Levitico 22 - Ti Biblia (1973)

Ti linteg ti kinadalus dagiti papadi. Dagiti an-animal a mabalin a maidaton.

¹ Ket ni Jehova nakisao ken Moises, a kinunana,

² Ibagam ken Aaron ken cadagiti annacna a lallaki nga agparbengda cadagiti nasantoan a banbanag cadagiti annac ti Israel, nga ipaayda a santo caniac, ket dida rugitan ti nasantoan a naganco: siac ni Jehova.

³ Ibagam cadacuada, Siasinoman a lalaki cadagiti amin a putotyo, bayat cadagiti caputotanyo, nga umasideg cadagiti nasantoan a banbanag a pasantoen dagiti annac ti Israel ken Jehova, idinto nga addaan ti rugitna, dayta nga tao maipusayto iti saclangco: siac ni Jehova.

⁴ Uray siasino a lalaki nga agcucutel iti putot ni Aaron, wenno agtotot, dinto mangan cadagiti nasantoan inggana ti di nadalus. Ket ti macasagid iti uray ania a narugit gapu iti natay, wenno ti lalaki nga adda agwayaway a tubbog a semilla kencuana;

⁵ Wenno siasino a macasagid iti uray ania nga agay-ayam nga isu ti pacarugitanna, wenno maysa a tao a pacarugitanna coma iti uray ania a rugit nga adda kencuana;

⁶ Ti tao a macasagid iti uray ania a cacasdiay, narugitto agingga iti rumabii, ket dinto mangan cadagiti nasantoan, malacsid no digosenna ti bagina iti danum.

⁷ Ket no limnec ti init, nadalusto; ket iti calpasanna manganto cadagiti nasantoan, gapu ta dayta ti canenna.

⁸ Ti natay latta wenno rinangcay ti animal a narungsot, saannanto a canen a pangmulit iti bagina: siac ni Jehova.

⁹ Iti casta salimetmetandanto ti ibilinco di la ket ta pacaalaanda iti basol, ken pacatayanda, no dida raeman a cas sagrado: siac ni Jehova a mamagsanto cadacuada.

¹⁰ Awanto ti gangannaet a mangan iti nasantoan a banag: ti maysa a sangaili ti padi, wenno ti maysa a mangmangged dida rebbeng ti mangan iti nasantoan.

¹¹ Ngem no ti padi gumatang iti maysa a tao, ti nagatang iti piracna, daytoy manganto cadagidiay: ket dagiti nayanac iti balayna, isuda mangandanto iti tinapayna.

¹² Ket no ti anac a babai ti padi makiasawa iti maysa a gangannaet, dayta dinto mangan iti maitayag a daton cadagiti nasantoan.

¹³ Ngem no ti anac a babai ti padi balo, wenno nakisina iti asawana, ket awan ti anacna, ket nagsublin iti balay ni amana, cas idi kinaubingna, manganto iti tinapay ni amana: ngem ti gangannaet dinto mangan iti dayta.

¹⁴ Ket no ti maysa a lalaki macapangan a dina ginagara iti nasantoan, inayonnanto ti apagcalima iti daydiay, sananto ited iti padi ti nasantoan a banag.

¹⁵ Ket didanto mulitan dagiti nasantoan a banbanag dagiti annac ti Israel nga idatonda ken Jehova,

¹⁶ Ket iti casta pacaigapuananda a mangawit iti kinadakes, a pagbiddutan, no canenda dagiti nasantoan a banbanagda: ta siac ni Jehova a mamagsanto cadacuada.

¹⁷ Ket ni Jehova, nakisao ken Moises, a kinunana,

¹⁸ Ibagam ken Aaron, ken cadagiti annacna a lallaki, ken amin nga annac ti Israel, ket saoem cadacuada, Siasinoman a tao iti balay ti Israel, wenno cadagiti gangannaet a makipagtaeng iti Israel a mangidatag iti datonna, nga uray maipuon cadagiti aniaman a carida, wenno aniaman cadagiti datdaton ti sibubulos a nakemda nga ipaayda a daton a mapuuran ken Jehova.

¹⁹ Tapno maannugutancayo, idatonyo ti maysa a lalaki nga animal nga awan pilawna, cadagiti vacvaca, cadagiti carcarnero, wenno cadagiti calcalding.

²⁰ Ngem uray ania nga adda pacapilawanna, dayta dicayto idaton, gapu ta saanto a maipateg a maipaay cadacayo.

²¹ Ket siasino man a mangirucbab iti maysa a sacrificio dagiti daton a cappia ken Jehova a pagtungpalna iti maysa a cari, wenno maipaay a daton ti sibubulos a nakem iti arban, wenno iti pangen masapul nga awan pagcuranganna tapno maawat; daytay awanto ti pacapilawanna.

²² Bulsec, wenno bullo, wenno pawad, wenno adda dogol-dogolna, wenno aggudgud, wenno aglatlat, dicayto idatag dagitoy ken Jehova, wenno aramiden a maysa a daton iti apuy iti rabaw ti altar ken Jehova.

²³ Uray vaca a lalaki, wenno cordero nga adda suroc wenno curang ti camcamengna, dayta mabalinmo nga ipaay a daton ti sibubulos a nakem; ngem no maipaay a cari, saanto a maawat.

²⁴ Ti nadunor dagiti, bukelbukelna, wenno napis-it, wenno nataltal, wenno nasugat, dicayto idaton ken Jehova; dicayto met aramiden ti casta iti dagayo.

²⁵ Uray aggapu iti ima ti gangannaet dicay met idaton ti tinapay ti Diosmo iti uray ania cadagitoy; ta ti kinadakesda adda cadacuada, ti pacapilawan adda cadacuada: saandanto a maawat a maipaay cadacayo.

²⁶ Ket ni Jehova nakisao ken Moises, a kinunana,

²⁷ No maysa a lalaki a vaca, wenno carnero wenno calding ti mayanac, pito nga al-aldaw nga addanto iti babaen ti inana; ket manipud iti maicawalo nga aldaw, ken iti sumaruno maawatto a sacrificio ti daton a maaramid iti apuy ken Jehova.

²⁸ Ket babai man a vaca, wenno carnero dicayto paggiddanen a patayen agraman urbonna iti maymaysa nga aldaw.

²⁹ Ket no ipaayyo ti maysa a sacrificio a pagyaman ken Jehova, idatonyonto ti pacaannugutanyo.

³⁰ Iti dayta met la nga aldaw macanto; awanto ti tiddaenyo iti daydiay agingga iti bigat: siac ni Jehova.

³¹ Iti casta salimetmetanyonto dagiti bilbilinco, ket tungpalenyonto ida: siac ni Jehova.

³² Ket dicayto met rugitan ti santo a naganco; ngem siac mapagsantoacto cadagiti annac ti Israel: siac ni Jehova a mamagsanto cadacayo,

³³ A nangaon cadacayo iti daga nga Egipto tapno siac ti Diosyo: siac ni Jehova.