Numero 20 - Ti Biblia (1973)

Ipapatay ni Miriam. Dagiti dandanum ti Meriba. Ti Edom sukirenna ti ilalasat ti Israel. Ni Aaron natay sadi Hor.

¹ Ket dagiti annac ti Israel, a dagup ti gimong simrecda iti let-ang ti Zin iti umuna a bulan; ket ti ili nagnaed iti Cades; ket ni Miriam natay idiay, ket naitabon idiay.

² Ket idiay awan danum a nagservi iti gimong; ket naguurnongda a nagtitipon iti maibusor cada Moises ken Aaron.

³ Ket ti ili nakisubangda ken Moises, a kinunada, Dicami coma ket natay idi natay dagiti cacabsatmi iti sango ni Jehova!

⁴ Ket apayapay nga inyegyo ti gimong ni Jehova iti daytoy a let-ang tapno mataycami agraman dagiti an-animalmi?

⁵ Ket isu ti gapuna aya a pinasangat-dacami nga impanaw iti Egipto saan a lugar ti bin-i, wenno ti higos, wenno ti uvas, wenno ti granada; wenno ti danum nga inumen ti adda la coma ditoy.

⁶ Ket ni Moises ken ni Aaron pimmanawda iti sango ti gimong a napan iti ruangan ti tolda ti gimong, ket nagpaclebda: ket ti dayag ni Jehova nagparang cadacuada,

⁷ Ket ni Jehova nakisao ken Moises, a kinunana,

⁸ Alaenyo ti sarucod ket tiptiponenyo ti gimong, sica ken ni Aaron a cabsatmo, ket saoenyo iti bato iti sango dagiti matmatada, nga itedna coma ti danumna, ket sica ipanmonto cadacuada ti danum nga aggapu iti bato; iti casta itedmonto ti inumen ti gimong ken dagiti an-animalda.

⁹ Ket ni Moises innalana nga ingapu iti sango ni Jehova ti sarucod cas imbilinna kencuana.

¹⁰ Ket da Moises ken Aaron inummongda ti gimong a tiniptipon iti sangoanan ti bato, ket kinunada cadacuada, Denggenyo ita, dacayo a nasungit; yegandacayto ti danum nga aggapu iti daytoy a bato?

¹¹ Ket ni Moises inngatona ti imana, ket pinangorna ti bato idi sarucodna, iti namindua: ket ti danum rimmuar iti nagluplupias, ket ti gimong imminumda, casta met dagiti an-animalda.

¹² Ket ni Jehova kinunana cada Moises ken Aaron, Gapu ta dicayo namati caniac, tapno santificarendac cadagiti matmata dagiti annac ti Israel, isu ti gapuna dicayto ipan daytoy a gimong iti daga nga intedco cadacuada.

¹³ Dagitoy isuda dagiti dandanum ti Meriba; gapu ta dagiti annac ti Israel nakisubangda ken Jehova, ket isu nasantificar idi cadacuada.

¹⁴ Ket ni Moises namalubos nanipud Cades cadagiti nabaon a napan iti ari ti Edom, Castoy ti sao ni cabsatmo nga Israel, Sica ammom amin ti rigat a napasamacmi:

¹⁵ No casano ti isasalog dagiti ammami iti Egipto, ken panagnaedmi sadi Egipto iti nabaybayag nga aldaw; ket dagiti taga Egipto dakes ti inaramidda cadacami, ken cadagiti ammami:

¹⁶ Ket idi immawagcami ken Jehova, dinengngegna ti timecmi; ket imbaonna ti maysa nga angel, ket inaonnacami sadi Egipto: ket, adtoy, addacami iti Cades maysa nga ili a pungto ti beddengmo:

¹⁷ Dawatec kenca palasatennacami coma, iti dagam; dicamto lasaten ti talon wenno inuvasan, dicamto uminum iti danum dagiti bobbobon: magnacamto nga agcanayon iti napatac a dalan ti ari, dicamto sumiasi ti bangir a macanawan wenno macatigid, inggana iti macalasatcami iti beddengmo.

¹⁸ Ket ti Edom kinunana kencuana, Sica dicanto lumasat caniac, di la ket ta rumuarac a sicacampilan a bumusor kenca.

¹⁹ Ket dagiti annac ti Israel kinunada kencuana, Sumang-atcamto iti dalan a napatac; ket no uminumcamto iti danummo, siac ken dagiti animalco, itedconto kenca ti pategna: isuna la nga ipalubosmo caniac, nga awan ket a lumasat dagiti sacac ti aniaman.

²⁰ Ket isu kinunana, Sica dicanto lumasat, Ket ti Edom rimmuar a bimmusor kencuana agraman adu a tattao, ken maysa a napigsa nga ima.

²¹ Castoy ti pinagmadi ti Edom iti panangtedna iti Israel iti pagdalanan iti beddengna: gapuna a ti Israel immadayo kencuana.

²² Ket nagrubbuatda sadi Cades: ket dagiti annac ti Israel, a dagup ti gimong, dimmanonda iti bantya Hor.

²³ Ket ni Jehova nagsao cada Moises ken Aaron idiay bantay Hor, nga igid ti beddeng ti daga nga Edom, a kinunana,

²⁴ Ni Aaron maitiponto iti ilina: ta isu saanto a sumrec iti daga nga intedco cadagiti annac ti Israel, gapu ta sinupringyo ti saoc idiay dandanum ti Meriba.

²⁵ Alaem ni Aaron ken ni Eleazar nga anacna a lalaki, ket yulim ida iti bantay Hor;

²⁶ Ket ucsubam ni Aaron cadagiti cawesna, ket icapetmo ida ken Eleazar nga anacna: ket ni Aaron maitiponto iti ilina, ket matayto idiay.

²⁷ Ket ni Moises inaramidna ti cas imbilin ni Jehova: ket simmang-atda iti bantay Hor iti imatang ti amin a gimong.

²⁸ Ket ni Moises inucsubanna ni Aaron cadagiti cawesna, ket incapetna ida ken Eleazar nga anacna: ket ni Aaron natay idiay tapaw ti bantay: ket ni Moises ken Eleazar simmalogda iti bantay.

²⁹ Ket idi nakita ti dagup ti gimong a natay ni Aaron, sinangitanda ni Aaron cadagiti tallopulo nga aldaw, dagup iti amin a balay ti Israel.