Lista 9 - Udél Dwata: Gna Kesfasad ne Lomi Kesfasad

Yóm lobun nô ta yóm Gónô Dwata

^15-16 Bè yóm kdaw kdeng kehdà le du yóm Gónô Dwata, tódô wen lobun sut na a lemambung du. Yóm lobun yó ke kifu hol lómón ke ofi kton le du.

¹⁷ Ke bangen haway eta, lemwót yó kem tau Israél gotu lenkas le yóm kamfù le ne lolò le yóm kógów yóm lobun. Yó se gónón heglaan yóm lobun bè yó se bud gónó le kmamfù.

¹⁸ Lemwót bè klolò le yóm lobun yó kem tau Israél, yó se gónó le gel lemkas du yóm kamfù le ne bud lemwót bè yóm klolò le yóm lobun gónó le bud hemdà kamfù le. Ke tolo nô ta yóm Gónô Dwata yóm lobun, là se kô nili le du yóm gónó le kmamfù yó kem tau Israél.

¹⁹ Ke nahen na hegen ta yóm Gónô Dwata yóm lobun yó, là se kô nili kem tau Israél du yóm kamfù le, nimón le yóm hlolò Dwata kul.

²⁰ Wen se kdawen olon hilu kdaw nô ta yóm Gónô Dwata yóm lobun yó. Bè ktahuhen, tódô lolò le kógów yóm lobun. Ke kmamfù le duhen ke mógów le sal lemwót bè kimón le yóm hlolò Dwata kul.

²¹ Wen se kdawen olon suloyen nô ta yóm Gónô Dwata yóm lobun yó. Balù kemdaw ne duhen ke kifu ke haway eta yóm lobun tódô le bud lemwót se kul yó kem tau Israél. Ket khawayen eta, ket kewót le se kul.

²² Baluen ke tek lewu kdawen duhen ke sbulón duhen ke sfalayen, là kô le tagad mili yó kem tau Israél ke tolo nô ta yóm Gónô Dwata yóm lobun yó. Okóm ke deng haway eta tódô le bud lemwót se kul.

²³ Yóm gel kehdà le kamfù le ne yóm bud gel kekas le du, sal gel lemwót bè kimón le du yóm hlolò Dwata kul hlanen bè Musis.