2 Timotius 1 - Alkitab Porjanjian Baa Ponah Bohasa Dayak Siang

Paulus mihi tontoke indan Timotius 1:1-2

^1-2 Indan Timotius: co tuu-tuu tomangap kuh isan anak takuh leh. Surat ingkan akuh, Paulus. Mohotara nyoruhan ina akuh jarin rasul Yesus Kristus, Laca Co Tomonjanji Mohotara. Mohotara nyau ina akuh momborita tintun janji-Eh. Mohotara bojanji amun sika dulun porocaya ma Kristus Yesus, maka are angar haba kobolum co kuan tuu. Akuh bodoa ina Mohotara co Taman to hintang Kristus Yesus, Tuhan co bokuasa ma ito porahan kopioi-Eh, komasi hejeng-Eh, hintang mihi kongolandah kongolami indam mu.

Paulus mihi somangat indan Timotius 1:3-18

³ Akuh bosukur hia Mohotara co tomolayani kuh ma atoi co bujur harus. Onon sama isan co tongompian tatu hiangkuh. Akuh horoholuh bodoa indam mu hondo homalom.

⁴ Akuh mingkat korinah jorung iko batuh. Jadi, akuh korinah bolingu sopopak ma iko kole ina atoi kuh jorih jerah.

⁵ Akuh mahi mingkat bahawa iko kuan tuu jarin porocaya ma Yesus samah isan ajuhmu Lois hintang tinammu Eunike. Iroh ruo jarin porocaya houn ma iko. Akuh yakin bahawa iko kuan tuu porocaya ka.

⁶ Poko tului iyoh, akuh pokingat iko ina sasar bosomangat hapo komampuan husus co ihin Mohotara indan mu. Komampuan cioh tomihi Mohotara kotika aku mandak silung kuh tungkui iko.

⁷ Sabab, Mohotara mihi Roh-Eh indan to aroko nompi ito jarin ponakut. Are mihi Roh-Eh indan to sasar borohon, lian mongasihi, hintang sanggup noro arop.

⁸ Jadi, arohboh mohaan momborita tintun Tuhan to. Aroh mohaan awi akuh tomokuntam ponah seper. Akuh tomokuntam ponah seper awi akuh bogawi indai-Eh. Tapi, ma kokuatan ingkan Mohotara, umba bat mondorita demi Tarung Pio cioh.

⁹ Mohotara ocop nyolamat ito hintang Are mili ito ika bolum husus indai-Eh. Are umpi aang cioh aroko tului ito umpi aranaang co pio, tapi awi roncana Eh hintang kopioi-Eh. Kopio cioh tomihi-Eh ma ito molalui Kristus Yesus sorinai dunia tomoncipta.

¹⁰ Makitu, Mohotara porahan asi-Eh yoh hia ito ma korombut Kristus Yesus, Ponyolamat to. Molalui Tarung Pio yoh, Yesus ocop pokalah tukui ika kuasan maut hintang mihi ito kobolum sumong kotahi.

¹¹ Ika momborita Tarung Pio ciohboh Mohotara mangkat akuh ika jarin Rasul hintang guru.

¹² Iyohboh tului eh akuh mongalami uras pondoritaan tatuh. Akuh aroh mohaan awi akuh ocop nyono Yesus. Akuh porocaya ma Are. Akuh ocop monggawi otuh indai-Eh. Akuh yakin Are angar monjaga ina polayanankuh aroh mohampa. Are angar monjaga polayanankuh dapot ondo cioh co Are hopuli hia dunia tuh dai.

¹³ Iko ocop ngoneh ajaran ingkan akuh. Ajaran cioh iyohco patokan ingkan kawan ajaran co buah. Umba eh boh ajaran cioh kawun horoholuh porocaya ma Yesus hintang horoholuh mongasihi dongam nyan ponah Kristus Yesus.

¹⁴ Iko ocop tomorocaya kawan aang pio. Molohara kawan aang taiyoh ma pondohop Roh Mohotara co oko nyan ponah ito.

¹⁵ Iko ocop monau bahawa orong dulun co porocaya nyan propinsi Asia ocop matot hubungai ma akuh, tomasuk Pigelus hintang Hermogenes.

^16-18 Tapi Onesiporus aroh mohaan tului akuh tonahan ponah seper. Waktu are oko nyan kota Roma tuh, are bohimat bousaha ika nganyap akuh. Opah are popak akuh, are derek dombut mihi somangat indang kuh. Iko ocop monau are derek bogawi indan Mohotara nyan kota Epesus ka. Poko tului iyoh, akuh bodoa ina Tuhan porahan komasi hejeng ma are nyan ondo Tuhan mohakimi kokon dulun. Oluboh Tuhan porahan komasi hejeng ma kokon dulun co nukui ponah lopo Onesiporus.