Lukas 13 - Alkitab Porjanjian Baa Ponah Bohasa Dayak Siang

Dulun angar matoi lumat amun aroko naat dosa hintang aroko ngonyorih songan Mohotara 13:1-9

¹ Nyan waktu iyoh, Yesus tomara pira-pira beti dulun co dombut hia-Are. Hien doh, “Oko kawan dulun ingkan derah Galilea co tulak hia kota Yerusalem ika momporsembah kurban nyan Lopo Mohotara. Kotika iroh mihi porsembahan eh, Pilatus, gubernur pomorintah Romawi yoh, nyuhu ina dulun taiyoh tongompatoi.”

² Ngoneh tarung cioh, Yesus mantun ma iroh, “Aroh bopikir kawan dulun Galilea yoh tongompatoi ma kopurun isan iyoh tului iroh meleh bodosa hangki kokon dulun bokon nyan Galilea.

³ Pikiran me korinah kosalaeh. Porhatieh bat amun ikan aroko naat dosa hintang aroko ngonyorih songan Mohotara, ikan mahi angar matoi isan iroh ka.

⁴ Sanioh ka tarung tintun jalu balas beti dulun co matoi hiah monara Siloam nyan Yerusalem kolungkang ngohop iroh. Aroh bopikir iyoh tojadi ma iroh tului iroh meleh bodosa hangki kawan dulun bokon nyan kota Yerusalem.

⁵ Pikiran me yoh korinah kosalaeh. Porhatieh bat amun ikan aroko naat dosa hintang aroko ngonyorih songan Mohotara, ikan mahi angar matoi isan iroh ka.”

⁶ Paluh Yesus majar iroh ma kesah cotuh, “Oko dulun co tempun kabun angur. Are mimbun kaju ara nyan intin ka. Derek are nyalan noto, pai imbun kaju ara cioh ocop mua. Tapi sika are nyari imbun kaju ara cioh hopompaluh arelu oko buaeh.

⁷ Maka are mantun ma tukang kabun eh, ‘Ocop tolu toun kotahieh akuh nganto puun ara cotuh mua. Tapi cara nyaloi. Nowong eh leh! Keleh nowong eh leh puun ara conon ina tanaeh aroko mohampa.’

⁸ Tapi hien tukang kabun, ‘Pa, olueleh puun ara cotuh tenden bolum ico toun oni. Akuh angar moncangkur tana toliut eh holuh umpi pupuk eh.

⁹ Ma cara conon akuh boharap puun ara conon angar mua toun muka. Tapi amun aroh, olu leh tonowong.’ ”

Yesus pomambuh ico beti bawe nyan ondo Sabat 13:10-17

¹⁰ Nyan ico ondo Sabat, Yesus majar nyan ico lopo ika sombayang.

¹¹ Nyan intin oko ico beti bawe co ocop jalu balas toun hotoro. Oko roh jahat nyan ponah arop eh co umpi are hotoro dapot jarin bojungkung. Are samah sindo aroko lian tonjok sokoting.

¹² Kotika Yesus noto bawe cioh, Yesus naah are hia muka. Paluh Yesus mantun, “Nah, makitu iko topomambuh ingkan toromu.”

¹³ Opah Yesus mandak silui-Eh, bawe cioh holuh tonjok sokoting paluh nara Mohotara.

¹⁴ Tapi kopala nyan lopo ika sombayang cioh jarin sangit, awi are bopikir gawin Yesus yoh gawi co aroko hini tongompian nyan ondo Sabat awi ondo Sabat husus ika nondoolai. Maka kopala nyan lopo ika sombayang mantun ma kumpulan dulun taiyoh, “Monurut Hukum agama to, oko onom ondo ika bogawi. Jadi, amun jere tongomambuh, dombut hia intoi nyan kawan ondo taiyoh. Aroh nyan ondo Sabat!”

¹⁵ Paluh Tuhan Yesus mantun maeh hintang ma dulun co bopikir samah ma are, “Ikan kawan dulun co pura-pura pio! Sika ondo, tomasuk ondo Sabat, ikan miwuh sapi atawa koledai ingkan kandang eh, mehen eh pusit ika boraoi ngorih. Onon mahi gawi ka.

¹⁶ Tapi bawe cotuh iyohonon ico beti ingkan tonga umat Mohotara, koturunan Abraham. Roh jahat lacan setan ocop umpi are soranta jalu balas toun kotahieh. Pantas leh are topomambuh ingkan kosoranta toroeh, oluco otuh ondo Sabat.”

¹⁷ Kotika Yesus mantun sanioh, kokon dulun co monentang-Eh nongkomo mohaan, tapi co bokon eh jorih jerah tului kokon aang co mosotahir co tongompian Yesus.

