Lukas 12 - Alkitab Porjanjian Baa Ponah Bohasa Dayak Siang

Aroh jarin dulun co pura-pura pio 12:1-3

¹ Opah Yesus tulak ingkan lopo dulun Parisi yoh, orong dulun hokumpur. Dalo lau kuhat doh dapot oko co soroticak paan dongai bat tongaeh kotika jere ngoneh ajaran Yesus. Yesus houn mantun ma kawan murid-Eh, “Jaga arop me ina aroh jarin dulun co herak pura-pura pio samah ma kawan pomimpin agama ingkan kolompok Parisi.

² Kokon kojahat co tomulim dulun angar koraon. Kokon kojahat co tononih dulun angar tomungkar.

³ Ma antun co bokon, kokon aang co tonyokot dulun tonih-tonih nyan aang co pindong angar tongoneh socara tobuka nyan aang co pandau. Kokon aang co tomulim co tonosinok nyan tolingan dulun nyan ponah bukung bopantop, daai angar tomonarang ingkan tungkui sapo.”

Aroh takut nisi aropmu porocaya ma Yesus 12:4-12

⁴ Hien Yesus, “Porhati aang cotuh, kawan tongkanyoh-Kuh. Aroh takut ma samah kolunon, oluco iroh boraoi ngompatoi ikan. Awi opah iyoh, iroh aroko boraoi nompi ome-ome kole ma ikan.

⁵ Akuh maraeh ma ikan ome co sobujur eh co sobulih tonyook me. Nyook leh ma Mohotara! Awi Are aroko baya bokuasa ngompatoi dulun. Are mahi bokuasa ika mende dulun hia ponah noraka! Jadi, sobujur eh ikan sobulih nyook ma Mohotara.

⁶ Limo kontuluh ompet amun toborakang dalo komurah lekaieh. Tapi ico kontuluh mahi aroko Mohotara solingoeh.

⁷ Mohotara meleh moleka ikan hangki kawan ompet taiyoh. Are ocop monau pira kuhat balou co nyan kuhung me. Awi Mohotara dalo koboraoi-Eh ma ikan, maka tului iyoh aroh takut.

⁸ Momporhati aang cotuh: Kokon dulun co mongaku Akuh nyan tohimo kawan dulun bokon are porocaya ma Akuh, Akuh mahi angar mongaku are nyan tohimo kawan molekat Mohotara, bahawa are yoh murid-Kuh.

⁹ Tapi sika dulun co aroko mongaku Anak Kolunon nyan tohimo kawan dulun bokon, Anak Kolunon mahi angar aroko mongaku are nyan tohimo kawan molekat Mohotara.

¹⁰ Sika dulun co mantun monantang Anak Kolunon, dulun cioh boraoi tomampun. Tapi sika dulun co mohina Roh Mohotara, dulun cioh aroko lian tomampun.

¹¹ Kotika ikan ehen hia kawan lopo ika sombayang ina tomongadili nyan tohimo pomorintah atawa ponguasa, aroh giha tintun cara ikan sobulih mombela arop me. Aroh giha tintun ome co sobulih tomantun.

¹² Awi kotika cioh ka, Roh Mohotara angar mara ome co sobulih tomantun me.”

Yesus hapo tindung ika majar dulun ina aroh sokakar 12:13-21

¹³ Ico beti ingkan halo dulun orong mantun ma Yesus, “Pak Guru, nyuhu ongka kuh magi warisan indang kuh.”

¹⁴ Tapi Yesus mantun ma are, “Ndoh konduang, arelu oko dulun co mangkat Akuh ika jarin hakim atawa holang ika mutus porokara muder iyoh!”

¹⁵ Paluh Yesus mantun ma kokon dulun co oko nyan intin, “Borondong-rondong leh! Jaga arop me ingkan kokon macam kosokakar. Awi bolum co sobujur eh samah sindo aroko bogantung ma ome aang co oko nyan ikan oluco harta me holowi-holea.”

¹⁶ Paluh Yesus majar iroh ma tindung cotuh, “Oko ico beti dulun tatou co tempun tana. Takit umoieh holowi-holea.

¹⁷ Are bopikir, ‘Ome co sobulih eh tongompiang kuh? Nyan ika kuh aroko uwung co cukup kahai ika mika takit umong kuh co orong tuh.’

¹⁸ Paluh are bopikir kole. Hieeh, ‘Otuh leh co angar piangkuh. Akuh angar ngehak ngekah kawan uwung kuh tuh, paluh mangun co meleh bahai kole, paluh mika kokon gandum hintang kawan barang kuh nyan intin.

¹⁹ Opah iyoh akuh mantun ma aropkuh bahawa akuh ocop orong mika ungkus cukup indan botoun-toun kotahieh. Jadi akuh boraoi nondoolai, kuman, ngorih hintang jorih jerah leh.’

