Lukas 11 - Alkitab Porjanjian Baa Ponah Bohasa Dayak Siang

Yesus majar kawan murid-Eh tintun doa 11:1-13

¹ Nyan ico kotika, Yesus bodoa nyan ico ika. Kotika Are umbot bodoa, kawan murid-Eh mantun ma Are, “Tuhan, majar boh kaih bodoa, samah isan Yohanes majar kawan murid eh bodoa.”

² Hien Yesus, “Dahat me bodoa, mantun eh leh nain otuh: ‘Taman kaih, olueh kokon dulun mohormat Iko. Olueh Korojaan-Mu bokuasa nyan dunia samah ma nyan sorga.

³ Mihiboh kaih ngondai tuh ongkun ponguman kaih socukup eh.

⁴ Mampun kawan dosan kaih, awi kaih mahi mampun sika dulun co oko kosolaai ma kaih. Ngawat kaih ina kaih tenden tuhit ma porentah-Mu kotika oko co ningkoh ika kaih aroko porocaya.’ ”

^5-6 Opah iyoh Yesus mantun ma iroh. Hie-Eh, “Sompamaeh, oko ico beti ingkan halo ikan songola oko tongkanyoh eh co tondo nyan lopoeh awi dahat nyan solanai. Tapi nyan ika ikan arelu oko aang co boraoi tonyurung ika libang kanon indai. Jadi, oluco ocop bontung malom, iko sobulih tulak hia ika totangga kohaet me, nyawot dohop ikaeh lian potindah ikan ma tolu kontuluh rute.

⁷ Boraoi leh totangga kohaet me yoh aroko kolu awi kuloi tomonggangu. Awi ocop ombu malom, tungkang eh ocop tongontuin, are ocop tirui, kawan anak eh ocop tirui ka. Are aroko kolu monyun ika mihi ome-ome indam me.

⁸ Tapi momporhati aang cotuh. Boraoi leh totangga me yoh bopikir, oluco hien to hojolahan kole aroko dalo co akuh monyun mihi indam rute conon jah. Tapi tului ikan arelu oko haan nyawot, mositi are angar monyun, mihi indam me ome aang co tomorulu mu yoh.”

⁹ Momporhatieh bat, isan iyoh ka hal eh ma doa. Nyawot leh maka angar tomihi indam me. Nganyap leh, maka ikan angar haba. Ngatuk leh, maka antop angar tomukap indam me.

¹⁰ Awi sika dulun co nganyap angar norima; sika dulun co bousaha angar haba; hintang antop angar tomukap indan sika dulun co ngatuk.

¹¹ Paluh Yesus ngoholuh antun-Eh kole. “Sompamaeh oko ico beti bakah nyan halo ikan co anak eh nyawot ocin. Mositi lau ikan aroko mihi nyipo co boracun indaieh!

¹² Amun anak me nyawot toloh, mositi ikan aroko mihi katepkala indaieh!

¹³ Oluco ikan non dulun bodosa, ocop koraom me mihi aang co pio indan anak me. Nohani Mohotara Taman to co nyan sorga! Amun dulun nyawot Roh Mohotara, mositi Mohotara angar mihi indan dulun co nyawot yoh.”

Yesus tonondah hapo kuasan Lacan Setan 11:14-23

¹⁴ Oko dulun co tonyarung roh jahat. Roh jahat nompi dulun cioh ina eh uong aroko boraoi mantun. Nyan ico kotika, Yesus musir roh jahat cioh ika eh buho. Paluh dulun cioh boraoi hopander bat. Maka, orong dulun nyan intin co tokocit hintang hurong.

¹⁵ Tapi oko nyan halo iroh yoh co mantun, “Are musir roh jahat hapo kuasan Lacan Setan!”

¹⁶ Tapi oko ka dulun bokon co jere nyuwah Yesus. Iroh nyawot nompi aang co mosotahir ika mombukti bahawa kuasai-Eh puna tuu ingkan Mohotara, aroko ingkan Lacan Setan.

¹⁷ Tapi koraon Yesus aang co tomikir doh. Hie-Eh, “Amun ico nogara topacah ponah kawan kolompok co hopompaluh homusuh, mositi nogara cioh angar lumat. Amun kawan anggota koluarga nyangit homusuh, mositi koluarga cioh angar hancur.

¹⁸ Isan iyoh ka nyan ponah korojaan Setan. Oko dulun co mantun Akuh musir roh jahat hapo kuasan Lacan Setan. Conon sala lau. Awi amun korojaan Setan tobagi-bagi, nyangit hokolawan, mositi aroko boraoi botahan.

¹⁹ Jadi, sompamaeh Akuh musir roh jahat hapo kuasan Lacan Setan, ma kuasan ome kawan dulun co umba ikan musir roh jahat? Kawan dulun co umba ikan yoh angar nisi ikan sala!

²⁰ Tapi, co bujur iyohonon Akuh musir roh jahat hapo kuasan Mohotara. Maka, cioh artieh Korojaan Mohotara ocop oko nyan ikan.

