongomahai nyan intin. Are jarin bangkah, bopikir akar hintang karas tongosejeng Mohotara.

Yesus majar nyan polontaran lopo Mohotara kotika Are incah umur duo balas toun 2:41-52

⁴¹ Sika toun dulun ongko Yesus tulak hia kota Yerusalem ika moraya Paskah.

⁴² Jadi, kotika Yesus umur duo balas toun, tulak bat iroh ika umba moraya Paskah cioh isan co koliin.

⁴³ Kotika porayaan cioh umbot, tinan taman Yesus buli. Tapi iroh aroko monau Yesus incah nukui nyan Yerusalem.

⁴⁴ Iroh hopompaluh nyalan awi iroh monyangka Yesus oko halo rombongan. Opah nyalan ico kondaii, punan doh nganyap Are halo kawan bobuha hintang kawan tongkanyoh-Eh.

⁴⁵ Tapi iroh aroko popak Are. Maka Yusup doruo Maria hopuli kole hia Yerusalem nganyap Are.

⁴⁶ Opah tolu ondo iroh popak-Eh nyan polontaran Lopo Mohotara. Are dahat tuot ma kawan guru agama Yahudi, ngoneh ajaran doh, orong kisok-Eh ma iroh.

⁴⁷ Oko ka dulun bokon nyan intin ngoneh Yesus dahat huseh-huseh ma kawan guru agama taiyoh, iroh uras hurong ngoneh kawan useh Yesus tului pomahaman-Eh jalom lau.

⁴⁸ Dulun ongko-Eh mahi hurong lau noto Are. “Nak, kura Iko nompi karo tamam isan otuh, karo ocop giha nganyap Iko!” Hien tinai-Eh.

⁴⁹ Yesus museh iroh, “Ikan duo aroko porulu giha nganyap Akuh awi sobujur eh ocop tomonau me Akuh sobulih oko nukui nyan ponah lopo Tamang-Kuh tuh!”

⁵⁰ Tapi iroh aroko paham ma useh Yesus yoh.

⁵¹ Opah iyoh Are buli homboh iroh hia Nasaret. Are tenden numun nain doh. Kokon aranaang co karas boarti tintun Daja cioh uras tomika tinai-Eh nyan ponah songai.

⁵² Yesus sasar bahai hintang sasar botambah bopikir akar. Mohotara hintang kolunon sasar herak ma Are.