2 Timotius 4 - Alkitab Porjanjian Baa Ponah Bohasa Dayak Siang

Tenden bogawi indan Tuhan ma kopio 4:1-8

¹ Nyan tohimo Mohotara hintang Yesus co angar mohakimi dulun co bolum hintang co matoi, demi ponyataan-Eh hintang demi Korojaan-Eh, akuh tuu-tuu nungon ma iko:

² Momborita Antun Mohotara! Momborita eh boh ma kongakar nyan sika waktu. Dohop dulun ina ngombuah cara kobolum eh. Nopoh dulun co umpi kosolaa. Nosehat hintang mihi somangat ma dulun ina horoholuh umpi aang co pio. Nguanbat uras antanon halo kosabar. Nguanbat kokoi eh samir majar Antun Mohotara.

³ Awi cagar dombut waktu eh, kawan dulun aroh kolu ngoneh ajaran co buah. Iroh nyau numba kojere doh. Jadi, iroh angar ngumpur kawan guru co baya majar kawan aang co pokomih tolingan doh.

⁴ Iroh aroh kolu ngoneh ajaran co buah. Tapi, iroh nyau porocaya kawan kesah co tonampa-nampa co aroh bujur.

⁵ Tapi iko sobulih horoholuh bopikir jelas ponah koadaan ome bewe. Tenden tahan borohon ponah pondoritaan. Momborita Tarung Pio ma kawan dulun co arinai piji ngoneh eh. Nguanbat kokon alogawi co tomihi Mohotara indam.

⁶ Akuh mihi kawan porentah tatuh ma iko awi aroh tahi oni akuh angar matoi. Akuh ocop bogawi indan Yesus ponah kobolum kuh. Makitu, akuh siap nyarah kobolum kuh somporengu dulun nyarah kurban komolum indan Mohotara.

⁷ Akuh ocop bojuang pio lau, akuh ocop ngumbot potandingan, hintang akuh tenden aroh borubah dapot soropai.

⁸ Hodiah co bujur ocop tonyodia indangkuh pian Tuhan. Are angar mihi hodiah cioh indangkuh nyan ondo Are mohakimi kokon dulun ma koadil. Are mahi angar mihi hodiah cioh indan kawan dulun co bolingu nganto korombut-Eh.

Kawan tungon socara pribadi indan Timotius 4:9-22

⁹ Borusaha jion deoi dombut hia akuh

¹⁰ awi Kreskes ocop tulak hia propinsi Galatia. Titus tulak hia propinsi Dalmatia. Bokon ma iyoh, Demas tulak hia kota Tesalonika. Tapi Demas naat akuh awi are incah karas koherak ma kojorih nyan dunia tuh.

¹¹ Makitu baya Lukas co incah umba akuh. Waktu iko dombut, nyompakat Markus ina are umba homboh iko. Akuh nyau are mahi dombut awi are jarin dulun co dohop ponah polayanan.

¹² Tikikus ocop tonyoruhankuh hia kota Epesus.

¹³ Ponah Solanam hia intoi, kotika iko nyihin kota Troas, nongkace monu lembon hangat kuh co tomolenteng ma Karpus nyan intin. Mehen ka kokon pongkulung buku kuh, husus eh kawan buku co penting.

¹⁴ Oko tukang tosan co arai eh Aleksander. Are ocop nguan orong aang co jahat ika monentang polayanan kuh. Tuhan angar maleh are sosuai ma alogawi eh yoh.

¹⁵ Tapi iko mahi sobulih botawat tohimo are yoh, awi are korinah naleh ajaran to.

¹⁶ Kosulak lau akuh mombela arop nyan pongadilan, arelu oko ico mahi jolaha co dohop akuh. Uras eh ocop naat akuh. Akuh bodoa Tuhan mongampun iroh awi iroh isan iyoh.

¹⁷ Tapi Tuhan nyohupang akuh. Are mihi kokuatan dapot akuh hegah momborita Tarung Pio yoh, ika tongoneh kokon dulun co bokon ma Yahudi. Hintang akuh tolapas ingkan bohaya pomatoi.

¹⁸ Tuhan angar nyolamat akuh ingkan kokon usaha co jahat. Are angar mehen akuh ma kosolamat hia ponah Korojaan-Eh nyan sorga. Are layak tonara sokotahi-tahi eh. Amin!

¹⁹ Porapot tontoke kuh indan Priska doruo Akwila. Porapot tontoke kuh indan kokon dulun co nukui nyan lopo Onesiporus ka.

²⁰ Erastus incah oko nyan kota Korintus. Tropimus rahat hotoro kotika akuh naat are nyan kota Miletus.

²¹ Borusaha dombut sorinai sorang lowut laut. Ebulus, Pudes, Linus, Klaudia, hintang kokon dulun porocaya co pokatu tontoke indammu.

²² Akuh bodoa ina Tuhan somim mu, Timotius. Oluboh Tuhan mihi aang co pio hinut indan kokom me.