Epesus 4 - Alkitab Porjanjian Baa Ponah Bohasa Dayak Siang

Jomaat sobulih hokohico ponah Kristus 4:1-16

¹ Tului iyohboh akuh, dulun co tomokuntam ponah seper tului molayan Tuhan, nosehat ikan ika ikan nguan kobolum me sosuai ma porentah Mohotara hiah Are naah ikan ina jarin umat-Eh.

² Iyohonon, ikan sobulih horoholuh randah atoi, aroh pongasar hintang sabar. Poleha bahawa ikan hopasi sosamah ikan ma cara hobantu ico ma co bokon.

³ Borusahaboh tuu-tuu bolum ngolandah ma co bokon ina me tenden hokohico ponah Roh Mohotara.

⁴ Awi, kokon to co porocaya samah isan ico beti. Baya oko ico Roh Mohotara. Sanioh ka, ikan co tonaah oko ico harapan co samah, iyohonon ikan yakin moharap kokon co tomonjanji Mohotara ma ito.

⁵ Baya oko ico Tuhan co bokuasa ma ito. Ito oko ico koporocayaan hintang ico baptisan co samah.

⁶ Baya oko ico Mohotara, ico Tama kokon dulun co porocaya. Are bokuasa ma kokon aranaang, bogawi molalui kokon aranaang, hintang oko ponah kokon aranaang.

⁷ Tapi Kristus mihi komampuan husus ma ito hopomasing sosuai ma kojere-Eh.

⁸ Iyohboh tuluieh oko antun cotuh ponah Surat Borasih: “Kotika Are nukat hia ika co hunyung, Are mehen kawan dulun co tongalah-Eh ponah ojat. Are mahi mihi bobagai hodiah indan kawan dulun.”

⁹ Porhatieh ponah ayat cioh oko antun, ‘Are nukat’. Mositi iyoh boarti sorinaieh Are mahi toka hia ika co poko pinda nyan pindaondo tuh.

¹⁰ Jadi, Kristus co ocop toka hia dunia tuh, Are mahi co ocop nukat hia ika co ocu meleh hunyung nolangkun langit co poko hunyung. Iyoh tojadi ina Are lian nyolungkop kokon aranaang ma kooko-Eh.

¹¹ Areboh co mihi komampuan husus indan kawan dulun. Oko co tomihi komampuan husus ika jarin kawan rasul. Oko co bokon tomihi komampuan husus ika jarin nabi. Oko co bokon kole tomihi komampuan husus ika momborita Tarung Pio. Oko ka co tomihi komampuan husus ika jarin gombala. Oko ka co tomihi komampuan husus ika majar.

¹² Kristus mihi kawan komampuan husus taiyoh ina iroh lian umpi kokon dulun bokon co porocaya lian molayani Are. Ma isanioh, kokon jomaat botumbuh hintang jarin dohon ponah Kristus.

¹³ Kokon to sobulih molayani co bokon ma cara cioh sukun ito erat hokohico awi ito sasar porocaya hintang sasar nyono Anak Mohotara. Ito mahi sasar bopikir akar hintang borohon dapot jarin somporaka isan Kristus. Ito jarin borohon porocaya isan dulun ngongko

¹⁴ aroh isan kawan daja bat co bohinai tonipu ma kokon macam ajaran co sala. Ito aroko porocaya ma kawan dulun co licik yoh co nyau umpi dulun jarin sasat.

¹⁵ Tapi ito borohon porocaya ajaran co buah ma hopasi. Ma isan iyoh, ito botumbuh jarin samah isan Kristus, pomimpin to. Are samah isan kuhung

¹⁶ ingkan kokon anggota beti co tosusun rapi hintang bohubungan jilet ma kawan anggota co bokon. Amun sika anggota bogawi sosuai ma komampuan husus co tomihieh, maka Kristus umpi ngolauh beti botumbuh ponah asi.

Bolum ma cara baa co ngonjorih Tuhan 4:17-32

¹⁷ Awi iyoh, akuh mantun otuh, malah akuh nyuhu ikan ponah Tuhan: Aroh bat bolum isan kawan dulun co aroko nyono Mohotara. Pikiran doh mohampa.

¹⁸ Iroh aroko boraoi paham tintun Mohotara tului iroh nukui ponah kopindong, ocu ingkan kobolum co ihin Mohotara. Awi, Iroh aroko nyono Mohotara, hintang tului atoi doh makeng.

¹⁹ Iroh aroko boraoi mohaan. Ma sanioh, iroh horoholuh ngumba kojere beti hintang umpi kokon macam dosa hokoruh sokohandak atoi doh.

²⁰ Tapi iyoh aroh cara bolum co ikan polajari hiah waktu ikan tomara tintun Kristus.

²¹ Awi, hiah waktu ngoneh tintun Are, ikan norima ajaran co buah tintun Yesus.

²² Ikan tomajar ika naat cara bolum me co tomuun yoh, iyohonon pomolum me jarin rusak tului ikan ngumba kawan kojere co nipu ikan.

²³ Ikan tomajar ika morubah atoi hintang pikiran me

²⁴ ina me bolum ma cara co baa, iyohonon pomolum co tomihi Mohotara ina me sasar samah isan Are. Maksut eh, ikan tuu-tuu bolum bujur nyan tohimo-Eh hintang bolum borasih ingkan dosa.

²⁵ Awi iyoh, aroh ngoncunih. Ikan sobulih mantun co bujur ma kawan konduang co bokon. Awi, ito samah-samah anggota umat Mohotara.

²⁶ Amun ikan jarin sangit, aroh dapot ikan umpi dosa. Ikan sobulih umbot sangit sorinai matanondo picop.

²⁷ Aroh mihi kosempatan indan Lacan Setan ika umpi ikan bodosa.

²⁸ Dulun co batuh nako, aroh nako bat. Tapi, are sobulih bogawi bohimat ma siluieh leh umpi aranaang co pio, ina are lian dohop dongai co kokurangan.

²⁹ Amun ikan mantun, aroh hapo kawan antun co luse. Tapi hapoboh kawan antun co pio ika ngonohon atoi dulun bokon sosuai ma koporuluan doh. Ma sanioh, kawan dulun co ngoneh antun cioh ngohaba kopio.

³⁰ Aroh umpi Roh Mohotara jorung. Awi, Mohotara ocop mihi Roh-Eh indam me sobagai ciri bahawa ikan angar tonyolamat nyan ahir jaman.

³¹ Aroh bat poroh atoi, ritot-ritot, sangit. Aroh kohojat atawa mohina dulun bokon. Aroh umpi kokon macam kojahatan isan iyoh.

³² Tapi, ikan sobulih pio atoi hintang hopomasi. Ikan sobulih mampun dulun bokon samah isan Mohotara mampun ikan molalui alogawin Kristus.