Lukas 17 - Alkitab Porjanjian Baa Ponah Bohasa Dayak Siang

Kawan murid Yesus sobulih ngolawan dosa, mongampun dulun bokon, hintang hopampaluh porocaya ma Are 17:1-6

¹ Paluh Yesus mantun ma kawan murid-Eh, “Kokon dulun mositi angar tonyuwah ika badosa. Tapi Mohotara angar mohukum kawan dulun co nyangit nyuwah ika bodosa!

² Jadi, meleh pio indan doh amun loong batu tomowot nyan koran doh, opah iyoh napuk eh hia ponah laut ina doh matoi sorinai nompi ico ingkan kawan dulun kolik tuh bodosa.

³ Jadi, borondong-rondong leh ika ikan aroh jarin ponyabab dulun bokon nompi dosa! Amun konduang me nompi dosa ma ikan, nopoh are. Amun konduang me moneser holuh nyawot maap, mongampun eh leh are.

⁴ Malah, amun are nompi dosa ma iko pitu kali ponah ico ondo, tapi sika iyoh are moneser holuh hopuli mantun ma iko, ‘Mongampun akuh boh’. Iko sobulih sika iyoh ka mongampun are.”

⁵ Paluh koduo balas rasul Yesus yoh mantun, “Tuhan, nompi iman kaih meleh dohon kole boh.”

⁶ Tuhan museh, “Amun ikan porocaya ma Mohotara isut leh boh, maka sompamaeh ikan nyuhu puun kaju cotuh boturuk ingkan tana dapot akat eh, paluh potontucok hia laut. Maka puun kaju cioh angar nontumun porentah me.”

Kawan dulun co molayani Yesus sobulih eh aroko moharap torima kasih 17:7-10

⁷ “Sompamaeh ico beti nyan halo ikan empun ico beti cipon co mombajak sawah me atawa ngomolum kawan domba me. Opah cipon cioh buli ingkan gawieh, mositi ikan aroko mantun ma are, ‘Haas boh! Nondoolai mu bat, kuman houn!’

⁸ Seen sobalik eh. Iko angar mantun ma are, ‘nyali lembon pokajan ika mu molayani akuh. Nyodia ongkun ponguman indangkuh. Opah akuh ocop kuman ngorih, punan iko boraoi kuman bolum.’

⁹ Mositi iko aroko botorima kasih ma cipon cioh awi wajar leh are nguan co cuhum mu ma are.

¹⁰ Isanioh ka ma ikan. Amun ikan ocop nguan kawan co tomorentah ma ikan, mantun eh bat, ‘Kaih kawan cipon leh. Kaih aroko borati. Kaih baya nguan tugas co mositi pian kaih.’ ”

Yesus pomambuh sopuluh beti dulun, tapi baya ico beti leh co botorima kasih 17:11-19

¹¹ Paluh Yesus ngoholuh solanai hia kota Yerusalem, nyihin batas oang propinsi Samaria ma propinsi Galilea.

¹² Sorinai Yesus hintang kawan dulun co umba Are yoh muntam hia ico desa, oko sopuluh beti dulun co hoboro nyuru Are tapi tonjok agak ocu.

¹³ Iroh mantun muhat, “Guru! Masi kaih boh!”

¹⁴ Kotika Yesus noto iroh, Are mantun, “Tulakbat mahah kawan imam ina doh boraoi momastieh amun ikan ocop tongompio boraoi tomangap borasih arelu oko palim me bat.” Ngoneh aang cioh, iroh tulak paluh nyan benteng calan kokon toro doh pio.

¹⁵ Tapi, kotika sadar ocop pio, baya ico beti leh ingkan iroh co hopuli hia Yesus, samir ngiki ngororoho nara Mohotara.

¹⁶ Paluh are bosujut nyan paan Yesus, botorima kasih hia-Eh. Nah, dulun cioh ingkan Samaria, bokon ma dulun Yahudi!

¹⁷ Maka Yesus mantun ma kokon dulun co oko nyan intin, “Akuh ocop pomambuh sopuluh beti dulun. Soharus eh kokoi hopuli nara Mohotara.

