Levitico 15 - Ti Biblia (1973)

Dagiti kinarugit ken ti pannacadalusda.

¹ Ket ni Jehova nakisao ken Moises ken ni Aaron, a kinunana,

² Ibagam cadagiti annac ti Israel, ket saoem cadacuada, No adda lalaki nga agtotot ti lasagna, isu narugit gapu iti panagtototna.

³ Ket daytoyto ti kinarugitna iti panagtototna: uray maicuyog ti lasagna iti panagtototna, wenno di maicuyog ti lasagna iti panagtototna, daytoy ti pagrugitanna.

⁴ Amin a nagiddaan ni agtotot narugitto; ken amin a nagtugawanna, narugitto.

⁵ Ket siasinoman a macasagid iti iddana, labaannanto dagiti pagpagan-anayna, ket agdigosto iti danum, ket narugit inggana iti rumabii.

⁶ Ket ti macatugaw iti uray ania a nagtugawan ni agtotot, labaannanto dagiti pagan-anayna, ket agdigosto iti danum, ket narugitto inggana iti rumabii.

⁷ Ket ti macasagid ti lasag ni agtotot labaannanto dagiti cawesna, ket digosennanto ti bagina iti danum, ket narugitto inggana iti rumabii.

⁸ Ket no ti addaan iti totot matupraanna ni nadalus, daytoy ngarud labaannanto dagiti cawesna, ket digosennanto ti bagina iti danum, ket narugitto inggana iti rumabii.

⁹ Ket uray ania a pagsilla a pagsacayan ni agtottotot narugitto.

¹⁰ Ket siasinoman a macasagid iti nagsaadanna, narugitto agingga iti rumabii: ket ti mangala cadagidiay, labaannanto dagiti pagpagan-anayna, ket agdigosto iti danum, ket saanto a nadalus agingga iti rumabii.

¹¹ Ket siasinoman a masagid ni addaan totot a dina nabuggoan dagiti imimana iti danum, labaannanto dagiti pagan-anayna, ket agdigosto iti danum, ket narugitto agingga iti rumabii.

¹² Ket ti damili a maiggaman ni agtotot iburacto: ket amin a latoc maboggoanto iti danum.

¹³ Ket no ni addaan totot nadalusan iti tototna, bilangennanto dagiti pito nga aldaw manipud panagdaldalusna, ket labaannanto ti pagan-anayna; ket digosennanto ti bagina iti agayayus a danum, ket nadalusto.

¹⁴ Ket iti maicawalo nga aldaw alaennanto a maipaay kencuana ti dua a pagaw wenno dua nga urbon ti calapati, ket umayto iti saclang ni Jehova iti ruangan ti tolda ti gimong, ket itednanto ida iti padi:

¹⁵ Ket ti padi idatonnanto ida, ti maysa maipaay a daton gapu iti basol, ket ti caduana maipaay a daton a mapuuran; ket ti padi aramidennanto ti pannacaabbongna iti saclang ni Jehova a gapu iti panagtototna.

¹⁶ Ket no agwayaway iti siasinoman a lalaki ti tubbog a semilla digosennanto ngarud amin a lasagna iti danum, ket narugitto inggana ti rumabii.

¹⁷ Ket tunggal pagan-anay, ken amin a lalat a naiccan ti tubbog malabaandanto iti danum, ket narugitdanto agingga iti rumabii.

¹⁸ Casta met ti babai a makiabigto ti lalaki, nga agruruar iti semillana, agpadpadadanto a mangdigos cadagiti bagida iti danum, ket narugitdanto agingga iti rumabii.

¹⁹ Ket no iti maysa a babai ta adda agwayaway kencuana, ket ti agwayaway iti lasagna dara, isu saanto a nadalus bayat pito nga al-aldaw: ket siasinoman a sumagid kencuana narugitto agingga iti rumabii.

²⁰ Ket aniaman a pagiddaanna bayat ti kinarugitna narugitto: casta met nga uray ania a matugawanna narugitto.

²¹ Ket siasinoman a macasagid iti iddana labaannanto dagiti pagpagan-anayna, ket digosennanto ti bagina iti danum, ket narugitto agingga iti rumabii.

²² Ket siasinoman a macasagid iti matugawanna labaannanto dagiti pagan-anayna, ket digosennanto ti bagina iti danum, ket narugitto agingga iti rumabii.

²³ Ket no adda macasagid cadagiti adda iti pagiddaan, wenno uray ania a matugawanna, isu narugitto inggana iti rumabii.

²⁴ Ket no ti siasinoman a lalaki a makicaidda kencuana, ket maiccan, iti rugitna, dayta narugitto bayat pito nga aldaw; ket aminto a pagiddaanna narugitto.

²⁵ Ket no ti maysa a babai agbulos ti darana cadagiti adu nga aldaw, a saan a iti tiempo ti panagsangailina, wenno adda kencuana ti panagbulos a nabaybayag ngem iti panagsangailina; amin nga aldaw a panagbulus ti kinarugitna maibilangto nga adda cadagiti aldaw a panagsangailina: isu saan a nadalus.

²⁶ Amin a pagiddaanna iti dagup ti aldaw ti panagbulosna, maibilangto kencuana a cas la pagiddaanna iti panagsangailina: ket ti amin a matugawanna narugitto a cas ti kinarugit ti panagsangailina.

²⁷ Ket siasinoman a macasagid cadagidiay narugitto, ket labaannanto dagiti pagan-anayna, ket digosennanto ti bagina iti danum, ket narugitto agingga iti rumabii.

²⁸ Ngem no immimbagen iti panagbulosna, agbilang ngarud iti pito nga aldaw, ket no nalpas dayta nadaluston.

²⁹ Ket iti macawalo nga aldaw mangalanto iti dua a pagaw, wenno dua nga urbon ti calapati, ket ipannanto ida iti padi iti ruangan ti tolda ti gimong.

³⁰ Ket ti padi ipaaynanto ti maysa a daton gapu iti basol, ket ti caduana maipaay a daton a mapuuran: ket ti padi aramidennanto ti pannacaabbongna iti saclang ni Jehova gapu iti panagbulos ti kinarugitna.

³¹ Casta ti panangilasinyonto cadagiti annac ti Israel iti kinarugitda, tapno dida matay iti kinarugitda no mulitanda ti tabernaculoc nga adda iti tengngada.

³² Daytoy ti alagaden ti agtotot ken daydiay nga agwayaway kencuana ti tubbog a semillana, isu a nacarugitanna;

³³ Ken ti agsakit gapu iti panagsangailina, ken ti adda agtotot kencuana lalaki man wenno babai, ken ti makicaidda iti babai a saan a nadalus.