Korojaan Mohotara somporengu luang sosawi hintang bopongaruh isan dagi 13:18-21

¹⁸ Paluh Yesus mantun ma kumpulan dulun taiyoh, “Akuh angar mongumpama Korojaan Mohotara.

¹⁹ Korojaan Mohotara yoh somporengu jangoi sosawi co tomorawuh nyan kabun. Jangoi cioh nyuluh paluh hobatang hintang kawan beleu nyalah nyan kawan daaieh.”

^20-21 “Korojaan Mohotara mahi sompama dagi nyan ponah kucok tepung. Ico bawe ngolutoeh ponah tolun pulu kilo tepung. Kojekaieh, dagi cioh nompi kokon tepung co tongalut yoh nyiwuh.”­­­­­­­­­­­­­­­­

Oko dulun co bopikir iroh angar lian muntam sorga, tapi tonyata aroh 13:22-30

²² Incah ponah solanan nuntuh kota Yerusalem, Yesus buah kawan kota hintang kawan lowu samir majar tintun Korojaan Mohotara.

²³ Paluh oko dulun co ngisok ma Are, “Pa, main boh baya isut leh pai dulun co angar tonyolamat?”

²⁴ “Paluh Yesus museh, Korojaan Mohotara samah isan ico lopo co tungkangeh sikong. Bojuang bat ika muntam buah tungkang co sikong yoh, awi orong dulun co suwah muntam, tapi baya isut co hegah.

²⁵ Daai tempun lopo angar mantop antop eh. Oko nyan halo ikan co angar nyan luar, ngatuk samir mantun, ‘Tuan, mukap antop indan kaih!’ Tuan cioh angar museh, ‘Aroh! Akuh aroko nyono ikan.’

²⁶ Paluh ikan angar nyawot asi, ‘Tantu Iko nyono kaih! Kaih ocop derek kuman ngorih homboh Iko. Iko mahi derek majar nyan kawan calan nyan kota kaih.’

²⁷ Tapi tuan cioh angar mantun kole ma ikan, ‘Akuh aroko nyono ikan. Buho bat ingkan Akuh! Kokom me dulun jahat’.

²⁸ Hiah iyoh, ikan angar noto tatu hiang me Abraham, Ishak hintang Yakup kawun kawan nabi nyan ponah Korojaan Mohotara nyan sorga, tapi ikan angar tonapuk hia noraka. Nyan intin ikan angar nangih tului korinah kohujok hintang angar ngoritet kosing me awi aroko kuhan muntam sorga.

²⁹ Orong dulun angar dombut ingkan ngolauh dunia. Iroh angar tonorima. Iroh angar tuot kuman nyan ponah Korojaan Mohotara nyan sorga.

³⁰ Porhatieh bat: Oko dulun co tomangap aroko penting makitu, tapi daai Mohotara angar umpi iroh penting. Oko ka dulun co tomangap penting makitu, tapi daai Mohotara angar nompi iroh aroko penting.”

Yesus mantun Are angar matoi nyan kota Yerusalem 13:31-35

³¹ Nyan waktu cioh ka, oko pira-pira beti dulun Parisi dombut hia Yesus. Iroh mantun, “Aroh nukui nyan intoi awi Herodes jere ngompatoi Iko! Keleh tulak hia ika co bokon.”

³² Tapi Yesus mantun ma iroh, “Mantun eh ma srigala cioh, ‘Ngondaii cotuh hintang nyuap, Akuh angar tenden musir kawan roh jahat hintang pomambuh kawan dulun. Holuh nyan ondo co kotolu, Akuh angar ngumbot kawan gawing-Kuh.’

³³ Oluco sanioh, Akuh sobulih ngoholuh solanang-Kuh hia kota Yerusalem ngondaii tuh, nyuap hintang opah nyuap awi Akuh angar tongompatoi nyan intin. Arelu oko ika bokon ika ico beti nabi Mohotara tongompatoi kocuali nyan Yerusalem.

³⁴ Paluh Yesus nohuang Yerusalem, Akui ikan boh, kawan dulun Yerusalem. Mohotara nyoruhan kawan nabi indam me, tapi tomedak me seen iroh ma batu dapot matoi. Akuh jere pompaluh nyolindung ikan, samah ma ongkan pohok nyolindung kawan anak eh nyan pinda ilat eh. Tapi ikan kuloi.

³⁵ Tului iyoh, daai Mohotara angar moholu ikan tarop. Aroh tonyolindung-Eh kole Lopo Mohotara hintang ngolauh kota Yerusalem. Ikan aroko angar noto Akuh bat dapot ikan mantun tintun Akuh, ‘Are tuh dombut ponah aran Mohotara. Haas ito nara Are!’ ”