Epesus 5 - Alkitab Porjanjian Baa Ponah Bohasa Dayak Siang

Cara bolum ponah kopandau 5:1-20

¹ Awi iyoh, kawan konduang, sobagai kawan anak Mohotara co tomongasihi-Eh, ikan sobulih nyuntu Mohotara.

² Ikan sobulih mongasihi dongam samah isan Kristus ocop mongasihi ikan, iyohonon Are nyarah arop-Eh jarin kurban porsembahan ika nangung hukuman dosan to. Are jarin porsembahan harum co ngonjorih Mohotara.

³ Aroh umpi dosa hokoruh. Aroh umpi kawan aang co aroko sorunuh. Aroh pongalam. Kawan aang taiyoh samah sindo aroko patut indan umat husus tioh Mohotara.

⁴ Aroh hapo antun luse, antun co aroko boguna, antun jahat. Kawan aang taiyoh aroko pantas ka. Malah seen, ikan sobulih mucap sukur hia Mohotara.

⁵ Monauboh otuh: Dulun co umpi dosa hokoruh, dulun co umpi kawan aang co aroko sorunuh, dulun co pongalam (pongalam yoh samah isan nyembah aang co boganan), kokon doh aroko lian jarin anggota Korojaan Kristus hintang Mohotara.

⁶ Aroh totipu ma dulun co porapot ajaran co bobeda hangki onon. Antun eh aroko bujur. Awi, mositi Mohotara angar mohukum kawan dulun co nguan kokon macam kojahat taiyoh, kawan dulun co aroko tuhit ma-Eh.

⁷ Tului iyoh, aroh ikan umba umpi kojahat halo iroh.

⁸ Mula batuh ikan nukui nyan ponah kopindong. Tapi makitu ikan ocop muntam hia ponah kopandau awi ikan nyono Tuhan Yesus. Jadi, ikan sobulih bolum ma cara co patut indan kawan dulun co bolum ponah kopandau.

⁹ Awi, tuhboh hasir ingkan cara bolum ponah kopandau yoh: Dulun cioh umpi kopio, jarin bujur nyan tohimo Mohotara, hintang ngumba ajaran co buah.

¹⁰ Ito sobulih bousaha bolajar ome co ngonjorih Tuhan.

¹¹ Aroh ikan umba nguan kawan alogawin dulun co incah bolum ponah kopindong. Uras iyoh mohampa leh. Tapi ikan sobulih umpi ina kawan alogawin doh jarin tomonau.

¹² Kawan alogawi co tonyuhuk doh yoh korinah jahat. Amun ito mahi pander tintun iyoh, aang cioh nyongkohaan.

¹³ Tapi, uras alogawi jarin tomonau amun kopandau molet inyaieh. Awi, kopandau umpi kokon aranaang jarin leha.

¹⁴ Iyohboh tuluieh oko antun cotuh: “Ooi iko co tirui, monyunbat! Iko co matoi, bolumbat hopuli! Kristus angar ngompandau iko.”

¹⁵ Awi iyoh, ikan sobulih porhati cara kobolum me. Aroh bolum isan kawan dulun co aroko boakar pikir, tapi bolum isan dulun co bopikir akar.

¹⁶ Hapoboh sika kosempatan ika nguan aang co pio. Awi, Jaman cotuh iyohco jaman co jahat.

¹⁷ Aroh uong, tapi ngusahaboh ina me paham ome co tongonjere Tuhan.

¹⁸ Aroh ikan buso tului angur awi dulun co buso aroko lian noro kojere betieh. Tapi ikan sobulih tumun Roh Mohotara,

¹⁹ hokorohon atoi dongam ma hapo antun dolang ingkan masmur, kawan koponara hintang lagu rohani. Monyanyi boh nara Tuhan ma atoi co jorih.

²⁰ Horoholuh bosukur boh ma Mohotara Taman to indan kokon aranaang. Horoholuh bosukurboh ma-Eh ponah aran Tuhan to, Yesus Kristus.

Cara bolum hanak horuh 5:21-33

²¹ Ikan sobulih tolindah nyook ico ma co bokon ika mohormati Kristus.

²² Indan kokon bawe co ocop ngomano akuh mantun: Ikan sobulih mohormat banamme isan ikan mohormat Tuhan.

²³ Awi, bana iyohco kuhung oruh isan Kristus iyohco kuhung kokon dulun co porocaya ma-Eh. Are nyolamat iroh co jarin isan beti-Eh leh.

²⁴ Tului iyoh, ponah kokon aranaang oruh sobulih mohormat banai isan kawan dulun porocaya mohormat Kristus.

²⁵ Ma kokon kawan bakah co ocop ngoruh akuh mantun: ikan sobulih mongasihi oruh isan Kristus ocop mongasihi kawan dulun porocaya. Are nyarah arop-Eh dapot matoi

²⁶ ina doh jarin borasih ingkan dosan doh. Are hapo danum hintang Antun Mohotara ika umpi iroh borasih.

²⁷ Ma sanioh, Kristus umpi ina doh lian tonjok nyan tohimo-Eh sobagai jomaat co tohormat, arelu oko dosa, arelu oko kosolaa ome bewe. Iroh bujur-bujur jarin borasih hintang aroko lian tonyala.

²⁸ Tului iyoh bakah bana sobulih mongasihi oruh eh samah isan are mongasihi betieh tarop. Amun bakah bana mongasihi oruh eh, iyoh isan are mongasihi arop eh tarop.

²⁹ Aroko piji oko dulun co ngodolee betieh leh. Malah are molohara hintang nyoneueh. Iyoh isan co tongompian Kristus indan jomaat-Eh,

³⁰ Tului ito iyohco anggota beti-Eh.

³¹ Oko antun cotuh co tonulih ponah Surat Borasih: “Tului iyoh, kawan bakah angar naat tinan-tamaieh paluh hico ma oruh eh. Sohinga dulun duo iyoh jarin ico beti.”

³² Arti antun cioh korinah jalom. Tapi co tomaksut kuh iyohco hubungan antara Kristus hintang jomaat-Eh.

³³ Oluco sanioh, oko arti indam me hopomasing ka: Sika bakah bana sobulih mongasihi oruh eh isan are mongasihi arop eh leh. Sika oruh sobulih mohormat banaieh.