²⁰ Tapi Mohotara mantun ma dulun co tatou yoh, ‘Uong tuu iko tuh! Momi tuh ka iko angar matoi. Dapot, kokon aang co tonyodia hintang aang co tongumpur indan mu tarop leh non, aroko indan mu bat, tapi dongam co angar empui kokoieh yoh.’

²¹ Opah iyoh Yesus monyimpul antun-Eh, Conon angar tojadi ma dulun co ngumpur koponatou indaieh tarop, tapi aroko umpi aang co ngonjorih songan Mohotara.”

Aroh giha tapi bosingkuh ma Mohotara 12:22-34

²² Opah iyoh, Yesus mantun ma kawan murid-Eh, “Tului koponatou nyan dunia tuh aroko monjamin kokon kobolum me, maka aroh giha tintun koponguman ika mu bolum. Aroh giha ka tintun lembon pokajan indan betim me.

²³ Bolum meleh porulu hangki kanon. Beti meleh porulu hangki lembon pokajan.

²⁴ Bolajar ingkan kawan ongkak. Iroh aroko mimbun, aroko maroi. Tiroh aroko gudang atawa uwung. Tapi Mohotara nyodia kanon ina iroh tenden bolum. Mositi ikan meleh porulu hangki kawan ongkak taiyoh!

²⁵ Arelu oko dulun co boraoi pokombu umur eh ico menit mahi tului kogihaeh.

²⁶ Ikan aroko boraoi nompi aang co kolik yoh. Maka tului iyoh, aroko usah giha tintun aang co bokon.

²⁷ Bolajar ka ingkan kawan kambang co borangai ika nyuluh. Kawan kambang tanon aroko bogawi atawa nusuk. Tapi sika dolak taiyoh ocu meleh segah hangki lembon co darang lekaieh isan co hapan Laca Salomo sinan!

²⁸ Dolak uru co nyuluh nyan umo baya nyuluh sopondehan leh, derek tonguru paluh tomapang. Tapi Mohotara tenden nompieh segah. Ikan meleh boleka hangki dolak uru nyan umo yoh. Jadi, mositi Mohotara angar nyodia lembon pokajan indam me. Tapi ikan kurang porocaya!

²⁹ Aroh umpi tujuan kobolum me baya mikir tintun ongkun ponguman bewe. Aroh giha ma aang cioh.

³⁰ Kawan dulun co aroko nyono Mohotara hopompaluh baya nganyap kawan aang tanon. Tapi ikan ocop nyono Mohotara Tamam me co monau kokon aang co tomorulu me yoh.

³¹ Jadi, hangki baya nganyap aang tanon, keleh nganyap aranaang co porulu ponah Korojaan Mohotara. Opah iyoh, kokon aang co tomorulu me yoh angar ihin indam me.

³² Ikan co baya isut kuhat eh, aroh takut! Tamam me co nyan sorga sanang mihi indam me aang co pio hinut tului ikan bolum nyan ponah Korojaan-Eh.

³³ Borakang eh leh aang co oko nyan iko. Paluh mihi duit eh indan dulun co mala. Amun ikan umpi aang cioh, iyoh samah rimai ma ikan nguan epok ika duit me nyan sorga. Epok cioh aroko boraoi ceet kototahieh. Koponatou cioh nyan sorga aroko angar boraoi punah. Arelu oko co boraoi monu atawa nakoeh. Aroko rayap co angar ngonceet eh.

³⁴ Jadi, sobulih eh ikan mika harta me nyan sorga, awi nyan omoh oko harta me, nyan intin ka songam me.”

Kawan murid Yesus sobulih hopompaluh siap ma korombut-Eh hopuli 12:35-48

^35-36 Bojaga-jagaboh! Somporengu kawan polayan co hopompaluh nganto korombut tuan eh buli ingkan pesta kawin. Iroh hopompaluh hapo lembon husus ika molayani tuan doh, momporhati kawan lampu ina tenden bolum, hopompaluh siap awi amun tuan eh dombut paluh ngatuk antop, maka iroh paluh jion mukap antop indaieh.

^37-38 Kawan polayan co siap yoh angar sanang, oluco tuan eh dombut ombu malom atawa tompolaoi. Tuan eh angar sanang ma iroh tului iroh hopompaluh siap nganto korombut eh. Ngoneh ehbat! Tuan conon angar nganti lembon eh ika molayani iroh. Are nyuhu iroh tuot kuman. Paluh are angar molayani iroh.

^39-40 Mingkat eh; bahawa ico beti dulun co nako dombut nyan kotika co aroko tomonau. Amun dulun co tempun lopo monau nganto omoh dulun co nako yoh angar dombut, mositi are monjagaeh ina dulun co nako yoh aroko lian muntam. Tului iyoh ikan mahi sobulih bosiap awi Anak Kolunon dombut nyan kotika co aroko tonyangka me.