²¹ Nyuwah momikir tindung cotuh: Oko ico beti dulun co mamut bangkah, capaieh langkap. Amun are jaga lopoeh, maka aman kokon harta bandaeh.

²² Tapi are tonyarang pian ico beti dulun co meleh mamut bangkah kole hangki are. Are kalah. Kawan capai, co tongacieh, tomorampas. Kokon kawan harta bandaeh co tomonjagaeh yoh, tohobagi dongai.

²³ Dulun co aroko momihak Akuh, sobujur eh are ngolawan Akuh. Dulun co aroko hokumpur ma Akuh, sobujur eh are momisah darai.”

Yesus momporingat ina borondong tohimo kuasan roh jahat 11:24-26

²⁴ “Amun roh jahat buho ingkan betin dulun, roh cioh ngolumbang padang gurun nganyap ikaeh boraoi nondoolai. Tapi are aroko haba. Tului iyoh are mantun, hieeh, ‘Akuh angar hopuli kole hia dulun co ocop tonaat kuh yoh!’

²⁵ Kotika are dapot dulun cioh, kitai dulun cioh samah isan lopo co borasih hintang borimpoh.

²⁶ Paluh are tulak, nyopopak pitu roh bokon co meleh jahat hangki are. Opah iyoh iroh uras dombut, muntam hia ponah dulun cioh, nukui intin. Kojekaieh, dulun cioh jarin meleh aroko pio hangki co sulak eh.”

Ome co kotuuieh tomihi Mohotara aang co pio hinut 11:27-28

²⁷ Kotika Yesus incah majar dulun ngarun yoh, oko ico beti bawe nyan halo iroh yoh. Bawe cioh mantun ma Yesus, hieeh “Tomihi aang co pio hinut tinam mu awi are nganak hintang ngomahai Iko!”

²⁸ Tapi hien Yesus, “Meleh kole, Mohotara mihi aang co pio hinut ma kokon dulun co ngoneh antun Mohotara hintang nontumun eh!”

Yesus nopoh dulun orong co nuntut ina-Eh nompi meleh orong aang co mosotahir kole 11:29-32

²⁹ Kotika meleh orong kole dulun co dombut hia ika Yesus majar, Are mantun, “Dalo kojahat eh kawan kolunon jaman cotuh. Iroh nuntut Akuh nompi ico aang co mosotahir ika mombuktieh Mohotara co tuu-tuu nyoruhan Akuh. Tapi baya ico leh buktieh co angar tomihi-Kuh indan doh, baya aang co mosotahir isan co tojadi ma nabi Yunus nyan jaman sinan.

³⁰ Isan nabi Yunus iyohco aang co mosotahir indan kawan dulun nyan Niniwe, isanioh ka Anak Kolunon angar jarin aang co mosotahir indan kawan dulun nyan jaman cotuh.

³¹ Nyan jaman sinan oko ratu ingkan nogara Seba co horong eh nyan topit solatan nogara Israel. Are nyalan ocu lau samah ma ingkan topakan tana ika boraoi ngoneh antun co boakar pikir ingkan Laca Salomo nyan Israel. Tapi makitu oko co meleh bokuasa hangki Laca Salomo sinan. Jadi, nyan ahir jaman daai, Ratu Seba angar bolum hopuli samah-samah ma kawan dulun nyan jaman cotuh paluh nocaknona kosolaan doh.

³² Isanioh ka, nyan jaman sinan, nabi Yunus momborita tungon Mohotara. Hayak kawan dulun nyan Niniwe ngoneh eh, iroh paluh naat dosa hintang hopompaluh ngonyorih songan Mohotara. Tapi makitu, oko nyan intoi co meleh bokuasa hangki nabi Yunus. Jadi, nyan ahir jaman daai, kawan dulun Niniwe mahi angar bolum hopuli samah-samah ma kawan dulun nyan jaman cotuh ika nocaknona kosalaan doh.”

Tindung tintun lampu 11:33-36

³³ Yesus ngoholuh kopomajar-Eh. Hie-Eh, “Amun oko dulun co montin lampu, are aroko nyuhuk eh atawa nyongkulop eh ma kantang. Malah, are mandak lampu cioh nyan laoh tohu, ina kokon dulun co muntam hia ponah lopo cioh noto kopandaueh.

³⁴ Mata somporengu lampu indan beti. Amun dulun sehat matai, borati ngolauh betieh pandau. Tapi amun matan dulun cioh aroko sono, borati ngolauh betieh pindong.

³⁵ Maka, borondong-rondong bat! Aroh dapot ikan bopikir oko kopandau nyan ponah ikan, tapi co sobujur eh aroko pandau tapi pindong.

³⁶ Amun ngolauh betin dulun cioh pandau, arelu oko tonga betieh mahi co pindong, maka ngolauh betin dulun cioh tonta lau, samah ma tongompandau cohaya lampu.”

