Josue 5 - Ti Biblia (1973)

Dagiti Cananeos mapakigtotda. Ti panangngilin iti pascua. Ti mana agsardeng. Ti sirmata ni Josue.

¹ Ket naaramid, nga idi dagiti amin nga ar-ari dagiti Amorreo, nga addada iti ballasiw wti Jordan iti laudenna, ken amin dagiti ar-ari dagiti Cananeos, nga adda iti igid ti baybay, nangngegda no casano ti panangpamaga ni Jehova cadagiti dandanum ti Jordan nanipud iti sangoanan dagiti annac ti Israel, inggana iti nacaballasiwcami, a dagiti puspusoda nagrunawda, ket awanen ti ingel cadacuada, a gapu cadagiti annac ti Israel.

² Iti daydi a tiempo ni Jehova kinunana ken ni Josue, Mangaramidca cadagiti im-imuco a pamulinawen ket cugitem manen a piduaen dagiti annac ti Israel.

³ Ket ni Josue nangaramid cadagiti im-muco a pamulinawen, ket kinugitna dagiti annac ti Israel idiay turod dagiti akinsango a cudil.

⁴ Ket daytoy ti gapuna a ni Josue nangcugit idi: isu-amin a tattao a rimmuar idiay Egipto, a lallaki, a dagiti amin a tattao met laeng ti gubat natayda iti let-ang iti dalan, iti calpasan ti iruruarda idiay Egipto.

⁵ Ta isu-amin a tattao a rimmuar idiay Egipto nacugitda; ngem isu-amin a tattao a nayanac iti let-ang iti dalan idi naggapuda idiay Egipto, saanda a nagcugit.

⁶ Ta dagiti annac ti Israel nagnada bayat iti uppat a pulo a tawen idiay let-ang, agingga iti amin a nacion, a cadagiti tattao met laeng ti gubat a rimmuar idiay Egipto, naibusda, agsipud ta dida impangag ti timec ni Jehova; isuda a nangisapataan ni Jehova a dina palubosan ida a cumita iti daga isu a ni Jehova isapatana cadagiti ammada nga itedna coma cadacami, maysa a daga a pagayusan ti gatas ken diro.

⁷ Ket dagiti annacda, isuda a binangonna iti saadda, ni Josue kinugitna ida: ta saanda a nacugit, agsipud ta dida kinugit ida iti dalan.

⁸ Ket naaramid, nga idi nalpasda a kinugit amin ti nacion, a nagyanda cadagiti disdissoda idiay pacarso, aginggana naimbaganda.

⁹ Ket ni Jehova kinunana ken Josue, Ita nga aldaw inlisic cadacayo ti pannacababalaw ti Egipto. Gapuna a ti nagan daydiay a lugar nainaganan Gilgal, inggana ita nga aldaw.

¹⁰ Ket dagiti annac ti Israel nagpacarsoda idiay Gilgal; ket nagpascuada idi maicasangapulo ket uppat nga aldaw ti bulan iti rumabii cadagiti tantanap ti Jerico.

¹¹ Ket nanganda iti apit ti daga iti bigat iti calpasan ti pascua, cadagiti bibingca nga di-nalivaduraan ken bucbukel a kinirog, iti daydi met la nga aldaw.

¹² Ket ti mana nagsardeng iti bigat, idi calpasan ti pannanganda iti apit ti daga; dagiti annac ti Israel awanen ti manada uray caano; no di ket nanganda iti bunga ti daga ti Canaan iti daydi a tawen.

¹³ Ket naaramid, nga idi a ni Josue adda iti denna ti Jerico, nga intangadna dagiti matana ket kimmita, ket adtoy, ti maysa a lalaki a nagtacder iti sangona a siaasut ti campilanna idi imana: ket ni Josue immasideg kencuana, ket kinunana kencuana, Sica cumapponca cadacami? wenno sica cumabusorca cadacami?

¹⁴ Ket isu kinunana, Saan; ngem siac cas principe ti buyot ni Jehova nga umayac ita. Ket ni Josue nagpacleb iti daga, ket nagdaydayaw, ket kinunana kencuana, Ania ti cuna ni Apoc iti adipenna?

¹⁵ Ket ti principe ti buyot ni Jehova kinunana ken Josue, Iccatem ta zapatosmo ita sacam; ta iti disso a nagtacderam isu ti nasantoan. Ket ni Josue tinungpalna a casta.