⁴¹ Hien Petrus, “Tuhan, main ajaran-Mu ingkan kesah conon nin indan kokon dulun atawa baya indan kaih leh, kawan murid-Mu?”

⁴² Tuhan Yesus museh, “Ome boh polayan co sotia hintang boakar pikir co angar tomangkat Tuan eh jarin kopala kawan polayan co bokon hintang mihi tanggung-jawab indaieh ika magi kanon indan kawan polayan co bokon amun ocop dapot kotikaeh?

⁴³ Ihin aang co pio hinut polayan co kitan tuan eh nompi tugas eh ma kosotia, kotika tuan eh hopuli.

⁴⁴ Mositi, tuan eh angar mangkat polayan cioh sohinga are jarin pongurus kokon kawan harta banda tuan eh.

⁴⁵ Tapi, sompamaeh polayan cioh nin bopikir, ‘Aah tuan kuh tuh ocop tahi aroko dombut. Mositi incah tahi onieh. Jadi ome bewe aang co tongompiang kuh aroko tomonaueh.’ Paluh are molai molantu kawan polayan eh co bokon, bakah atawa bawe. Are mahi kuman, ngorih, dapot buso bosuh.

⁴⁶ Nah, tuan eh angar buli nyan kotika co aroko tomonaueh, nyan ondo co aroko tomonduga. Mositi tuan eh angar umpi hukuman co bahat indan polayan cioh, paluh nyakah are hia ika mohukum kokon dulun co aroko sotia.

⁴⁷ Polayan co ocop monau kojere tuan eh, tapi aroko nguan eh, hintang aroko siap ma korombut tuan eh angar bahat hukuman eh.

⁴⁸ Tapi Polayan co aroko monau kejere tuan eh, amun are umpi aang co sala sohinga sobulih tomohukum, baya isut leh hukuman eh. Amun Mohotara mihi orong indan dulun, Are angar boharap orong ka ingkan dulun cioh. Amun Mohotara mihi orong tangung jawab ma dulun, Are mahi angar nyawot meleh orong kole ingkan dulun cioh.”

Kawan murid Yesus angar nohimo tantangan ingkan dulun bokon malah ingkan koluargaeh 12:49-53

⁴⁹ “Akuh dombut ika manting apui hia dunia. Mahi kopioi amun apui cioh ocop ngori.

⁵⁰ Akuh incah sobulih nongkomo kosoranta co daras lau. Makitu karas kojorung-Kuh. Angar tenden jorung songang-Kuh dapot kosoranta cioh umbot.

⁵¹ Aroh bopikir Akuh dombut ika podamai kawan dulun nyan dunia tuh. Malah sobalik eh! Akuh dombut ika misah eh.

⁵² Pomisah cioh angar molai ingkan makitu awi oko ka dulun co porocaya ma Akuh hintang oko ka co aroh. Malah ponah kawan koluarga angar oko potentangan. Ika cuntu, amun ponah ico koluarga oko limo beti, maka tolu angar ngolawan duo.

⁵³ Tamai angar ngolawan anak co bakah hintang anak eh co bakah yoh angar ngolawan tamaieh. Tinai angar ngolawan anakeh co bawe hintang anakeh co bawe yoh angar ngolawan tinaieh. Umpueh co bawe angar ngolawan monantuieh co bawe hintang monantuieh co bawe angar ngolawan umpueh co bawe.”

Sorinai liwat kawan dulun sobulih ngompio hubungan ma Mohotara 12:54-59

⁵⁴ Yesus mantun ka ma dulun ngarun, “Kotika ikan noto anto ondo dombut ingkan topit matanondo picop, ikan mantun, ‘Mositi jere ucan.’ Paluh ondo mahi tuu-tuu ucan.

⁵⁵ Isanioh ka, kotika ikan nongkomo bahi napi ingkan solatan, ikan mantun, ‘Mositi hawa angar karas kopanai.’ Paluh, ikan mula tuu, awi ondo mula karas kopanai.

⁵⁶ Haas kawan dulun co pura-pura pio! Otoi baya noto hawun hintang nongkomo bahi, cuaca jarin tomonau me. Tapi noto kawan poristiwa co tojadi nyan jaman cotuh, ikan aroko lian monau roncana Mohotara.”

⁵⁷ “Sobulih eh ikan lian mutus eh tarop ika nompi aang co bujur.

⁵⁸ Sompamaeh amun oko dulun co nondah ikan. Pio lau, sorinai dapot hia pongadilan, iko bousaha ina porokara cioh nyua bereh. Amun aang cioh aroko tonompi, are angar momaksa iko ika ehen hia muka hakim. Paluh, hakim cioh angar nyarah iko hia potugas pongadilan. Potugas cioh kole angar pokuntam iko hia ponah seper.

⁵⁹ Ngoneh ehbat: iko aroko angar pusit ingkan seper sorinai iko nahur kokon danda mu yoh.”