Lukas 18 - Alkitab Porjanjian Baa Ponah Bohasa Dayak Siang

Kesah tintun ico beti dulun balu hintang ico beti hakim 18:1-8

¹ Yesus hapo kesah cotuh ika majar kawan murid-Eh ika doh hopompaluh bodoa hintang aroh putus asa awi doa doh angar tongabur.

² Hie-Eh, “Oko ico hakim. Hakim cioh nukui nyan ico kota. Are aroko tuhit ma Mohotara, hintang aroko poduli ma dulun bokon.

³ Nyan kota cioh ka oko ico beti balu, co hopompaluh dombut hia hakim cioh. Are nyawot asi, ‘Dohop nompi koputusan co sucing bahawa ponah porokara cotuh, akuh boh co bujur hintang dulun co ngolawan akuh yoh co sala.’

⁴ Cukup kotahi ocop hakim cioh aroko kolu norima sawot asi balu cioh. Tapi ahir eh are bopikir, ‘Akuh tuh aroko tuhit ma Mohotara, hintang aroko poduli ma dulun bokon.

⁵ Tapi balu cotuh hopompaluh ngonyira akuh. Maka, keleh akuh nontumun sawot asieh non. Amun aroh, are angar hopompaluh dombut kole nyalan ngonyira akuh.’ ”

⁶ Paluh Tuhan Yesus mantun, “Oluco hakim cioh aroko jujur, momporhati kobopikir akar eh ika nompi koputusan co sucing indan balu conon.

⁷ Maka, mositi Mohotara co pio angar nompi koputusan co sucing indan dulun co tomili-Eh co bodoa hia Are hopompaluh. Mositi Are aroko piji lalai ngawat iroh.

⁸ Sobujur eh, Mohotara mositi angar nyua nompi aang co sucing indan doh. Tapi kotika Anak Kolunon dombut hopuli hia dunia tuh, mainboh angar tonyopopak-Eh kawan dulun co porocaya ma-Eh?”

Kesah tintun ico beti dulun Parisi co cakah hintang ico beti dulun tukang takih pajak co aroko cakah 18:9-14

⁹ Nyan intin oko pira-pira dulun co cakah. Iroh porocaya bahawa baya iroh leh co bujur. Iroh mahi porandah kawan dulun co bokon. Maka, Yesus bokesah ma iroh,

¹⁰ “Oko duo dulun co tulak hia polontaran Lopo Mohotara ika bodoa; ico beti pomimpin agama Yahudi ingkan kolompok Parisi hintang ico beti dulun co tukang takih pajak.

¹¹ Dulun Parisi cioh tonjok paluh bodoa ponah songai isan otuh, ‘Oo Mohotara, akuh bosukur ma-Iko, awi akuh aroko bodosa isan kawan dulun co nako, molanggar hukum, aroko hokoruh ma bawe co bokon oruh ku atawa jahat isan tukang takih pajak cotuh.

¹² Akuh bopuasa duo kali ponah ico menggu. Akuh mihi perpuluhan hia Mohotara ingkan kokon pongulih kuh.’

¹³ Tapi tukang takih pajak cioh tonjok ocu ingkan kokon dulun bokon. Are nukup tului are nongkomo aroko bohanyi nolangon hia langit. Are nokup husuk eh tului moneser ma kawan dosaieh. Are mantun, ‘Oo, Mohotara. Dohop masi akuh boh. Akuh tuh boh dulun co bodosa!’ ”

¹⁴ Paluh Yesus mantun, “Momporhatieh! Kotika buli tukang takih pajak cioh co tonorima Mohotara, bokon dulun Parisi cioh. Awi Mohotara angar porandah kokon dulun co posompan arop eh. Tapi, Mohotara angar pohunyung dorajat dulun co morandah arop eh.”

Yesus mantun aang co pio hinut indan kawan daja 18:15-17

¹⁵ Oko kawan dulun mehen kawan daja kolik dombut hia Yesus ika Are ngoncamak iroh, mantun aang co pio hinut indan doh. Kotika kawan murid-Eh noto iyoh, iroh nopoh kawan dulun co mehen daja taiyoh.

¹⁶ Tapi Yesus naah kawan anak daja taiyoh ika dombut hia Are, paluh mantun ma kawan murid-Eh, “Olueh kawan daja tanon dombut hia Akuh! Aroh bosiit iroh. Awi, dulun co isan otuh boh co jarin anggota koluarga Korojaan Mohotara.

¹⁷ Akuh mantun ma ikan! Amun dulun aroko norima Korajaan Mohotara isan ico beti daja kolik, are aroko angar jarin anggota koluarga Korojaan Mohotara.”

Dulun tatou hintang kobolum co sokotahi-tahieh nyan sorga 18:18-30

¹⁸ Ico beti pomimpin dulun Yahudi ngisok Yesus, “Bapak Guru co pio, ome co sobulih piangkuh ika boraoi haba kobolum co kototahi?”

¹⁹ Hien Yesus, “Baya Mohotara co pio. Jadi, mikir maksutmu sorinai iko nisi Akuh pio.

