Epesus 3 - Alkitab Porjanjian Baa Ponah Bohasa Dayak Siang

Roncana Mohotara indan kawan dulun bokon ma Yahudi 3:1-13

¹ Iyohboh tuluieh akuh, Paulus, molayani Kristus Yesus momborita Tarung Pio ma ikan kawan dulun bokon ma Yahudi. Tului akuh nguan iyoh, maka akuh tomokuntam hia ponah seper.

² Tantu ikan ocop ngoneh tintun tugas cioh co ihin Mohotara ma akuh. Tului kopion atoi-Eh, Are nyoruhan akuh ika molayani ikan.

³ Are maraeh ma akuh roncana-Eh co sinan aroko tomonau kolunon. Akuh ocop nulih socara singkat indam me tintun aang cioh.

⁴ Amun ikan mombacaeh, ikan angar paham tintun roncana-Eh co tomolaksana-Eh molalui Kristus samah isan akuh momaham eh.

⁵ Hiah jaman sinan, Mohotara aroko mara roncana-Eh yoh ma kolunon. Tapi makitu, Are hapo Roh-Eh ika maraeh ma kawan rasul hintang kawan nabi co tomili-Eh husus ika molayani Are.

⁶ Santuhboh roncana Mohotara yoh: Are umpi caraeh ina kawan dulun bokon ma Yahudi haba aang co pio hinut samah isan dulun Yahudi. Amun iroh porocaya Tarung Pio tintun Kristus, iroh jarin ico umat halo ma dulun Yahudi co porocaya. Iroh samah-samah lian norima kokon co tomonjanji Mohotara ponah Kristus Yesus.

⁷ Mohotara porahan kopion atoi-Eh ma akuh ma nyoruhan akuh momborita Tarung Pio cioh. Kuasai-Eh bogawi ponah aropkuh dapot akuh lian molayani Are.

⁸ Nyan halo kokon umat Mohotara, akuh co poko aroko penting. Tapi, Mohotara tenden porahan kopion atoi-Eh ma akuh ma cara cotuh. Are nyoruhan akuh momborita hia kawan dulun bokon ma Yahudi tintun kokon aang co pio hinut co ihin Kristus. Ito aroko lian mombayang eh kokon aang co pio hinut co korinah bohimat lau yoh.

⁹ Mohotara mahi nyoruhan akuh ika monjelas ma kokon dulun tintun roncana-Eh indan kawan dulun bokon ma Yahudi. Ingkan sinan anin, Mohotara co moncipta kokon aranaang arinai maraeh ma kolunon tintun roncana-Eh yoh.

¹⁰ Tujuan ingkan kokoi tuh iyohonon ina molalui jomaat, kawan pomorintah hintang kawan ponguasa nyan sorga jarin monau bahawa Mohotara korinah lau pikir akar ponah kokon aranaang.

¹¹ Iyohonon Mohotara umpi ito jarin ico umat nyan ponah Kristus Yesus, Tuhan co bokuasa ma ito. Iyohboh roncana-Eh ingkan kosulak eh indan sokotahi-tahieh.

¹² Ito lian noharep Mohotara ma koyakin hintang aroko nyaman akut tului ito porocaya ma Kristus hintang hokohico ma Are.

¹³ Awi iyoh, akuh nyawot asi ina me aroh putus asa oluco akuh tomokuntam hia ponah seper. Akuh mondorita isan iyoh awi akuh molayani ikan. Tapi uras pondoritaankuh yoh ika kopiom me.

Paulus bodoa ina doh monau bahawa Kristus korinah mongasihi iroh 3:14-21

¹⁴ Awi iyoh, akuh bosujut nyan tohimo Mohotara Tama.

¹⁵ Are iyohco Tama kokon sika koluarga nyan sorga hintang nyan pindaondo. Awi, kokon to oko baya tului Are.

¹⁶ Are iyohco sumer kokon aranaang hintang korinah tohormat. Akuh bodoa ina Are dohop ikan sosuai ma sipat-Eh yoh, iyohonon ina are umpi atoi hintang jiwa me borohon ma kuasan ingkan Roh-Eh.

¹⁷ Ma sanioh, Kristus horoholuh nukui ponah atoi me awi ikan porocaya ma-Eh. Asi-Eh jarin pondasi pomolum me hintang umpi ikan sasar borohon.

¹⁸ Akuh bodoa ina me halo kokon dulun co porocaya lian paham bahawa Kristus korinah mongasihi ikan. Asi-Eh korinah kobolambah, korinah kombui, korinah kohunyung, hintang korinah kojalom eh.

¹⁹ Asi-Eh korinah kahai dapot arelu oko dulun co lian momaham kokoieh. Tapi, akuh tenden bodoa ina me lian nyono asi cioh. Ma sanioh, atoi hintang pikiran me angar jarin sasar ponu ma kokon aranaang co oko nyan ponah sipat Mohotara.

²⁰ Topotaraboh Mohotara! Are lian nguan orong aang, meleh orong hangki ome co ito nyawot atawa tomomikir to. Awi, kuasai-Eh bogawi nyan ponah ito.

²¹ Topotaraboh Are awi Are tohormat! Mudahan Mohotara tonara molalui Yesus Kristus hintang molalui kawan dulun co porocaya ma-Eh. Mudahan Mohotara tonara turun-tomurun dapot sokotahi-tahieh. Amen!