Galatia 1 - Alkitab Porjanjian Baa Ponah Bohasa Dayak Siang

Tontoke ingkan Paulus 1:1-5

^1-2 Indan co tohormat kawan jomaat nyan propinsi Galatia: Surat cotuh ingkan akuh, Paulus, hintang kawun ingkan kokon konduang co oko umba akuh. Akuh jarin rasul aroh tului tomili kolunon. Akuh jarin rasul bokon tomili hintang tonyoruhan pian kolunon. Tapi akuh tonyoruhan lansung ika momborita Tarung Pio pian Laca Co Tomonjanji Mohotara, iyohonon Yesus. Akuh mahi co tonyoruhan Mohotara Taman to umpi Yesus bolum hopuli ingkan pompatoi.

³ Akuh bodoa ika Mohotara Taman to hintang Tuhan Yesus Kristus horoholuh porahan koboraoi Eh kawun mihi kongolandah kongolami indam me.

⁴ Yesus matoi nyan sompolaki ina nyolamat ito. Are nguan iyoh ika ito tonyolamat ingkan kojahatan co oko nyan jaman cotuh ka. Kokon iyoh tojadi sosuai ma kojere Mohotara Taman to.

⁵ Haas ito potara Mohotara sokotahi-tahi eh. Amin!

Baya oko ico leh Tarung tintun kosolamatan co buah 1:6-10

⁶ Yesus Kristus ocop porahan kopioi-Eh ma ikan. Ma cara conon, Mohotara mili ikan ika jarin umat-Eh. Jadi, akuh tokocit lau ponah waktu co nyua ikan ocop kuloi Mohotara. Makitu ikan umba ico ‘tarung pio’ co bokon.

⁷ Tapi iyoh sama sino bokon Tarung Pio! Kawan dulun co majar onon nyau mubah Tarung Pio tintun Yesus Kristus, iyohonon Laca Co Tomonjanji Mohotara. Iroh nyuwah mongganti Tarung Pio ma tarung co sala. Jadi, iroh umpi ikan jarin bingung.

⁸ Tapi kaih ocop momborita ma ikan Tarung Pio co buah. Ome bewe co momborita ma ikan ico tarung pio co bobeda hangki onon, oluboh Mohotara mohukum iroh. Soandai eh oko nyan songkolang kaih kawan rasul Yesus atawa molekat ingkan sorga mahi co momborita tarung pio co bobeda, oluboh Mohotara co angar mohukum are.

⁹ Pira-pira waktu co ohut kaih ocop mantun tintun aang taiyoh. Makitu, akuh hopuli mantun onon kole. Amun oko dulun co momborita ma ikan ico tarung pio co bobeda ingkan co ocop me norima ingkan kaih, oluboh Mohotara mohukum dulun cioh.

¹⁰ Ma antun cioh, ocop jelas akuh aroh bousaha ngonyorih kolunon. Akuh baya bousaha ngonyorih atoi Mohotara leh! Soandai eh akuh bousaha ngonyorih kolunon, akuh bokon kole jungus tioh Kristus.

Mohotara mili Paulus jarin rasul Yesus 1:11-24

¹¹ Konduang kuh bakah bawe, akuh tuu-tuu jere ika ikan paham. Tarung Pio co tomomborita kuh aroh borasar ingkan pikiran kolunon.

¹² Awi akuh aroh norima tarung cioh ingkan kolunon. Elu oko dulun co majar akuh tintun tarung cioh. Yesus Kristus lehboh co porahan Tarung Pio yoh ma akuh.

¹³ Tapi, sorinai akuh porocaya ma Yesus, akuh bolum sosuai ma agama Yahudi. Ikan ocop monau cara kobolum kuh batuh ponah agama Yahudi non. Akuh korinah monganiaya kawan dulun co porocaya ma Yesus. Akuh bousaha ika ngolumat iroh.

¹⁴ Akuh mula tukoi bolajar kokon poraturan agama Yahudi. Akuh bolajar iyoh labih hangki kokon dulun Yahudi bokon co soumuran ma akuh. Akuh mahi korinah tuhit ma kokon poraturan ingkan tatu hiang to yoh.

¹⁵ Tapi bokon, Mohotara oko roncana husus indang kuh. Are mili akuh hiah akuh incah ponah olom tinang kuh. Are mili akuh ika jarin rasul Yesus, Anak-Eh. Are nguan onon aroh tului akuh pantas, tapi awi Are korinah koboraoi ma akuh. Maka, Mohotara jorih

¹⁶ porahan Yesus ma akuh ika akuh momborita ma kawan dulun co bokon ma Yahudi tintun Yesus. Jadi, akuh haba pomahaman tintun Yesus lansung ingkan Are leh tarop. Poko tului iyoh, akuh aroh nyawot ico beti mahi majar akuh.

¹⁷ Ocop oko kawan dulun co jarin rasul Yesus sorinai akuh. Nyan waktu iyoh, iroh oko nyan kota Yerusalem. Tapi, akuh aroh tulak hia idi ika tomajar pian doh. Akuh tulak hia tana Arab paluh hopuli kole hia kota Damsyik.

¹⁸ Tolu toun opah akuh jarin rasul Yesus, hanyar akuh tulak hia Yerusalem. Akuh nyau nyopopak rasul Petrus. Akuh baya nukui umba are kotahin limo balas ondo.

¹⁹ Nyan waktu iyoh akuh aroh sopopak ma kawan rasul co bokon kocuali Yokobus konduang Tuhan Yesus.

²⁰ Akuh bosumpah nyan tohimo Mohotara. Kokon co tonulih kuh indam me tuh bujur. Akuh aroh ngoncunih.

²¹ Kotika kuh oko nyan Yerusalem, akuh tulak hia pira-pira derah nyan propinsi Siria hintang Kilikia.

²² Poko tului iyoh, kawan jomaat Kristus nyan Yudea arinai piji sopopak ma akuh hopongito tampa.

²³ Iroh baya ngoneh borita tintun akuh. Oko kawan dulun co mantun, “Batuh are monganiaya kaih awi kaih porocaya ma Yesus. Are bousaha ika ngolumat kaih. Tapi makitu are leh bat momborita Tarung Pio tintun Yesus yoh.”

²⁴ Jadi, kawan dulun co porocaya nyan propinsi Yudea potara Mohotara tului Mohotara ocop mubah cara kobolum kuh.