SAN MARCOS 1 - Tatuyo: Dio Wadarique

Juan el Bautista predica en el desierto

¹ Jesucristo Dio Macʉ ye queti caroa queti oco bairo ca-ani jʉgoyupa.

² Tirʉmʉpʉ macacʉ Dio ye queti buiori majocʉ Isaía ca-wamecʉcʉ oco bairo ca-ĩi uca jʉgoyeyeyupi Jesucristo ati yepapʉre cʉ̃ cá-atípere: Camajare na ca-netoo catíopaʉ majuu cʉ̃ jʉgoye yʉ joogʉ apeĩre yʉ ye quetire ca-buio jʉgoyeyepaʉre. Cʉ̃na anigʉmi camaja na yerire caroaro ca-tʉgooña quenoo yuu rotii.

³ Jicãʉ ca-yucʉ mani yepapʉre camaja manopʉ awaja tʉjʉnucu teñagʉmi. Oco bairo ĩi buiogʉmi cʉ̃ tʉpʉ ca-ejarãre: “Caroaro quenoo yuuya mʉja yerire, cariape tʉgooñari mani Ʉpaʉ cʉ̃ cá-atíparo jʉgoye. Caroa macare ája,” ca-ĩi uca jʉgoyeyeyupi Isaía, Juan cʉ̃ ca-baipere Dio cʉ̃re cʉ̃ ca-ĩi rotiriquere.

⁴ To bairi Juan ca-yucʉ mani yepapʉre ãcʉ̃ oco bairo na ca-ĩiñupʉ camajare: —Caroorije mʉja cá-átinucurijere jʉtiritiri mʉja yeri wajoaya. Coje rericarore bairo caroorije jã cá-átiere Dio cʉ̃ majirioato ĩirã bautisa rotiya, na ca-ĩiñupʉ Juan.

⁵ Capaarã ti yepapʉ Judeapʉ macana, Jerusalén macana quena capaarã camaja Juan cʉ̃ ca-buiorijere ca-apirã aájuparã. Caroorije na cá-átajere jʉtiriti, “Caroorije cá-ána jã ãa,” Diore na ca-ĩiro Jordán ca-wamecʉti yapʉ na ca-bautisayupʉ Juan.

⁶ Cʉ̃ jutiiro waibʉcʉrã cameyo ca-wamecʉna poa mena juarica wʉ ca-jañanucuñupʉ Juan. Cʉ̃ wẽarica wẽe waibʉcʉ ajero wẽe ca-añupe. To bairi diroare, ñimiare ʉga, beroa ocore ca-etinucuñupʉ Juan.

⁷ Camajare oco bairo na ca-ĩi buionucuñupʉ Juan: —Yʉ bero apeĩ yʉ netoro ca-ani majuʉ atígʉmi. Cʉ̃re bairo ca-baii mee yʉ ãa. Cawatoa macacʉ, paa coteri majocʉre bairona yʉ ãa.

⁸ Oco mena ca-bautisaʉ yʉ ãa yʉa. Cʉ̃ maca Espíritu Santore mʉja joogʉmi cʉ̃re ca-boorãre. Cʉ̃ Espíritu Santore joʉ, oco mena coje majuuricarore bairo mʉja átigʉmi, caroorije mʉja cá-átiere rei.

El bautismo de Jesús

⁹ Juan camajare cʉ̃ ca-bautisari rʉmʉrina Jesú quena Galilea yepa Nasaré macapʉ ca-ãnacʉ Jordán ca-wamecʉti ya Juan tʉpʉ ca-ejayupʉ Jesú. Topʉ cʉ̃ ca-ejaro cʉ̃ ca-bautisayupʉ Juan.

¹⁰ Cʉ̃ ca-bautisaro bero Jesú ca-maa nʉcañupʉ ti ya tʉjaro. Maanʉca, ʉmʉrecóo jope ca-pãaro ca-tʉjʉyupʉ Jesú. Cʉ̃ ca-tʉjʉro buare bairo bauʉ Espíritu Santo ca-rui ajupʉ Jesú bui.