²⁰ Nah, tintun kisok conon, mositi iko ocop monau hukum Mohotara. Ika cuntu: ‘Aroh hokoruh ma dulun co bokon ma bakah banam mu. Aroh ngompatoi dulun. Aroh nako. Aroh jarin saksi co aroko bujur. Hormat ma tinan tamam mu.’ ”

²¹ Pomimpin cioh mantun, “Akuh ocop tuhit ma kokon hukum Mohotara yoh ingkan kongolik kuh.”

²² Ngoneh aang cioh, Yesus mantun ma are, “Baya ico leh onieh aang co kurang co sobulih tongompiammu. Buli bat, borakang kokon aang co tiko. Paluh magi duit eh ma kawan dulun co mala. Tului isanioh, iko angar haba koponatou nyan sorga. Opah mu nompi kokon aang cioh, dombut kole hia Akuh, ika jarin murid-Kuh.”

²³ Ngoneh antun Yesus, are jarin karas jorung, tului are yoh tatou. Are kuloi borakang kokon koponatoueh.

²⁴ Yesus noto pomimpin co tatou yoh paluh mantun, “Moho lau ika dulun tatou jarin anggota koluarga Korojaan Mohotara!

²⁵ Meleh bohinai ico kontuluh unta muntam luwang doih hangki ico beti dulun tatou jarin anggota koluarga Korojaan Mohotara.”

²⁶ Kawan dulun co ngoneh aang cioh ngisok, “Boh, amun isanioh, ome co boraoi tonyolamat?”

²⁷ Yesus museh, “Mohotara lian nompi aang co aroko mungkin tongompian kolunon.”

²⁸ Paluh Petrus mantun, “Notoeh! Kaih ocop naat kokon aang co tioh kaih ika lian jarin kawan murid-Mu.”

²⁹ Hien Yesus, “Porocayaleh! Kawan dulun co ocop naat lopoeh, oruh eh, konduang eh, dulun ongkoeh, atawa kawan anak eh ika iroh boraoi molayan Mohotara hintang Korojaan-Eh,

³⁰ iroh angar haba eh hopuli ingkan Mohotara ocu meleh orong nyan dunia tuh nyan jaman cotuh, hintang iroh mahi angar haba kobolum co sokotahi-tahieh nyan sorga nyan jaman ondo pongaan daai.”

Co kohontolu kalieh, Yesus mara tintun kosoranta co angar tonongkomo-Eh 18:31-34

³¹ Yesus naah duo balas rasul ika kumpur nyan ika co hotontarop ma Are. Paluh mantun, “Ngoneh eh bat! Makitu ito nyuru kota Yerusalem, nyan idi angar tojadi sosuai ma ome co ocop tonulih kawan nabi tintun Anak Kolunon.

³² Are angar tonyarah indan kawan dulun co bokon ma Yahudi. Kawan dulun taiyoh angar polea-lea, mohina, hintang ngiwoh Are.

³³ Iroh angar moncambuk paluh ngompatoi Are. Tapi nyan ondo co kotolu, Are angar bolum hopuli.”

³⁴ Tapi duo balas rasul-Eh samah sindo aroko paham ma ome co tomantun Yesus. Aroko tomonau doh ome aang co tongonjere-Eh. Arti co sobujur eh kawan antun co tomara-Eh yoh aroko lian tomaham doh.

Yesus pomambuh ico beti dulun bobuto nyan dokin kota Yeriko 18:35-43

³⁵ Ponah solanai hia kota Yerusalem, Yesus hintang kawan dulun co umba Are jonyo dapot kota Yeriko. Nyan intin, oko ico beti dulun co bobuto tuot nyan saran calan dahat eh nyawot sodakah.

³⁶ Kotika dulun co bobuto yoh ngoneh orong dulun nyihin, are ngisok, “Oko ome?”

³⁷ Hien doh ma are, “Yesus, dulun ingkan desa Nasaret, dahat nyihin intoi.”

³⁸ Paluh are noriak, “Yesus, koturunan Daud! Masi akuh boh!”

³⁹ Kawan dulun co dahat nyalan co houn ma Yesus nagur dulun co bobuto yoh, nyuhu are otoi tonih leh. Tapi are nyulun noriak meleh muhat kole, “Yesus koturunan Daud! Masi akuh boh!”

⁴⁰ Yesus tondo paluh nyuhu ika dulun co bobuto yoh ehen hia Are. Kotika are dokin, Yesus ngisok are,

⁴¹ “Mainboh oko pai co boraoi tongondohop-Kuh?” “Tuhan,” useh eh, “Akuh jere boraoi noto!”

⁴² Yesus mantun, “Amun isanioh, noto bat! Iko tongompio tului iko porocaya ma Akuh.”

⁴³ Kotika iyoh ka dulun bobuto cioh boraoi noto, paluh umba Yesus samir nara Mohotara. Kokon dulun orong yoh noto are tongompio, iroh kokon doh mahi nara Mohotara ka.