SAN MATEO 3 - Tatuyo: Dio Wadarique

Juan predica en el desierto

¹ Ti rʉmʉrina Jesú Nasarépʉ cʉ̃ ca-anitoye Juan bautisari majocʉ Judea yepapʉ camaja mani paʉpʉ Dio ye quetire ca-buionucuñupʉ cʉ̃ tʉpʉ ca-ejarãre.

² Topʉ ãcʉ̃ oco bairo Dio ye quetire ca-buionucuñupʉ Juan: —Mʉjaa caroorije mʉja cá-átiere seeto tʉgooñarique pairi, Dio yucʉacana ati yepapʉ ca-rotipaʉ majuure joogʉmi ĩirã mʉja yeri wajoaya.

³ Juan ca-añupʉ, “Apeĩ anigʉmi,” Isaía ãnacʉ Dio ye quetire buiori majocʉ cʉ̃ ca-ĩricʉ. Oco bairo ca-ĩi ucayupi Isaía ãnacʉ Juan cʉ̃ ca-baipere: Jicãʉ camaja na ca-manopʉ awajari oco bairo ĩi buiogʉmi cʉ̃ tʉpʉ ca-ejarãre: “Caroaro quenoo yuuya mʉja yerire, cariape tʉgooñari mani Ʉpaʉ cʉ̃ cá-atíparo jʉgoye. Caroa macare ája,” ĩi buiogʉmi, ca-ĩi ucayupi Isaía tirʉmʉpʉ macacʉ.

⁴ Jutii ca-jañanucuñupʉ Juan cameyo na ca-ĩirã caballore bairã na poa mena juarica wʉre. Waibʉcʉ ajerona ca-wẽanucuñupʉ. To bairi ñimiare ca-ʉgaricarã cʉtinucuñupʉ. Nare ʉga, beroa oco quenare ca-etinucuñupʉ.

⁵ Dio Wadarique cʉ̃ ca-buiori paʉpʉ cʉ̃ tʉpʉ ca-ejayuparã Jerusalén maca macana, Judea yepa macana, Jordán na ca-ĩri ya tʉ macana quena.

⁶ Cʉ̃ tʉpʉ eja, “Caroorije cá-ácʉ yʉ ãa,” Diore ĩri Juan're, “Jã bautisaya,” cʉ̃ ca-ĩiñuparã, Jordán na ca-ĩri yapʉ.

⁷ Fariseo maja, saduceo maja mena cʉ̃ na ca-bautisa rotirã ejaro tʉjʉʉ oco bairo na ca-ĩiñupʉ Juan: “Caroorije pairã mʉja ãa. Yʉre mʉja bautisa rotirã ejabapa. Mʉja popiyeyegʉmi Dio mʉja ca-yeri wajoaquẽpata.

⁸ To bairi mʉjaare Dio cʉ̃ ca-popiyeyepere Diore netoo rotiri caroa macare ája mʉjaa. Caroare mʉja cá-áto tʉjʉʉ, ‘Na yeri wajoama,’ mʉja ĩi tʉjʉ majigʉmi Dio yua,” na ca-ĩiñupʉ Juan.

⁹ “Abraham pãramerãpʉ ca-ãna mani ãa. To bairi Dio yarã mani ãa,” ĩi tʉgooñaqueticõaña. Dio atie ʉ̃ta rupaarena áti jeeñoo majimi aperã Abraham pãramerãre nare cʉ̃ ca-boonemoata. Mʉja yeri ca-wajoape macare boomi Dio cʉ̃ yarã ca-aninemoparãre.

¹⁰ Caroa macare mʉja cá-átiquẽpata yucʉacã mʉja reegʉmi Dio. Yucʉ ca-rica maniire quetí joe rocaricarore bairona mʉja átigʉmi Dio.

¹¹ Mʉjaare yʉ bautisa oco mena, “Caroorije jã cá-átie jʉtiritiri jã yeri wajoagarã, mʉja ca-ĩiro. Yʉ bero anigʉmi yʉ netoro ca-ãcʉ̃. Cʉ̃ mena cawatoa ca-ãcʉ̃ majuu yʉ ãa yʉa. Cʉ̃ maca Dio Espíritu Santore mʉja joogʉmi mʉja yeripʉ caroorije mʉja cá-átiere majiriori.

¹² Caroorãre na beje reegʉmi, cʉ̃ yarã jetore na jeegʉ. Arusu caroorije ca-ajeri beje papu joe rericarore bairona caroorãre na reegʉmi. Caroare cũurica paʉpʉ cũuricarore bairona na átigʉmi cʉ̃ yarã jetore. Aperã macare peero ca-petiqueti peeropʉ na reegʉmi,” na ca-ĩi buioyupʉ Juan.

El bautismo de Jesús

¹³ To bairi Jesú Galilea na ca-ĩri yepa ca-ãnacʉ ca-ejayupʉ Jordán na ca-ĩri yapʉre. Ca-ejayupʉ Juan tʉpʉre, cʉ̃ bautisa rotii ejaʉ.

¹⁴ Nemoopʉre Juan cʉ̃ ca-bautisagaquetibajupʉ Jesúre. —¿Nope ĩi yʉ macare yʉ mʉ bautisa rotití? Mʉ maca yʉre ca-bautisapaʉ mʉ anibapa, Jesúre cʉ̃ ca-ĩiñupʉ.

¹⁵ To bairo cʉ̃ ca-ĩiro: —To bairona Dio cʉ̃ ca-boori wame nipetirije mani cá-átipe ãa. To bairi yʉ bautisaya, Juan're cʉ̃ ca-ĩiñupʉ Jesú. To bairo Jesú cʉ̃ ca-ĩiro Juan ca-bautisayupʉ Jesúre yua.

¹⁶ Cʉ̃re cʉ̃ ca-bautisa yaparoro Jesú riapʉ ca-ñujãricʉ ca-maa nʉcañupʉ. Cʉ̃ ca-maa nʉcari paʉna ʉmʉrecóo ca-pãañupe. Ca-pãaro Dio Espíritu Santo buare baii cʉ̃ bui cʉ̃ ca-rui ejaro ca-tʉjʉyupʉ Jesú.

¹⁷ To bairo ca-bairi paʉna Dio ʉmʉrecóopʉ oco bairo ca-ĩi wadayupʉ: —Ani yʉ Macʉ, yʉ ca-maii ãmi. Cʉ̃ mena yʉ wariñuu, ca-ĩi wadayupʉ Dio.