¹¹ To bairo cʉ̃ ca-bairi paʉna ʉmʉrecóopʉ cʉ̃ Pacʉ cʉ̃ ca-wadarijere ca-apiyupʉ Jesú: —Yʉ Macʉ, yʉ ca-mai netoʉ majuu mʉ ãa. Seeto mʉ yʉ tʉjʉ wariñuu, cʉ̃ ca-ĩiñupʉ Dio Jesúre.

Tentación de Jesús

¹² Jesúre Juan cʉ̃ ca-bautisaricaro bero nemoona Espíritu Santo cʉ̃ ca-ne aájupʉ ca-yucʉ mani yepa, camaja manopʉ yua.

¹³ Jesú topʉre cuarenta rʉmʉri majuu ca-añupʉ. Waibʉcʉrã ca-uwarã watoapʉ ca-añupʉ. Topʉ Jesú cʉ̃ ca-ano Sataná maca ¿Diore cʉ̃ bai netoo nʉcabocʉtí? ĩi ricati wame caroori wamere cʉ̃ cá-áti rotibajupʉ. Jesúre Sataná to bairo cʉ̃ ca-ĩi wadajãrona Dio tʉ macana Ángel maja cʉ̃ ca-coterã ejayuparã Jesúre.

Jesús comienza su trabajo en Galilea

¹⁴ Cabero ʉpaʉ Herode Juan camajare bautisari majocʉre presopʉ cʉ̃ ca-jõoñupʉ. Juan presopʉ cʉ̃ ca-anitoye Jesú Galilea yepapʉ cá-aájupʉ tunu, Dio ye quetire buio teñaʉ aácʉ.

¹⁵ Oco bairo ca-ĩi buio teñañupʉ: —Meere, eja tʉgami mʉja tʉpʉre yoaro mʉja ca-yuuricʉ. Yucʉacana, meere Ʉpaʉ jãagʉmi. To bairi caroorije mʉja cá-átinucurijere jʉtiritiri mʉja ca-tʉgooñarijere wajoaya. Dio camajare na netoo catíogʉmi ĩriquere api nʉcʉbʉgoya, ca-ĩi buio teñañupʉ.

Jesús llama a cuatro pescadores

¹⁶ Cabero Jesú Galilea ca-wamecʉti ra ʉtabʉcʉrá tʉjaropʉ cá-aáteñañupʉ. Ti ra tʉjaro aáteñaʉ topʉ Simón, apeĩ cʉ̃ bai André na ca-bʉga ejayupʉ. Wai wajari maja ca-añuparã naa. To bairi Jesú na tʉpʉ cʉ̃ ca-ejari paʉna bapire ca-roca ñuañuparã ti raapʉre.

¹⁷ To bairo na cá-áto tʉjʉʉ: —Jitá yʉ mena, na ca-ĩiñupʉ Jesú. —Caroaro mʉja wai waja maji. Yucʉra yʉ mena aána camajare Dio ye quetire mʉja buio majigarã. To bairo mʉja ca-ĩi buiorijere apirã na quena Diore ca-apiʉjarã anigarãma, na ca-ĩiñupʉ Jesú.

¹⁸ To bairo cʉ̃ ca-ĩrijere apirã nemoona na bapi yucʉre piti cũu, Jesú mena cá-aácoajuparã.

¹⁹ Jesú petoacã aánemoʉ pʉgarãre na ca-bʉga ejayupʉ. Sebedeo punaare Jacobo, cʉ̃ bai Juan jãare na ca-bʉga ejayupʉ. Bapi yucʉ ca-wooriquere jia quenoorã cumuapʉ cá-áti jañañuparã.

²⁰ Na quenare na ca-piiyupʉ Jesú. To bairo na cʉ̃ ca-ĩi piiro apiri na pacʉ Sebedeore, cʉ̃ paari majare na cá-aáweoyuparã, Jesú mena aána yua.

