Isaias 3 - Ti Biblia (1973)

Ti pannacaidarum dagiti agtuturay ti Juda ken dagiti babbai a nagaramugam.

¹ Ta, adtoy ti Apo, a ni Jehova dagiti buybuyot, iccatenna iti Jerusalem ken iti Juda ti mangpakired, ken ti sarikedked, ti isu-amin a mangpakired a tinapay ken danum;

² Ti maingel a tao, ken ti tao ti gubat; ti ocom, ken ti mammadto, ken ti mammadles, ken ti panglacayen;

³ Ti capitan ti limapulo, ken ti natacneng a tao, ken ti consejero, ken ti nalaing nga agaramid, ken ti nalaing a baglan.

⁴ Ket mangtedacto cadagiti annac tapno isuda dagiti panguloenda, ket dagiti maladaga iturayandanto ida.

⁵ Ket dagiti umili maparigatdanto, tunggal maysa a gapu iti sabali, ken tunggal maysa a gapu iti carrubana: ti ubing tumacderto a sitatangsit unay a bumusor iti lacay, ken t itimmawa a bumusor iti natacneng.

⁶ Intono ti maysa a tao tengngelennanto ti cabsatna iti balay ni amana, a cunaenna, Sica adda pagan-anaymo, sica coma ti agturay cadacami, ket daytoy a pannacarba agsaad coma iti babaen ti imam;

⁷ Iti dayta nga aldaw ingatonanto ti timecna, a cunaenna, Saanacto a mangagas; ta iti balayco awan ti tinapay ken uray pagan-anay: didacto isaad nga agturay cadagiti umili.

⁸ Ta ti Jerusalem narba, ket ti Juda narugpo; agsipud ta ti dilada ken dagiti ar-aramidda bumusorda ken Jehova, a panggargarida cadagiti mata ti dayagna.

⁹ Ti panagparang dagiti rupada panecnecanna ti maibusor cadacuada; ket ipalawagda ti basolda a cas iti Sodoma, dida ilimed. Asipay ti cararuada! ta nagaramidda ti dakes cadacuada met laeng.

¹⁰ Agsaocayo maipapan iti nalinteg, a naimbagto kencuana; ta canendanto ti bunga dagiti ar-aramidda.

¹¹ Asi pay ti managdacdakes! nasanaangto kencuana; ta ti inaramid dagiti im-imana maaramidto kencuana.

¹² Iti maipapan iti ilic, ububbing ti mamarigat cadacuada, ken dagiti babbai ti mangituray cadacuada. O ilic, dagidi mangiturturong kenca pagbiddutendaca, ken dadaelenda ti turong dagiti dandanam.

¹³ Ni Jehova sitatacder a sumupring, ken sitatacder a mangocom cadagiti inilin-ili:

¹⁴ Ni Jehova sumrecto iti panangocom cadagiti lallacay dagiti tattaona ken cadagiti panguloenda: Dacayo dagiti nangalun-un iti cauvasan; ti nasamsam cadagiti napanglaw adda cadagiti balbalayyo:

¹⁵ Ania ti panggepyo dacayo a ladditenyo ti ilic, ken lebbekenyo ti rupa dagiti napanglaw? cuna ti Apo, a ni Jehova dagiti buybuyot.

¹⁶ Casta met a ni Jehova cunana, Agsipud ta dagiti annac a babbai ti Sion napalangguadda, ken magnada a sitatangar dagiti tengngedda ken mata a nagaramugam, ken magnada ken agkinnikinnida no mapanda, ken agaramidda iti killingkilling cadagiti sacsacada;

¹⁷ Gapuna a ti Apo paggaddilennanto ti toctoc ti olo dagiti annac a babai ti Sion, ket ni Jehova iparangnanto dagiti nalimed a camengda.

¹⁸ Iti dayta nga aldaw ti Apo iccatennanto ti kinaimnas dagiti ar-arcos dagiti sacsacada, ken dagiti iniket nga oclop, ken dagiti sinan-bulbulan;

¹⁹ Dagiti pendientes, ken dagiti pulceras ken dagiti ababungot ti rupa;

²⁰ Dagiti dalungdong, ken dagiti calangcang a maipaay cadagiti pungopungoan ti saca, ken dagiti barikes, ken dagiti cajita ti bangbanglo, ken dagiti an-anib:

²¹ Dagiti singsing, ken dagiti aritos ti agong;

²² Dagiti pagan-anay a pakirambac, ken dagiti cagay, ken dagiti panolon, dagiti supot;

²³ Dagiti espejo, ken dagiti nalapat a lienzo, ken dagiti turbante, ken dagiti abungot.

²⁴ Ket maaramidto, a dagiti nabanglo a sabsabong agbalinto a kinabuyoc; ket iti saad ti barikes maisucatto ti tali; ket iti saad ti naornos a buoc, panagcalvonto; ket iti saad ti lambon, pagbarikes a lupot a nakersang; ket iti saad ti kinaimnas biritbiritto.

²⁵ Dagiti lallakim mapasagdanto iti campilan, ket ti maingelmo mapasagto iti paggugubatan.

²⁶ Ket ti ruanganna agladingitto ken agpanes; ket isu mapanawanto ken agtugawto iti daga.