Levitico 3 - Ti Biblia (1973)

Ti linteg cadagiti datdaton iti cappia.

¹ Ket no ti idatonna maysa a sacrificio dagiti datdaton iti cappia; no mangidaton cadagiti vacvaca, uray calakian, uray cabayan, ti awan pilawna ti idatonnanto iti saclang ni Jehova.

² Ket pataynanto ti imana iti rabaw ti olo ti idatonna, ket patayennanto iti ruangan ti tolda ti gimong: ket dagiti papadi nga annac ni Aaron iwarisdanto ti dara iti lawlaw ti rabaw ti altar.

³ Ket idatagnanto a daton cadagiti datdaton iti cappia ti maysa a daton a maaramid iti apuy ken Jehova; ti taba a mangcumot cadagiti lalaem, ken amin a taba nga adda cadagiti lalaem,

⁴ Ket dagiti dua a bekel ken ti taba iti lawlawda, nga adda iti abay dagiti lomo, ken ti culapot ti dalem, agraman dagiti beckel iccatennanto.

⁵ Ket dagiti annac a lallaki ni Aaron puurandanto iti rabaw ti altar iti ngatoen ti mapuuran a daton, nga adda iti rabaw ti naisungrod iti apuy: isu ti maysa a daton a maaramid iti apuy, a nabanglo a sayamusom ken Jehova.

⁶ Ket no ti idatonna a sacrificio dagiti datdaton iti cappia ken Jehova maysa cadagiti carcarnero; calakian wenno cabayan, nga awan pilawna ti pagdatonna.

⁷ No ipaayna a daton ti cordero, idatonnanto ngarud iti saclang ni Jehova;

⁸ Ket ipataynanto ti imana iti rabaw ti olo ti datonna, ket patayennanto iti sango ti tolda ti gimong: ket dagiti annac a lallaki ni Aaron iwarisdanto ti darana iti lawlaw ti rabaw ti altar.

⁹ Ket ipaaynanto iti sacrificio dagiti datdaton iti cappia ti maysa a daton a maaramid iti apuy ken Jehova; ti tabana, ti nalucmeg nga ipus a sibubukel iccatennanto iti yan ti duri; ket ti taba a mamungon cadagiti lalaem, ken amin a taba nga adda cadagiti lalaem,

¹⁰ Ket dagiti dua a beckel, ken ti taba nga adda cadacuada a nayapiring cadagiti lomo, ken ti culapot ti dalem, agraman dagiti beckel iccatennanto.

¹¹ Ket ti padi puurannanto iti rabaw ti altar: isu ti taraon ti daton a maaramid iti apuy ken Jehova.

¹² Ket no ti idatonna maysa a calding, idatonnanto ngarud iti saclang ni Jehova:

¹³ Ket ipataynanto ti imana iti rabaw ti olona, ket patayennanto iti sango ti tolda ti gimong; ket dagiti annac a lallaki ni Aaron iwarisdanto ti darana iti rabaw ti altar nga aglawlaw.

¹⁴ Ket mangipaayto iti daydiay ti datonna, nga maysa a daton a maaramid iti apuy ken Jehova; ti taba a mangcumot iti lalaem, ken amin a taba cadagiti lalaem,

¹⁵ Ket dagiti dua a beckel, ken ti taba nga adda cadacuada a nayapiring cadagiti lomo, ken ti culapot, agraman dagiti beckel iccatennanto.

¹⁶ Ket ti padi puurannanto ida iti rabaw ti altar: isu ti taraon ti daton a maaramid iti apuy, a nabanglo a sayamusom; dagup ti taba biang ni Jehova.

¹⁷ Daytoy ti agnanayonto nga alagaden agpapan putputotyo iti isu-amin a pagnaedanyo, isu a dicayto canen ti taba ken dara.