HEBREOS 1 - Tatuyo: Dio Wadarique

Dios ha hablado por medio de su Hijo

¹ Tirʉmʉpʉ capee mani jʉgoye macanare ca-queti joonucuñupi Dio. To canacãʉpʉrena ape wameri cʉ̃ ye quetire buiori majare na ca-majioñupi Dio camajare nare cʉ̃ ca-buio majiogari wamerire.

² Ato ca-baiepa rʉmʉripʉre ca-jooyupi Dio cʉ̃ Macʉrena, camajare na cʉ̃ buioato ĩi. Cʉ̃ Macʉ jʉgori ati ʉmʉrecóo nipetirore cá-ájupi Dio. To bairi nipetiro cʉ̃ cá-átajere ca-cʉgopaʉre cʉ̃ ca-cũuñupi Dio cʉ̃ Macʉre.

³ Dio ye cʉ̃ ca-aji baterijere ca-cʉgoʉ ãmi Dio Macʉ. Dio cʉ̃ ca-aniere bairona ca-ãcʉ̃ ãmi. To bairi Dio Macʉ cʉ̃ ca-rotiro ati ʉmʉrecóo ca-bairije bai, ca-tutuaʉ cʉ̃ ca-ano maca. Mani camaja caroorije mani cá-átiere wapayebojari tiere majirioboja, áti yaparo Dio tʉpʉ cá-aácoajupi jõ bui macacʉ ca-rotii Dio menare ca-rotii anigʉ.

El Hijo de Dios es superior a los ángeles

⁴ Dio tʉ macana cʉ̃ ca-paa coterã ángel maja ca-wamecʉna na netoro ca-ãcʉ̃re cʉ̃ ca-cũuñupi Dio cʉ̃ Macʉre. Na netoro ca-rotiire cʉ̃ ca-cũuñupi Dio cʉ̃ Macʉre.

⁵ Dio oco bairi wame cʉ̃ Macʉ jetore cʉ̃ ca-ĩiñupi: Yʉ Macʉ mʉ ãa. Ati rʉmʉ to bairona ca-anipaʉre mʉ yʉ cũu, cʉ̃ ca-ĩiñupi Dio cʉ̃ Macʉre. Cʉ̃ tʉ macana macare ángel majare to bairi wame jicãni uno na ca-ĩiquẽjupi Dio. Ape wame ca-ĩiñupi Dio tunu: Cʉ̃ Pacʉ yʉ ãa. Yʉ Macʉ majuu ãmi, ca-ĩiñupi Dio cʉ̃ Macʉre. To bairi wame cʉ̃ tʉ macana ángel majare ni macare to bairo na ĩiñaquẽemi Dio. To bairi cʉ̃ Macʉ maca ángel maja netoro ca-ãcʉ̃ ãñupi.

⁶ Ape wame ca-ĩiñupi Dio tunu cʉ̃ Macʉ mani jʉgocʉ ca-ãcʉ̃re ati yepapʉ cʉ̃ joʉ: Dio tʉ macana Angel maja nipetirã rʉpopatuapʉ tuatu ejacumuri cʉ̃re na áti nʉcʉbʉgoato.

⁷ Cʉ̃ tʉ macanare ángel maja oco bairi wame macare na ca-ĩiñupi Dio: Mʉjaare yʉ ca-rotiro yʉ ca-ĩri wame mʉja átigarã. Yʉ ca-rotirije nipetiro yoaro mee mʉja átigarã. Wino ca-papurijere bairo, peero yoaro mee ca-ʉ̃ʉ peticõarijere bairo yoaro mee mʉja áti peticõagarã yʉ ca-rotirijere.

⁸ Cʉ̃ Macʉ macare oco bairi wame cʉ̃ ca-ĩiñupi Dio: Mʉa Dio, to canacã rʉmʉ ca-rotii mʉ anigʉ. Cariape mʉ yarãre na mʉ roti mʉa.

⁹ Ca-ñuurijere, cariape ca-aniere ca-boʉ mʉ ãa mʉa. Caʉparã na ca-rotibatiere aperã na ca-bai botioro macare mʉ tee. To bairo ca-baii mʉ ca-ano tʉjʉri yʉa, Dio mʉ Ʉpaʉ ca-ãcʉ̃, wariñuuriquere mʉ yʉ joo aperã nipetirã netoro.

¹⁰ “Ʉpaʉ” cʉ̃ ca-wameyeyupi Dio cʉ̃ Macʉre tunu, oco bairi wame cʉ̃ ĩi: Ʉpaʉ, ca-ani jʉgori paʉpʉ mʉna ati yepare mʉ cá-ápʉ́. Ati ʉmʉrecóo nipetiro macaje mʉ cá-átaje jeto ãa.

¹¹ Atie mʉ cá-átaje to ca-anibato quena nipetirije ca-yajipe jeto ãa. Mʉ maca to canacã rʉmʉ ca-anicõa ãcʉ̃ mʉ anigʉ mʉa. Atie mʉ cá-átaje to ca-anibato quena cabʉcʉ jutii ca-boa yajirore bairona yajigaro.

¹² To bairi jutii cabʉcʉ ca-boarije wajoaricarore bairona ati ʉmʉrecóo macajere reecõari apeye cawama macare mʉ wajoagʉ. Mʉ maca to bairona ca-anicõa ãcʉ̃ mʉ anigʉ. Mʉ wajoaquetigʉ, ca-ĩiñupi Dio cʉ̃ Macʉre.

¹³ Ape wame oco bairo ca-ĩiñupi Dio tunu cʉ̃ Macʉre: Ato yʉ tʉna ruiri yʉ mena rotiya. Mʉre yʉ netobojagʉ mʉre ca-tʉjʉgateerãre. To bairo nare yʉ ca-netoro bero na quenare na mʉ rotigʉ. Mʉre ca-paabojarã anigarãma na quena, ca-ĩiñupi Dio cʉ̃ Macʉre. To bairi wame cʉ̃ tʉ macanare ángel maja ni macare to bairo na ĩiquẽemi Dio.

¹⁴ Naa cʉ̃re ca-paa coterã ãma. Dio na joomi, “Yʉ yarãre to canacã rʉmʉ yʉ mena ca-anicõa aninucuparãre yʉ cotebojaya,” na ĩi.