Un hombre que tenía un espíritu malo

²¹ Cabero Capernaum ca-wamecʉti macapʉ ca-ejayupʉ Jesú cʉ̃ buerã mena. Sábado ca-ano judío maja na yerijãrica rʉmʉ ca-ano na ca-neñaponucuri wiipʉ ca-jãa ejayupʉ Jesú. Ti wiipʉ jãa ejaʉ ti wiipʉ ca-ãnare na ca-buio jʉgoyupʉ Dio ye quetire.

²² Jesú cʉ̃ ca-buiorijere apirã api wariñuubana quena ca-api acʉacoajuparã, caroaro ca-maji netoʉ ãmi ĩirã. Nare ca-buionucurãre bairo na ca-buioquẽjupʉ Jesú maca.

²³ Ti wii na ca-neñapori wiipʉ jicãʉ ca-wãti jãa ecooricʉ ca-añupʉ. Oco bairo ca-ĩi awajayupʉ:

²⁴ —¡Jesú, Nasaré macacʉ! ¡Jã patowãcooqueticõaña! ¿Jãare rei acʉ́ mʉ bairí? Mʉ yʉ tʉjʉ maji. Dio cʉ̃ ca-jooricʉna mʉ ãa mʉa, caroorije cá-átiquẽcʉ. Ca-ñuu netoʉ majuu mʉ ãa, cʉ̃ ca-ĩi awajayupʉ ca-wãti jãa ecooricʉ.

²⁵ To bairo cʉ̃ ca-ĩi awajaro apii, Jesú wãti camajocʉpʉre ca-jañaʉre cʉ̃ tutii oco bairo cʉ̃ ca-ĩiñupʉ: —¡Janacoacʉja! To cõona buti aácʉja, cʉ̃ ca-ĩiñupʉ Jesú.

²⁶ To bairo Jesú cʉ̃ ca-ĩirona wãti camajocʉpʉre ca-ãcʉ̃ cʉ̃ ca-yugui mecʉ riañaro cá-ájupʉ. To bairo cʉ̃ áti, seeto majuu ca-awajacoa buti aájupʉ yua.

²⁷ To bairo cʉ̃ ca-bairo tʉjʉrã ti wiipʉ ca-neñaporã ca-tʉjʉ acʉacoajuparã. Tʉjʉ acʉa, na majuuna ca-ame jeniñañuparã: —¿Ñee unie to ãtí ati wame cʉ̃ cawama buerije? Wãtia camajapʉre ca-jañarã quenare na buu reecõami. Na cʉ̃ ca-buti rotirona buticoapa, ca-ame ĩiñuparã.

²⁸ To bairi yoaro mee Jesú cʉ̃ ca-anie quetire Galilea yepa macana ca-queti api peticoajuparã.

Jesús sana a la suegra de Simón Pedro

²⁹ Jesú neñaporica wiipʉ butiri bero Simón, André jãa ya wiipʉre ca-ejayuparã Jacobo, Juan, Jesú jãa.

³⁰ Ti wiipʉre Simón mañico bʉgoye riao cá-ájupo. Jesúre, “Riao áamo,” cʉ̃ ca-ĩi buioyuparã.

³¹ Jesú to bairo na ca-ĩiro apii, cõ ca-tʉjʉ jãajupʉ. Jãa, cõ wamopʉ ñee, cõ ca-tʉ̃ga wamʉo nʉcoñupʉ. To bairo cʉ̃ cá-átona nemoo bʉgoye ca-janacoajupe. To bairi catí wamʉnʉca, nare ca-ʉgarique peobojayupo yua.

Jesús sana a muchos enfermos

³² Muipu cʉ̃ ca-roca jãaro bero canaiori paʉ bero ca-ano camaja nipetirã ca-riaye cʉnare, ca-wãtiacʉna quenare na ca-jee ejayuparã Jesú tʉpʉre.

³³ To bairi nipetirã ti maca macana jope tʉpʉ ca-neñapoyuparã.

