Epesus 2 - Alkitab Porjanjian Baa Ponah Bohasa Dayak Siang

Mohotara mihi kobolum baa 2:1-10

¹ Batuh, ikan ocop tomisah ingkan Mohotara. Soolah-olah ikan ocop matoi tului ikan bodosa hintang molangar kawan porentah Mohotara.

² Waktu iyoh, cara bolum me samah isan kawan dulun nyan dunia tuh co aroko nyono Mohotara. Ikan tumun Lacan Setan co bokuasa nyan langit nyan hunyung kokon kuasan jahat. Are iyohco roh co bogawi ponah atoi kawan dulun co aroko nuhit Mohotara.

³ Sobujureh, sinan ito uras bolum ma cara co samah isan iyoh. Ito tumun kawan kojere betin to. Ito bolum sosuai ma pikiran hintang kojere to tarop. Tobiat to iyohco kawan dulun co patut tomajap Mohotara samah isan kawan dulun bokon.

⁴ Tapi Mohotara korinah kopomasi. Are korinah mongasihi ito.

⁵ Tului iyoh, oluco sinan ito ocop matoi tului dosan to, Mohotara ocop mihi ito pomolum baa samah-samah ma Kristus. Ikan tonyolamat baya tului Mohotara porahan kopion atoi-Eh ma ikan.

⁶ Samah isan Mohotara mangkat hintang mihi ika tohormat nyan sorga indan Kristus, Mohotara umpi iyoh ka indan to awi ito ponah Kristus Yesus.

⁷ Iyohboh caraeh Mohotara porahan kopion atoi-Eh ma ito ponah Kristus Yesus. Mohotara nguan iyoh ina nyan kawan masa pongaan kawan dulun lian noto bahawa Are korinah pio.

⁸ Awi, ikan tonyolamat tului Mohotara porahan kopion atoi-Eh ma ikan hintang awi ikan porocaya ma Kristus Yesus. Iyoh aroh aranaang co ikan umpi, tapi aranaang co ihin Mohotara ma ikan.

⁹ Ito tonyolamat ma cara cioh ina arelu oko dulun co lian nara arop eh tarop soolah-olah are tonyolamat tului are umpi kopio.

¹⁰ Awi, ito tuh tonampa Mohotara, hintang molalui Kristus Mohotara nguan ito ina to nguan kawan aang co pio, iyohonon kawan alogawi co Are ocop nyodiaeh sorinaieh indan to.

Mohotara umpi kokon dulun co porocaya jarin ico umat-Eh 2:11-22

¹¹ Awi iyoh, kawan konduang, mingkat koadaan me sinan. Ikan tonganak sobagai kawan dulun bokon ma Yahudi. Dulun Yahudi mantun iroh umat Mohotara tului iroh tomalak, aranaang co tomonggawi pian silun kolunon leh. Iroh nisi ikan kawan dulun co aroko tomalak aroh tomasuk umat Mohotara.

¹² Hiah waktu iyoh, ikan arinai nyono Kristus. Ikan iyohco tomuoi, aroh warga bangsa Israel co tomili Mohotara. Ikan bokon dulun co ngohaba ome co tomonjanji Mohotara. Jadi, ikan arelu oko harapan. Ikan bolum nyan dunia tuh aroko nyono Mohotara.

¹³ Tapi makitu ikan aroko sanioh bat awi ikan nyan ponah Kristus Yesus. Sinan ikan ocu ingkan Mohotara tapi makitu ikan jarin dokin tului daha Kristus.

¹⁴ Areboh co umpi ito bodamai. Sinan dulun Yahudi bomusuh ma dulun bokon ma Yahudi. Tapi Kristus umpi kokon to co porocaya ingkan duo pihak yoh jarin ico umat, hintang Are ocop potiho nyama kohobomusuh co sinan co ngoholang iroh isan kuta batu co hunyung.

^15-16 Sinan dulun Yahudi ngonulu kokon porentah hintang poraturan nyan Hukum Torat ina dosan doh tomampun hintang iroh lian bodamai hopuli ma Mohotara. Tapi, hiah waktu Kristus jarin kolunon hintang matoi nyan sompolaki, Are umpi cara cioh aroko lian tohapo bat, awi Are co nangung hukuman dosan kokon dulun. Ma sanioh, Are umpi ina kokon dulun co porocaya ingkan duo pihak yoh, dulun Yahudi hintang dulun bokon ma Yahudi, iroh lian bodamai hopuli ma Mohotara. Kristus nguan kokon iyoh ina doh jarin ico umat co baa nyan ponah Are. Kawan dulun co porocaya ingkan duo pihak cioh bodamai ma co bokon. Iroh aroko hobomusuh bat tului gawin Kristus nyan sompolaki

¹⁷ Kristus ocop dombut momborita bahawa kawan dulun lian bodamai hopuli ma Mohotara. Are momborita iyoh ma ikan kawan dulun bokon ma Yahudi co ocu ingkan Mohotara hintang ma kaih kawan dulun Yahudi co doni.

¹⁸ Ito ingkan kodua pihak yoh lian dombut hia Mohotara Tama ma cara co samah, iyohonon molalui Kristus. Kokon to tomihi Roh Mohotara co samah co umpi iyoh tojadi.

¹⁹ Awi iyoh, ikan aroh dulun tomuoi bat. Ikan aroh dulun co ocu ingkan Mohotara. Tapi ikan jarin ico umat halo ma kawan dulun bokon co husus tioh Mohotara. Ikan jarin kawan anggota koluarga Mohotara.

²⁰ Ikan samah isan lopo co tomangun tungkui pondasi batu, iyohonon kawan rasul hintang kawan nabi, ma Kristus Yesus sobagai batu co poko penting.

²¹ Are umpi kokon bagian lopo cioh, iyohonon ito co bobeda, jarin tosusun dohon hintang pio sohinga lopo cioh jarin sasar bahai. Lopo cioh jarin Lopo Mohotara co husus indan Tuhan.

²² Tului ikan nyan ponah Kristus, maka ikan mahi jarin bagian lopo cioh co tomangun jarin ika tukui Mohotara, iyohonon Roh-Eh nukui nyan ponah eh.