Yesus nyompo kawan pomimpin agama ingkan kolompok Parisi hintang kawan guru agama Yahudi 11:37-54

³⁷ Opah Yesus umbot mantun, oko ico beti dulun Parisi nobara Are ika umba kuman nyan lopoeh. Maka Yesus tulak hia lopo dulun Parisi yoh, paluh tuot kuman nyan intin.

³⁸ Dulun Parisi cioh hurong noto Yesus kuman tapi aroko manyo silui-Eh soun.

³⁹ Hien Tuhan Yesus ma dulun Parisi cioh, “Ikan kawan dulun Parisi tonam me misut cangkir hintang pinjan co topit luar eh leh. Tapi nyan ponah songam me tarop incah karas kosokakar hintang kojahat.

⁴⁰ Bako ka ikan tuh! Mohotara co nompi aang co topit luar, mositi paluh nompi aang co topit ponah eh, ka?

⁴¹ Keleh hangki baya ngorasih topit luar eh leh cangkir hintang pinjan cioh, pio hurai amun kawan kanon co oko nyan ponah eh ihin indan kawan dulun co mala. Punai ikan bujur-bujur ngonyorih songan Mohotara.”

⁴² Mohotara angar mohukum ikan kawan dulun Parisi tului kuan gawim me co isan otuh. Ikan mihi indan Mohotara perpuluhan ingkan pongulih me ingkan hasir kawan imbun komulan co pokongolik eh isan kawan dorampah. Tapi ikan aroko sucing ma dulun bokon. Ikan aroko bujur-bujur mongasihi Mohotara. Mihi perpuluhan yoh pio. Tapi aroh dapot solingo bolaku sucing ma dongam me hintang mongasihi Mohotara ka!

⁴³ “Mohotara angar mohukum ikan kawan dulun Parisi tului gawim me co isan onon. Nyan ponah lopo Ika sombayang ikan herak tuot nyan topit muka, nyan ika co tohormat. Nyan pasar mahi ikan herak ma dulun nara ikan nyan halo dulun orong.”

⁴⁴ “Mohotara angar mohukum ikan kawan dulun Parisi. Ikan isan kolowong co aroko hapo ciri. Jadi kawan dulun co aroko monau oko kolowong nyan intin. Paluh aroko tonganta dulun nicak tungkuieh, kawan dulun co nyalan nyan tungkuieh.”

⁴⁵ Opah iyoh ico beti guru agama Yahudi mantun ma Yesus, “Guru, tului antun conon, kaih kawan guru agama mahi tomohina-Mu ka.”

⁴⁶ Yesus museh, “Mohotara mahi angar mohukum ikan kawan guru agama Yahudi, tului ikan ngombahat dulun orong ma orong macam poraturan co bahat. Nohani kole, isut mahi ikan aroko kolu dohop iroh ika poraturan conon boraoi tongompian doh!

⁴⁷ Mohotara angar mohukum ikan kawan guru agama Yahudi. Ikan mangun potugur ika mingkat patoi kawan nabi. Podahar, tatu hiang me yoh co ngompatoi kawan nabi taiyoh!

⁴⁸ Jadi tului gawim me yoh, borati ikan sotuju ma aang co tonguan kawan tatu hiang me. Tatu hiang me ngompatoi kawan nabi taiyoh, paluh ikan mangun potugur ika mingkat gawi cioh.

⁴⁹ Onon ceh tuluieh, Mohotara co boakar pikir mantun bahawa Are angar nyoruhan kawan nabi hintang kawan coruhan hia ikan dulun Israel, tapi ikan angar ngompatoi tongaeh hintang angar tonyiksa me tongaeh kole.

⁵⁰ Maka oko kawan dulun jaman cotuh co angar tomohukum Mohotara korinah kobahat eh. Iroh angar nangung hukuman tului pompatoi kokon nabi Mohotara ingkan tuhin dunia tomoncipta,

⁵¹ molai ingkan Habel tongompatoi dapot nabi Jakaria mahi tongompatoi. Nabi Jakaria yoh tongompatoi nyan oang mesbah ma Lopo Mohotara. Ngoneh eh bat! Kawan dulun nyan jaman cotuh mositi angar tomohukum tului kokon aang cioh.

⁵² Mohotara angar mohukum ikan kawan guru agama Yahudi, tului kunci ika mukap tungkang pongotahuan ingkan Mohotara tomika me, tapi ikan leh aroko kolu muntam ika nganyap pongotahuan cioh. Malah ikan mohalang kawan dulun co bojuang muntam.”

^53-54 Opah Yesus umbot mantun kokon aang taiyoh, Are tulak ingkan lopo dulun Parisi cioh niin. Molai ingkan intin, kawan dulun Parisi hintang kawan Guru Hukum Yahudi monantang Are ma angit doh. Orong nain kisok doh ma Yesus ika nyuwah Are. Iroh boharap Are mantun aang co sala, awi aang cioh co hapan doh ika nondah Are.