³⁴ To bairo na ca-neñaporo tʉjʉʉ capaarã ca-riarãre na ca-riaye cʉtiere na ca-netoobojayupʉ Jesú. Ricati wameri jeto na ca-riaye cʉtiere na ca-catíoyupʉ. Ca-wãtia jañarã quenare na ca-netooñupʉ Jesú. Wãtiare na buu rei na ca-wada rotiquẽjupʉ, Dio Macʉ yʉ ca-aniere camajare na ĩiqueticõato ĩi.

Jesús predica en Galilea

³⁵ Ape rʉmʉ ca-bujuparo jʉgoye Jesú yupi, ti maca tʉjaro camaja manopʉ Diore ca-jenii aájupʉ.

³⁶ Cabero Simón, aperã cʉ̃ mena macana mena Jesúre ca-macara aájuparã.

³⁷ Cʉ̃re bʉga ejarã, oco bairo cʉ̃ ca-ĩiñuparã: —Camaja nipetirã mʉre macarã áama, cʉ̃ ca-ĩiñuparã.

³⁸ To bairo na ca-ĩiro: —Jitá apero ca-tʉacã ca-ani macaripʉ. Topʉ quenare yʉ ye quetire na yʉ buiogʉ. Tierena buio teñaʉ acʉ́ yʉ cá-apʉ́ ati yepapʉre, ca-ĩiñupʉ Jesú.

³⁹ To bairi Jesú nipetiro Galilea yepapʉ camaja na ca-neñaponucuri wiiripʉ na ca-buio teñanucuñupʉ. Ca-wãtia cʉnare na ca-reebojanucuñupʉ.

Jesús sana a un leproso

⁴⁰ Jesú Galileapʉ cʉ̃ ca-ano jicãʉ camajocʉ ca-rupaʉ ajeri boaʉ Jesú tʉpʉ ca-ejayupʉ. Cʉ̃ tʉ eja, rʉpopatua mena tuatu ejacumuri oco bairo cʉ̃ ca-ĩiñupʉ Jesúre: —Yʉ ca-rupaʉ ajero boarijere yʉ mʉ ca-netoogaata mʉ netoo maji.

⁴¹ Jesú cʉ̃ bopacoo tʉjʉʉ, cʉ̃ pañari oco bairo cʉ̃ ca-ĩiñupʉ: —Mʉre yʉ netoogʉ. To cõona mʉ ca-boarije mʉre yaticoagaro.

⁴² To bairo cʉ̃ ca-ĩirona cʉ̃ ca-boabataje nemoona ca-yati peticoajupe yua. Ca-rupaʉ boaquẽcʉ ca-añupʉ yua.

⁴³ Cabero Jesú, caroaro mena aácʉja ĩi, cariape cʉ̃ ca-ĩi buioyupʉ:

⁴⁴ —Aperãre mʉre yʉ ca-netoorijere na buioquẽja mai. Cariapena aácoacʉja Dio wii macacʉ sacerdote majocʉ tʉpʉ. Aá, mʉ ca-cami boariquere ca-yatirijere cʉ̃ iñooña. Cʉ̃ majuuna tʉjʉʉ, “Yati peticoajupa,” ĩigʉmi. To bairo mʉre cʉ̃ ca-ĩiro bero Diore mʉ ca-nʉcʉbʉgorijere iñoori waibʉcʉ mʉ ca-joe buje mʉgopaʉre cʉ̃ mʉ joogʉ sacerdote majocʉre, Moisé cʉ̃ ca-rotiricarore bairona. To bairo mʉ cá-áto camaja nipetirã majigarãma mʉ ca-cami yatirijere.

⁴⁵ To bairo Jesú cʉ̃ ca-ĩriquere átiquẽcʉna aá, nemoona camaja nipetirãre na ca-buio bate peocõañupʉ. To bairi Jesú camaja capaarã na ca-ani macaripʉre ca-eja majiquẽjupʉ yua. Ti macari tʉjaropʉna cá-aáteñañupʉ Jesú camaja capaarã na ca-manopʉ. Macaripʉ cʉ̃ ca-aniquetibato quena camaja capaarã nipetiro macana Jesúre cʉ̃ ca-tʉjʉrã ejanucuñuparã.