Epesus 6 - Alkitab Porjanjian Baa Ponah Bohasa Dayak Siang

Hubungan halo kawan anggota awu kobian 6:1-9

¹ Ma kokon anak akuh mantun: Ikan sobulih nuhit dulun ongkome nyan ponah Tuhan. Iyohboh cara bolum co buah.

² Nyan Surat Borasih oko porentah cotuh: “Hormatboh ma tinam hintang tamam.” Porentah cotuh iyohco porentah portama co tongohomboh ma janji ka. Tuhboh janjieh:

³ “Ina pomolum mu pio hintang ombu umurmu nyan dunia tuh.”

⁴ Ma kokon tama akuh mantun: Aroh pongasar ma kawan anak me dapot umpi iroh jarin sangit. Tapi ikan sobulih mondidik iroh ma ajaran hintang nosehat ingkan Tuhan.

⁵ Ma kokon cipon akuh mantun: ikan sobulih nuhit tuan me co nyan dunia tuh. Nyook ma iroh ma nyaman hormat hintang atoi co montong morong, samah isan cara me nuhit Kristus.

⁶ Ikan sobulih nuhit iroh aroh tului ikan nyau dulun noto hintang nara ikan, tapi tului ikan iyohco kawan dulun co molayani Kristus hintang atoi me nyau nguan ome co tongonjere Mohotara.

⁷ Nguan ehboh kokon alogawim me ma kojorih atoi, soolah-olah ikan bogawi indan Tuhan, aroh baya indan kolunon.

⁸ Ikan monau bahawa kokon dulun, iyoh cipon atawa bokon cipon, amun iroh umpi aang co pio, maka iroh angar norima baleh ingkan Tuhan.

⁹ Ma kokon tuan akuh mantun: ikan mahi sobulih pio atoi ma kawan cipon me. Aroh horoholuh mancam iroh. Mingkat eh! Tuhan nyan sorga iyohco Tuhan co bokuasa ma iroh hintang ikan. Are aroko mila ma kawan dulun totentu.

Cara ngolawan kuasan jahat 6:10-20

¹⁰ Kojekaieh, kawan konduang, ikan sobulih tenden borohon ponah Tuhan, nyan ponah kokuatan kuasai-Eh.

¹¹ Ikan sobulih hapo kokon capa co ihin Mohotara indam me ina me lian botahan ngolawan kawan roncana co tongompian Lacan Setan ika nipu ito.

¹² Awi, ito kohojat aroh ngolawan kolunon, tapi ngolawan kokon macam kuasan kopindong nyan dunia tuh, ngolawan kokon kawan roh jahat nyan udara.

¹³ Jadi, ikan sobulih hapo kokon capa co ihin Mohotara ina hiah waktu ikan tonyarang pian kuasan jahat, ikan hegah botahan ngolawan iyoh. Hintang ina opah ikan bojuang dapot soropai ngolawan kuasan jahat taiyoh, maka ikan angar tenden tahan borohon.

¹⁴ Santuhboh caraeh ikan lian tenden tahan borohon: Hapo boh kosotia ma Mohotara sobagai owot kahang me, hintang kobujur harus sobagai lembon umat me.

¹⁵ Hapoboh kosiapan momborita Tarung Pio tintun kongolandah kongolami ingkan Tuhan jarin sopatu me.

¹⁶ Ponah kokon koadaan, ikan sobulih tenden borohon porocaya ma Kristus. Iyoh samah isan tolawang co lian hapam me ika micop kokon anak panah apui ingkan Lacan Setan.

¹⁷ Hapoboh kosolamat co ihin Mohotara isan tupi umat co nyolindung ikan; hintang norimaboh Antun Mohotara ingkan Roh Mohotara. Antun cioh angar jarin isan padang indamme.

¹⁸ Ikan sobulih horoholuh botawat ina sika ikan bodoa, ikan lian tomombimbing Roh Mohotara. Ponah kokon macam doa hintang sawot asi ma Mohotara. Aroh umbot bodoa indan kokon dulun co porocaya.

¹⁹ Bodoa ka boh indang kuh, ina sika akuh pander, Mohotara mihi luang antun indang kuh. Bodoaboh ina kuh bohanyi momborita Tarung Pio tintun roncana Mohotara co sinan aroko tomonau kolunon.

²⁰ Mula akuh tonyoruhan ika momborita Tarung Pio yoh. Iyohboh alasan akuh tomokuntam hia ponah seper. Jadi, bodoaboh ina kuh bohanyi porapot Tarung Pio yoh, isan co sobulih tongompiang kuh.

Kawan antun tontiput Paulus ponah surat eh 6:21-24

^21-22 Akuh nyoruhan Tikikus hia ikan. Are iyohco konduang to co tongasih. Are tenden horoholuh molayani Tuhan. Are tonyoruhankuh hia ikan ina ikan boraoi ngoneh langsung ingkaieh tintun koadaan kokon kaih, sohinga ikan boraoi jarin tohibur.

²³ Kawan konduang, akuh bodoa ina Mohotara Tama hintang Tuhan Yesus Kristus mihi kongolandah kongolami indam me hintang umpi ikan sasar mongasihi hintang sasar porocaya ma-Eh.

²⁴ Akuh bodoa ina Mohotara porahan kopion atoi-Eh ma kokom me co mongasihi Tuhan to Yesus Kristus ma asi co aroko koumbot eh.