¹⁸ Tapi noto aang cotuh, baya tomuoi cotuh leh co hopuli bosukur hia Mohotara!”

¹⁹ Paluh, Yesus mantun ma dulun Samaria cioh, “Tonjokbat. Tulakbat. Iko tonyolamat tului ocop porocaya ma-Akuh.”

Yesus majar tintun Korojaan Mohotara 17:20-37

²⁰ Nyan ondo co bokon, pira-pira pomimpin yahudi ingkan kolompok Parisi ngisok ma Yesus, “Nganto arai Korojaan Mohotara angar dombut, iyohonon Mohotara molai momorintah sopenuh eh ma kokon aranaang?” Hien Yesus, “Korojaan Mohotara aroko lian tonoto ma mata.

²¹ Maka, dulun aroko boraoi mantun, ‘Noto! Korojaan Mohotara oko nyan intoi.’ Atawa ‘Korojaan Mohotara oko nyan idi.’ Awi, sobujur eh Korojaan Mohotara ocop oko nyan halo ikan nyan dunia tuh.”

^22-25 Paluh Yesus mantun ma kawan murid-Eh, “Anak Kolunon sobulih orong soranta. Kawan dulun nyan jaman cotuh angar nongkuloi Are. Jadi, angar oko kotikaeh daai, ikan jere noto ico ondo ingkan kawan ondo Anak Kolunon, tapi ikan aroko lian notoeh. Jadi, daai amun oko kawan dulun co mantun, ‘Noto! Are oko nyan intoi.’ Atawa ‘Are oko nyan idi,’ mositi aroko bujur. Maka aroh ngoneh nain doh. Awi nyan kotika Anak Kolunon hopuli hia dunia tuh, kokon dulun botantu lian noto korombut-Eh yoh. Samah ma jilap mancar paluh ngompandau ngolauh langit bocohaya. Sanioh boh korombut-Eh.

²⁶ Koadaan dunia kotika kojonyo korombut Anak Kolunon, angar samah ma koadaan dunia nyan jaman Nuh.

²⁷ Dulun kuman, ngorih, kawin-ngoruh, dapot nyan ondo kotikaeh Nuh hintang koluargaeh muntam hia ponah bonamaeh co bahai yoh. Opah iyoh tojadi bat banjir bahai co ngolumat kokon doh co jahat yoh.

²⁸ Isanioh ka nyan jaman Lot. Kawan dulun nyan kota Sodom kuman, ngorih, hoborakang-hobojuri, mimbun ngomulan, mombangun.

²⁹ Tapi nyan ondo Lot hintang koluargaeh pusit ingkan kota Sodom, apui hintang bolerang nokah ingkan langit isan ucan borohoh. Mohotara ngolumat kokon dulun nyan kota cioh tului iroh jahat.

³⁰ Koadaan dunia isan iyoh ka nyan kotika Anak Kolunon dombut hia dunia tuh kole.

³¹ Nyan kotika cioh, dulun co dahat nyan tungkui sapo aroh hopuli muntam monu kawan harta bandaeh co oko nyan ponah lopoeh. Sanioh ka dulun co dahat nyan umo aroh hopuli hia lopoeh

³² Mingkat eh ome co tojadi ma oruh Lot!

³³ Dulun co mongutama kobolum eh tarop, sobujur eh aroko angar haba kobolum co kotuuieh. Tapi dulun co nyarah kobolum eh tarop ika umba Akuh, mositi angar habaeh.

³⁴ Ngonehleh aang cotuh: Nyan momi cioh angar oko duo dulun ponah ico koluarga dahat tirui nyan ika co samah. Ico angar tomangkat, tapi icoeh angar tomolenteng.

³⁵ Angar oko duo beti bawe dahat homboh-homboh muca gandum. Ico angar tomangkat, tapi icoeh angar tonaat. [

³⁶ Angar oko duo beti bogawi homboh nyan umo. Ico angar tomangkat, tapi icoeh angar tomolenteng.”]

³⁷ Kawan murid Yesus ngisok, “Nyan omoh Tuhan angar dombut daai?” Yesus Museh, “Nyan omoh oko ontun ocin, nyan intin ka hokorumbung beleu co herak nosok ontun kawan aang.”